Read new_tumbuka_bible Yesaya 10 Bible Online

Yesaya 10 - new_tumbuka_bible bible

Yesaya 10

¹Soka kwa awo ŵakunozga marango ghaheni, na kwa awo ŵakulemba marango ghakunyekezga ŵanthu.

²Pakuchita ntheura ŵakujandizga ŵasokwano, kuti ŵaŵe na weruzgi wakunyoroka. Ŵakuŵapoka ŵanthu ŵane ŵakavu ivyo nvyakuŵenerera. Ŵakuskogha vinthu vya vyokoro, na kwiba vya ŵana ŵalanda.

³Kasi mwizamkuchitachi pa zuŵa la kulangika kwinu, para paranyiko likwiza kufuma kutali? Kasi mwamkuchimbilira kwa njani kuti musange wovwiri? Usambazi winu mwamkuwubisa nkhu?

⁴Kuti kwamkumukhalirani kanthu chara, mwamkukoreka umikori panji wa awo ŵakomeka. Ndipouli nanga vikaŵa ntheura, ukari wa FUMU kuti wamkugowoka chara, woko lakhe lamkuŵa lakunyoroka ndipera kuŵalanga.

⁵FUMU yikuti, “Soka ku ŵaAsiriya, ndodo ya ukari wane, awo mu woko lawo muli ndodo yakukwiya kwane.

⁶Nkhutuma charu cha Asiriya kurwa na fuko lambula kopa Chiuta, kwimikana na awo ŵakandikwiyiska ine. Nkhuchituma kuti chiskoghe na kupoka vyuma vyawo, na kuŵakandirizgira pasi ŵanthu ŵakhe, nga ndi mathipa gha msewu ya mu misumba.”

⁷Kweni ichi ndicho wakukhumba kuchita chara, ndipo kuti wakughanaghana ntheura chara mu mtima wakhe. Iyo wakughanaghana kuti waparanye na kumara petu mafuko ghanandi.

⁸Iyo wakujikuzga kuti, “Asi ŵarongozgi ŵa ŵasilikari ŵane wose mba karonga.

⁹Nkhathereska misumba ya Kalino na Karikemishi, misumba ya Hamati na Aripadi. Nkhathereskaso misumba ya Samariya na Damaseko.

¹⁰Na nkhongono zane, nkhalanga maufumu ghakusopa vikozgo, maufumu agho ŵangoza ŵawo ŵakuŵaja, ŵakaruska ŵa ku Yerusalemu na Samariya.

¹¹Kasi ndingareka kusakaza Yerusalemu na ŵangoza ŵakhe, nga ndi umo nkhachitira na Samariya na vikozgo vyakhe?”

¹²Para Fumu yamarizga mlimo wakhe wose pa Phiri la Ziyoni na pa msumba wa Yerusalemu yizamkumulanga karonga wa charu cha Asiriya chifukwa cha mazgu ghakhe ghakujikuzga na ghakujitukumura.

¹³Pakuti iyo wakuti, “Ndachita ichi na nkhongono ya ine ndekha, ndiposo na vinjeru vya ine ndekha, chifukwa ndili na mahara. Ine nkhusezga zimphaka za ŵanthu, na kuskogha mausambazi ghawo. Ndili kuthereska ŵakaronga ŵawo, nga ndi umo yikuchitira nkhambako ya nkhongono.

¹⁴Woko lane lasanga usambazi wa ŵamitundu nga ndi chivimbo, ndipo ine ndawunjika vyaru vyose nga ndi umo ŵanthu ŵakuwunjikira masumbi agho gharekeka. Pakaŵavye na yumoza uyo wakasunkhunya phapindo, panji kujula mlomo, panji kulira.”

¹⁵Kweni FUMU yikuti, “Kasi mbavi yingajikuzga panthazi pa uyo wakudumulira, panji saha panthazi pa uyo wakuchekera? Cha ntheura chingayana waka na ndodo, iyo yikukhumba kumukora munthu uyo wayiyegha, panji nga ndi ndodo iyo yikukhumba kumuwuskira muchanya, munthu uyo wakuyinyamura.”

¹⁶Pa chifukwa ichi Chiuta, FUMU Mwenenkhongono zose, wati watume nthenda yakughandiska vinkhara vya nkhondo. Ndipo uchindami wa karonga wawo, wizamkuphya na kugolera nga ndi moto.

¹⁷Ungweru wa Israele wizamkuzgoka moto, Mutuŵa Yura wizamkuŵa dimi la moto. Moto ura wizamkocha na kumyangura minga yakhe na nthura mu zuŵa limoza pera.

¹⁸Uchindami wa zinkhorongo na charu chakhe cha nyata yiweme, vizamkumara petu mukati na kuwaro, nga ndi umo munthu murwari wakughandira.

¹⁹Makuni agho ghamkukharapo mu nkhorongo yakhe, ghamkuŵa ghachoko chomene, mwakuti nanga ndi mwana wangaghapenda.

²⁰Para zuŵa ilo liza, ŵaIsraele ŵakukharako, awo ŵaphokwako ŵa nyumba ya Yakhobe, kuti ŵizamkugomezgaso ŵanthu awo ŵakaŵamaranga chara. Kweni ŵizamkugomezga mwa FUMU, Mutuŵa Yura wa Israele.

²¹Nadi, ŵakukharako ŵamkuwera. Inya ŵakukharako ŵa nyumba ya Yakhobe ŵamkuwerera kwa Chiuta Mwenenkhongono zose.

²²Nangauli sono ŵaIsraele ŵangaŵa ŵanandi nga ndi muchenga wa mu nyanja, kweni ŵachoko waka ndiwo ŵamkuwerako. Pharaniko lanozgeka leneilo liti lirongorenge weruzgi wa urunji wose.

²³Pakuti Chiuta, FUMU Mwenenkhongono zose, ndiyo yekha wizamkuchita pharaniko ili ilo lanozgekera charu chose cha pasi.

²⁴Ntheura Chiuta, FUMU Mwenenkhongono zose, wakuti, “Imwe ŵanthu ŵane, mwaŵeneimwe mukukhara mu Ziyoni, mureke kopa ŵaAsiriya, awo ŵamkumutimbani na ndodo ndiposo na zinthonga, nga ndi umo ŵaEguputo ŵakachitira ku ŵasekuru ŵinu.

²⁵Pakuti sonosono kukwiya nditi ndireke, ndipo ukari wane uti uŵe pa iwo mwakuti ŵamare petu.

²⁶FUMU Mwenenkhongono zose yizamkuŵathyapula, nga ndi umo yikachitira na ŵaMidiyani pa jarawe la Orebu. Yiti yiŵalange ŵaAsiriya nga ndi umo yikaŵalangira ŵaEguputo, yikati yanyoroskera ndodo yakhe pa nyanja.

²⁷Pa zuŵa leneilo katundu, wizamkuwuskikako pa viŵegha vyinu, goliwoli lawo pa imwe, lizamkuphyoka na kuwuskikapo pa singo yinu.”

²⁸Ŵarwani ŵinu ŵafika pa msumba wa Ayati, ŵajumpha ku Migironi, ndipo ŵaŵika katundu wawo ku Mikimashi.

²⁹Ŵadumula pa malo ghakuporotapo ndipo na usiku ŵagona mu msumba wa Geba. Ŵanthu ŵa msumba wa Rama wakutenthema, ŵa ku Gibeya, msumba wa Sauli, ŵachimbira.

³⁰Chemerezgani, imwe mwa ŵanthu ŵa ku Galimu. Tegherezgani, imwe mwa ŵanthu ŵa ku Layishi. Muŵazgore, imwe ŵa ku Anatoti.

³¹Ŵanthu ŵa ku Madimena ŵakuchimbira, ŵa ku Gebimu ŵakuchimbira kuya kabisama.

³²Muhanya uno, ŵati ŵime pa msumba wa Nobu, na kusunkhunyira mawoko ghawo pa phiri la Ziyoni, phiri la Yerusalemu.

³³Wonani, Chiuta, FUMU Mwenenkhongono zose, na nkhongono zakhe zakofya, wizamkuŵaphata nga ndi minthavi ya makuni. Ŵararaŵarara wizamkuŵakhizga, ŵakujikuzga wizamkuŵayuyura.

³⁴FUMU yizamkuŵadumula na mbavi, nga ndi umo ŵanthu ŵakudumulira makuni gha mukati mwa nkhorongo. Makuni ghakurughakuru gha mu Lebanoni ghizamkuwa.