Read new_tumbuka_bible Yesaya 11 Bible Online

Yesaya 11 - new_tumbuka_bible bible

Yesaya 11

¹Chiphukira chamkufuma mu chisinga cha Yese, munthavi wizamkumera kufuma mu misisi yakhe.

²Mzimu wa FUMU wizamkukhara pa iyo, Mzimu uwo ukupereka vinjeru na kapulikiskiro, Mzimu uwo ukupereka urongozgi na nkhongono, Mzimu uwo ukupereka umanyi na kopa FUMU.

³Iyo wizamkukondwera pakumopa FUMU. Kuti wizamkweruzga pakurumba chisko chara, nesi kughanaghana chakuchita pa ivyo ŵanthu ŵakuyowoya.

⁴Iyo wizamkweruzga ŵakavu mu urunji. Ŵakuyuyurika ŵa mu charu, yizamkuŵeruzgira mirandu yawo kwakuyana na dango. Wizamkulanga ŵakwananga ŵa mu charu, na mazgu ghakuŵa nga ndi ndodo agho wizamkuyowoya, ndipo muvuchi wa mu mlomo wakhe, wizamkukoma ŵaheni.

⁵Urunji ndiwo wizamkuŵa lamba mu chiuno chakhe, kugomezgeka ndiko kuŵenge kwakujikhozga kwakhe.

⁶Mphumphi yizamkukhara pamoza na ŵana-mberere, nyalubwe wamkugona pamoza na kana ka mbuzi. Mwana wa ng'ombe na mwana wa nkharamu vizamkuryera pamoza, ndipo msepuka ndiyo wizamkuviliska.

⁷Ng'ombe na nkharamira vizamkuryera pamoza, twana twawo twizamkugona pamoza, ndipo nkharamu yizamkurya utheka nga ndi ng'ombe.

⁸Bonda wizamkusoŵera pafupi na khururu la nkhomi, mwana wakurumurika wizamkunjizga woko lakhe, pa chizongwe cha chipiri.

⁹Kuti vizamkupwetekana nesi kukomana chara, mu phiri lane lose lakupatulika. Pakuti charu cha pasi, chizamkuzura na umanyi wa FUMU, nga ndi nyanja yakuzura na maji.

¹⁰Pa zuŵa lenelira, musisi kufuma mu chisinga cha Yese wamkwima nga ndi chimanyikwiro ku ŵanthu. Ŵamitundu ŵizamkwiza kwa iyo ndipo malo ghakhe ghakukharamo ghizamkuŵa gha uchindami.

¹¹Pa zuŵa lenelira, Fumu yamkurongoraso kachiŵiri nkhongono yakhe, kuŵawezga ŵanthu ŵakhe awo ŵakakharako kufuma ku charu cha Asiriya, cha Eguputo, cha Patirosi, cha Etiyopiya, cha Elamu, cha Babuloni, cha Hamati ndiposo na mu vyaru vya mphepete mwa nyanja.

¹²FUMU yizamkwimika chimanyikwiro ku ŵamitundu, kuti yikuwunganya ŵanthu ŵakhe ŵa charu cha Israele. Yizamkuwunganya ŵakuparanyika ŵa charu cha Yuda, kufuma ku ngodya zinayi za charu cha pasi.

¹³Sanje ya Efurayimu yizamkumara, urwani ŵa charu cha Yuda ŵizamkumara. Efurayimu kuti wizamkuŵaso na sanje na charu cha Yuda chara, nesi charu cha Yuda kusuzgaso charu cha Efurayimu.

¹⁴Kweni Yuda na Efurayimu ŵizamkurwa nkhondo, na ŵaFilisiti ku manjiliro gha dazi, wose pamoza ŵizamkuskogha vinthu vya ŵa ku mafumiro gha dazi. Ŵizamkurwaso nkhondo na ŵaEdomu na ŵaMowabu, ndipo na ŵaAmoni ŵizamkuŵalambira.

¹⁵FUMU yizamkukamuska ndomo, ya Nyanja ya Matete ya Eguputo. Yizamkuwuska woko lakhe, ndipo yizamkuputiska mphepo yakocha pa mronga wa Yufurate. Yizamkugaŵa mronga mu tumironga tunkhonde na tuŵiri, mwakuti ŵanthu ŵizakambuke uku ŵavwara skapato.

¹⁶Pamkuŵa msewu ukuru kufuma ku charu cha Asiriya, mwakuti awo ŵali kukharako mu ŵanthu ŵakhe ŵizekendemo, nga ndi umo kukaŵira msewu ukuru wa ŵaIsraele, para wakafumanga mu charu cha Eguputo.