Read new_tumbuka_bible Yesaya 12 Bible Online

Yesaya 12 - new_tumbuka_bible bible

Yesaya 12

¹Pa zuŵa lenelira, imwe mwizamkuyowoya kuti, “Ine nditi ndimurumbani imwe, Mwe FUMU, pakuti nangauli mukaŵa ŵakari na ine, ndipouli mukagowoka na kuwerako, ndipo mukiza na kundisanguruska.

²Nadi, Chiuta ndiyo chiponosko chane, nditi ndigomezge ndipo kuti ndopenge chara. FUMU Chiuta ndiyo nkhongono yane na sumu yane, ndipo ndiyo yazgoka chiponosko chane.”

³Na kukondwa muti muneghe maji, kufuma mu visimi chiponosko.

⁴Pa zuŵa lenelira, imwe mwizamkwimba kuti, “Wongani FUMU, sopaninge mu zina lakhe, thuwuskani milimo yakhe mukati mu mafuko, pharazgani kuti zina lakhe ndakuruska mazina ghose.

⁵Yimbirani FUMU, pakuti yachita vinthu vyakuzukumiska, chimanyikwe ichi mu charu chose cha pasi.

⁶Imwe ŵa mu Ziyoni, chemerezgani chomene, yimbani mwakukondwa, pakuti Mutuŵa Yura wa Israele, ndiyo mukuru mukati mwinu.”