Read new_tumbuka_bible Yesaya 13 Bible Online

Yesaya 13 - new_tumbuka_bible bible

Yesaya 13

¹Agha ndi mazgu gha Chiuta ghakuchima vya Babuloni gheneagho Yesaya mwana wa Amozi wakachima.

²Tumphuskani ndembera pa kaphiri kambula makuni, muchemerezge chomene ku ŵasilikari. Muŵachewuzge na woko kuti ŵanjire mu vipata vya ŵarongozgi ŵa charu cha Babuloni.

³Ine ndamwene ndaŵalangula ŵakupatulika ŵane, ndachema vinkhara vyane kuti vifiske ukari wane, vyeneivyo nvinkhara vyakujikuzga.

⁴Tegherezgani chiwawa kufumira mu mapiri, chiwawa icho ncha ŵanthu ŵanandi. Tegherezgani chiwawa cha ŵanthu mukati mu maufumu, chiwawa cha mafuko agho ghakuwungana pamoza. FUMU Mwenenkhongono zose, wawunganya ŵasilikari kunozgekera kurwa nkhondo.

⁵Ŵasilikari aŵa ŵakufumira ku charu cha kutali, ku mphererekezgo za charu, ndiwo mahomwa gha ukari wa FUMU, ndipo ŵakwiza kuti ŵaparanye charu chose.

⁶Tengerani, pakuti zuŵa la FUMU laneng'enera, liti lizenge nga ndi pharaniko kufuma kwa Chiuta Mwenenkhongono zose.

⁷Pa chifukwa ichi mawoko gha ŵanthu wose, ghati ghaŵenge ghambula nkhongono, ŵanthu wose ŵizamkuthika lusoko.

⁸Ŵanthu wose ŵizamkuŵa mu wofi. Vyakuŵinya na urwirwi vizamkuŵakora. Ŵizamkuŵa mu vyakuŵinya nga ndi mwanakazi para wali pafupi kubaba. Ŵizamkulaŵiskananga mu wofi, visko vyawo vizamkuwoneka vya soni.

⁹Nadi, zuŵa la FUMU likwiza, ndi zuŵa la nkhaza na la ukari wakofya. Ndi zuŵa ilo FUMU yizamkuzgolera charu cha pasi kuŵa mapopa, na kuparanya ŵanthu ŵakwananga.

¹⁰Pakuti nyenyezi za kuchanya pamoza na mawumba ghawo kuti vizamkuŵala chara. Dazi lamkuŵa lifipa para likufuma, ndipo mwezi nawo kuti wizamkuŵara chara.

¹¹FUMU yikuti, “Ndizamkulanga charu cha pasi chifukwa cha uheni wakhe, ndizamkulanga ŵakwananga chifukwa cha ubendezi wawo. Ndizamkumarizga kujikuzga kwa awo ŵakujitukumura, ndipo ndizamkuyuyura kujitukumura kwa awo mba nkhaza.

¹²Ndizamkuchepeska ŵanthu kuŵa ŵachoko waka, kuruska golide mwenecho, kuŵa ŵakuchepa kuruska golide wa Ofiri.

¹³Pa chifukwa ichi ndizamkutenthemeska mtambo, charu cha pasi chizamkusunkhunyika pa malo ghakhe, chifukwa cha ukari wa FUMU Mwenenkhongono zose, mu zuŵa la ukari wakhe wakofya.”

¹⁴“Munthu waliyose wizamkuwerera ku ŵanthu ŵakwakhe, waliyose wizamkuchimbilira ku charu chakhe, nga ndi mbaŵara iyo yikuchimbira ku ŵakuŵamba, ndiposo nga ndi mberere na mbuzi izo zilije muliska.

¹⁵Yose uyo wasangika, wizamkulasika na mukondo, wose awo ŵakoreka ŵizamkukomeka na lupanga.

¹⁶Twabonda twawo twizamkubwefukira pasi, uku ŵapapi ŵawo ŵakuwona. Katundu wa mu nyumba zawo wizamkuskogheka, ndipo ŵawoli ŵawo ŵizamkuŵagona mwakuchichizga.”

¹⁷FUMU yikuti, “Ndizamkukhuŵirizga ŵaMede kurwa nawo nkhondo, ŵeneaŵa kuti ŵakupwererako na siliva chara, nanga ndi golide kuti ŵakucha nalo chara.

¹⁸Iwo ŵizamkukoma ŵanyamata na mauta ghawo. Ŵizamkuŵavye chiwuravi pa ŵana, nesi kuŵa na chitima pa ŵabonda.

¹⁹Babuloni, utozi wa maufumu, uchindami na kujikuzga kwa ŵaBabuloni, kwizamkuŵa nga ndi Sodomu na Gomora, para Chiuta wizakawubwangandula.

²⁰Ŵanthu kuti ŵizamkukharamo chara, nesi kuzengamo kwa miwiro yose. ŴaArabu kuti ŵizamkujinthamo mahema ghawo chara, nesi ŵaliska kuti ŵaliskemo mberere zawo.

²¹Kweni vikoko vya mu mapopa ndivyo vizamkugonangamo, ŵakambwe ndiwo ŵamkukhara mu nyumba zawo. Ŵaphururu nawo ŵamkukhara mwenemumo, ndipo zimphoyo zizamkudukangadukanga mwenemumo.

²²Ŵachimbwe ŵizamkulira mu vipinda vya zinyumba zira, ŵakambwe ŵizamkubwenthanga mu nyumba zakutowa za ufumu. Nyengo ya msumba uwu yaneng'enera, mazuŵa ghakhe kuti ghizamkurutilira chara.”