Read new_tumbuka_bible Yesaya 14 Bible Online

Yesaya 14 - new_tumbuka_bible bible

Yesaya 14

¹FUMU yizamkuŵa na chiwuravi pa mbumba ya Yakhobe. Yizamkuŵasankhaso ŵaIsraele na kuŵakhazika mu charu chawo na chawo. Ŵalendo ŵamkwiza kuti ŵakhare nawo ndipo ŵizamkuŵa pamoza na mbumba ya Yakhobe.

²Vyaru vinandi vizamkovwira kuŵatorera ŵaIsraele kwiza nawo mu charu chawo icho FUMU yikaŵapa. Kwenekura ŵanthu ŵa vyaru vinyakhe, ŵanarume na ŵanakazi ŵizamkuŵateŵetera nga ŵazga. ŴaIsraele ŵizamkuŵatora awo ŵakaŵa ŵasekuru ŵawo na kuŵazgora kuŵa ŵazga ŵawo na kuŵawusa nga ndi umo iwo ŵakawusiranga ŵaIsraele.

³Para FUMU yizamkupumuzga ŵaIsraele ku vyakuŵinya, ku visuzgo na ku milimo yinonono yeneiyo ŵakanyekezgeka nayo,

⁴penepapo ŵaIsraele ŵizamkwamba kuhoya karonga wa charu cha Babuloni pakuyowoya kuti, “Munthu uyo wakatitindiŵizganga wamara, ukari wakofya ŵamara.

⁵FUMU yaphyora ndodo ya ŵanthu ŵaheni, yaphyora nthonga ya ufumu ya awo ŵakuwusa.

⁶Iwo ŵakatimbanga ŵanthu mu ukari, wakatimbanga kwambula kurekezga. Ŵakawusanga mafuko gha ŵanthu mu ukari, ŵakazikizganga ŵanthu kwambula kurekezga.

⁷Charu chose chapumula ndipo kuli bata, ndipo ŵanthu ŵakwimba mwakukondwa.

⁸Makuni gha mulombwa na gha milanje ku Lebanoni, ghakusekerera kuwa kwa iwe, karonga wa Babuloni, ghakuti, ‘Umo iwe uli kuwiskikira pasi, palije munthu na yumoza wakwiza katitema.’

⁹Malo gha ŵakufwa nagho ghasunkhunyika, kumupokererani para mukwiza. Ghawuska mizimu ya ŵakufwa kuti yimutauzgani, mose imwe mukaŵa ŵarongozgi ŵa charu cha pasi. Ghawuskapo pa vizumbe vyawo, mizimu ya ŵakaronga ŵa ŵamitundu awo ŵali kufwa.

¹⁰Mizimu yose ya ŵakufwa yizamkuzgora, na kumuyowoyerani kuti, ‘Naweso nkhongono zakumalira nga ndise, ntheura wayana waka na ise.’

¹¹Uchindami wako wamara, sumu izo ŵakakuyimbiranga na ŵabango nazo zamara, wakhilira navyo ku malo gha ŵakufwa. Mphorozi zakuruma ndizo zaŵa chitara chako, ndipo minyororo ndiyo chidiko chako.

¹²Wawa uli kufuma kuchanya iwe karonga wa Babuloni, Iwe nthanda! Mwana wa Matandakucha. Nadi waponyeka ku charu cha pasi, wa mweneiwe ukathereskanga mafuko gha ŵanthu.

¹³Iwe ukatenge mu mtima wako, ‘Nditi ndikwerere kuchanya, kwenekura ndiko ndamkuzenga chizumbe chane, pachanya pa nyenyezi ya Chiuta. Ndamkukhara pa chizumbe pachanya, ku phiri la ku mpoto kutali, uko kukuwungana ŵachiuta wose.

¹⁴Nditi ndikwere pachanya nkhanira pa maŵingu, ndamkujizgora wakuyana waka na Chiuta Chikurukuru.’

¹⁵Kweni wakhizgikira kuno ku malo gha ŵakufwa, ku dindi lakunyang'amira.

¹⁶Para ŵakufwa ŵakukuwona, ŵakukudodoliska, na kulanguruka na za iwe ndipo ŵakuti, ‘Asi uyu ndiyo wakasunkhunyanga charu, na kutenthemeska maufumu?

¹⁷Asi uyu ndiyo wakazgora charu kuŵa chiparamba, asi ndiyo wakaparanya misumba yakhe, asi ndiyo wakakana kuti ŵakayidi ŵawere ku kwawo?’

¹⁸Ŵakaronga wose ŵa ŵamitundu ŵakugona mu uchindami, waliyose mu dindi lakhe na lakhe.

¹⁹Kweni iwe waponyeka kuwaro, kutali na malo gha ŵakufwa, nga ndi nthayo iyo yikutayikira ku thondo. Chitanda chako chabenekerereka pamoza na ŵakukomeka, awo ŵakalasika na lupanga, awo ŵakaponyeka mu chizongwe cha mawe. Chitanda chako chili nga ndiwo, icho chikukandika waka na malundi.

²⁰Iwe usungikikenge mu dindi pamoza nawo chara, chifukwa waparanya charu chako, na kukoma ŵanthu ŵako. “Ŵa mphapu ya awo ŵakuchita uheni, kuti ŵakumbukikenge muyirayira chara.

²¹Nozgekani kukoma ŵana ŵa karonga uyu, chifukwa cha uheni wa ŵawiskewokuru, mzire ŵawuke na kuhara charu, na kuzenga misumba yakhe.”

²²FUMU Mwenenkhongono zose wakuti, “Ndizamkurwa nkhondo na ŵanthu ŵa msumba wa Babuloni na kuŵathereska. Pamkuŵavye na yumoza wa awo ŵakharako ŵamoyo uyo wamkuzunurika manyi na ŵana ŵawo panji nesi ŵazukuru ŵawo. Ntheura ndimo yikuyowoyera FUMU.

²³Ndamkuwuzgora msumba wa Babuloni kuŵa malo ghakukharamo ŵaphururu, viziŵa vya maji vyamkuŵa mathipa. Ndamkuwuphyera msumba na chiphyelero cha pharaniko, pakuti ntheura ndimo yikuyowoyera FUMU Mwenenkhongono zose.”

²⁴FUMU Mwenenkhongono zose yarapa, yati, “Umo ine ndanozgera ndimo chichitikirenge. Umo ndachighanaghanira, ndimo chiŵirenge.

²⁵Ndizamkuparanya ŵaAsiriya awo ŵali mu charu chane, ndizamkuŵakandira pasi pa mapiri ghane. Goliwoli lawo ndizamkuliwuskapo pa ŵanthu ŵane, katundu wawo muzitu pa viŵegha vyawo ndiŵawuskepo.

²⁶Iyi ndi fundo iyo yili kunozgekera charu cha pasi, iyi ndi nkhongono kuti yilange mafuko ghose.”

²⁷Pakuti FUMU Mwenenkhongono zose, ndiyo yanozgera ichi, kasi ndi njani wati wachikanizge? Nkhongono yakhe yarongoreka, kasi ndi njani wangachiwezgako?

²⁸Agha ndi mazgu gha Chiuta ghakuchima mu chirimika icho Karonga Ahazi wakafwira:

²⁹Mungasekereranga imwe mwa ŵaFilisiti mose, kuti nthonga iyo yikamutimbaninge yaphyoka. Pakuti mu mphapu ya njoka mwizamkufuma chipiri, ndipo chipasi chakhe chizamkuŵa chinjoka chakuwuruka cha urwirwi.

³⁰Ŵana ŵa uŵere ŵa ŵanthu ŵakavu ŵizamkurya vyakurya, ŵasokwano ŵizamkugonanga mu mutende. Kweni ŵazukuru ŵinu ndizamkuŵakoma na njara, awo ŵizamkukharako ndizamkuŵakoma na nkhondo.

³¹Tengerani chomene, imwe mukukhara pa chipata, lirani, imwe mukukhara mu msumba, thikani lusoko mwa ŵaFilisiti mose. Chifukwa nkhondo yikuru yikwiza kufuma ku mpoto, ndipo palije na yumoza mu ŵasilikari ŵakhe uyo wakuleghalegha.

³²Kasi tizamkuzizgora vichi nthumi za fuko la ŵaFilisiti, tizamkuziphalira kuti, “FUMU yakhozga msumba wa Ziyoni, ndipo ŵakasuzgika awo ŵakukhara mwenemumo, ŵati ŵasange malo ghakubisamamo.”