Read new_tumbuka_bible Yesaya 15 Bible Online

Yesaya 15 - new_tumbuka_bible bible

Yesaya 15

¹Agha ndi mazgu gha Chiuta ghakuchima vya charu cha Mowabu: Chifukwa chakuti msumba wa Ari wapasuka usiku umoza pera, charu cha Mowabu chamara. Chifukwa chakuti msumba wa Kiri wapasuka usiku umoza pera, charu cha Mowabu chamara.

²Ŵanthu ŵa msumba wa Diboni ŵakukwerera ku malo gha pachanya ghakusoperako kuya kalira. ŴaMowabu ŵakutengerera misumba ya Nebo na Medeba. Munthu waliyose wameta mupara, waliyose wameta mwembe wakhe.

³Mu misewu ŵanthu ŵavwara vigudulu. Pachanya pa zinyumba na mu mabaraza, waliyose wakutengera na kuthira waka masozi.

⁴Ŵanthu ŵa mu Heshiboni na wa Eleyale ŵakuchemerezga, mazgu ghawo ghakupulikikwa na ku Yahazi. Ntheura ŵasilikari wa charu cha Mowabu ŵakulira, ndipo ŵakumbwambwantha chomene.

⁵Nkhachilirira charu cha Mowabu, ŵanthu ŵakhe ŵachimbilira ku Zowara, na ku Egilati Shelishiya. Ŵaruta pakukwerera pa nthowa ya Luhiti uku ŵakulira, ŵanyakhe ŵachimbilira ku msewu wakuya ku Horonayimu, ŵakwenda kalira chifukwa cha pharaniko yawo.

⁶Maji gha kamronga ka Nimirimu ghakamuka, utheka nawo wafota, kulije mpozwa uphya, kulije chakumera chakubiriŵira.

⁷Ntheura usambazi uwo ŵakaŵa nawo na uwo ŵakuwunjika, ŵamkuyegha na kwambuka nawo Kamronga ka Makuni gha Katope.

⁸Kulira kwawo kukupulikikwa ku mphaka za Mowabu, kutengera kwawo kwafika mpaka ku Egilayimu, nadi kutengera kwapulikikwa ku Beyere Elimu.

⁹Pakuti maji gha mu Diboni ghasazgikana na ndopa. Ndipouli Chiuta watizenge na visuzgo vinandi pa ŵa mu Diboni. Ivi vili nga ndi nkharamu za kulanga ŵaMowabu awo ŵakachimbira, ŵeneawo ŵali kukharapo mu charu.