Read new_tumbuka_bible Yesaya 16 Bible Online

Yesaya 16 - new_tumbuka_bible bible

Yesaya 16

¹ŴaMowabu ŵatuma chawanangwa cha mwana-mberere, kwa uyo wakuwusa charu cha Yuda, kufuma ku Sela, kwizira nthowa ya ku chiparamba, mpaka ku phiri la msumba wa Ziyoni.

²Nga ndi tuyuni twakuwuruka waka uku na uku, uto twachimbizgika mu vivimbo vyawo, ndimo ŵaliri ŵanakazi ŵa charu cha Mowabu, pa majambuko gha mronga wa Arinoni.

³Iwo ŵakuti ku ŵaYuda, “Mutiphalire icho tingachita, mutipe weruzgi wakunyoroka. Zgorani muzgezge winu kuŵa usiku, para dazi liri na muhanya pakati, Mutibise ise ŵakuchimbizgika, mureke kutipereka ku ŵarwani ŵithu.

⁴Awo ŵakuchimbira nkhondo ŵa ku Mowabu ŵapanjwe namwe. Muŵe chakubisamamo chawo, kwa uyo wakukhumba kuŵakoma.” Para uyo wakutindiŵizga wamara, kukoma nako kwizamkumara. Uyo wakutindiŵizgira ŵanthu pasi wizamkumalirathu pa charu.

⁵Penepapo chizumbe chizamkwimikika mu chisungusungu, ndipo yumoza wa mphapu ya Davide, ndiyo wizamkukhara pa chizumbe ichi mwakugomezgeka. Iyo wizamkupereka weruzgi wakunyoroka, ndipo ndi mupusu kuchita urunji.

⁶Ŵanthu ŵa ku Yuda ŵakuti, “Ise tapulika kujikuzga kwa ŵaMowabu, nadi ŵakujikuzga chomene. Nanga ŵaŵe ŵakujitukumura, wakujikuzga panji ŵakujiwona, kweni kujikuzga kwawo nkhwa waka.”

⁷Ntheura ŵaMowabu ŵatengere chomene, waliyose watengerere fuko lawo. Lirani pakuti muli na chitima, chifukwa cha vingwa vipapati vya mpheska, ivyo mukaryanga mu msumba wa Kiri Hareseti.

⁸Pakuti minda ya mu Heshiboni yasukuruka, mpheska ya ku Sibima nayo yikomira. Ŵakaronga ŵa ŵamitundu, ndiwo ŵakayiphyorera pasi minthavi yakhe. Kale chomene yikafikanga ku msumba wa Yazere, ndipo yikatandazga mpaka ku charu cha chiparamba. Misisi yakhe yikathazira, mpaka ku vyaru vya ku sirya kwa nyanja.

⁹Ntheura nditi ndilire nga ndi ŵanthu ŵa msumba wa Yazere, chifukwa cha mpheska za mu Sibima. Imwe ŵa mu Heshiboni na ŵa mu Eleyale, nkhumunyevyani na masozi ghane. Chifukwa mphomo ya kukondwa kwinu pa vipasi vyinu na pa nyengo ya kuvuna yamara.

¹⁰Kukondwa na chimwemwe mulije mu minda yakupambika nadi, na yumoza wakwimba panji kuchemerezga mu minda ya mpheska. Na yumoza wakuponda vinyo mu vyakukamiramo vinyo, mphomo ya ŵakuvuna mpheska yarekeskeka.

¹¹Ntheura nkhuŵatengerera ŵaMowabu, nga ndi umo wakulirira bango, nkhutamphira mukati pakuŵalirira ŵa mu Kiri Heresi.

¹²Nangauli ŵaMowabu ŵakwiza ku malo gha pachanya ghakusoperako kuti ŵasope, ŵakujivuska waka. Nangauli ŵakuruta ku malo ghawo ghakupatulika, kuti chiti chandurenge kanthu chara kwa iwo.

¹³Agha ndi mazgu agho FUMU yikayowoya kale chomene pakususka charu cha Mowabu.

¹⁴Kweni sono FUMU yikuti, “Mu virimika vitatu vyeneivyo vikupendeka kuŵa vya uyo walembeka nchito, uchindami wa charu cha Mowabu wizamkumara. Ŵanthu ŵakhe ŵanandi ŵizamkumara, ndipo ŵachoko waka awo ŵizamkuponapo, ŵizamkuŵa ŵakutomboroka.”