Read new_tumbuka_bible Yesaya 17 Bible Online

Yesaya 17 - new_tumbuka_bible bible

Yesaya 17

¹Agha ndi mazgu gha Chiuta ghakuchima vya msumba wa Damaseko: Damaseko kuti wizamkuŵaso msumba chara, kweni wizamkuzgoka kuŵa mulu wa mahami.

²Misumba ya Aroyere yizamkusidika kwa muyirayira. Yizamkuŵa malo ghakukharako miskambo ya mberere, izo zizamkugonanga kwambula waliyose wakuziwofya.

³Charu cha Efurayimu kuti chizamkuŵaso na linga chara, msumba wa Damaseko nawo ŵizamkuŵavye ufumu. Ŵakukharako ŵa charu cha Siriya, ŵizamkuŵa nga ndi uchindami wakuwukako wa Israele. Ntheura ndimo FUMU Mwenenkhongono zose yikuyowoyera.

⁴FUMU yikuti, “Zuŵa likwiza apo uchindami wa Yakhobe wizamkumara, ndipo pa usambazi wakhe pizamkuŵa ukavu.

⁵Kwamkuŵa nga ndi para wakuvuna wakuwunjika tirigu wakucha, ndipo wakuvuna mphonje za tirigu na mawoko ghakhe, panji nga ndi para munthu wakuvulura mphuzi za tirigu, mu Dambo la Refayimu,

⁶Ndipouli zinyakhe zikukharako, chili nga ndi para ŵasunkhunya khuni la maolive, kweni vipambi viŵiri panji vitatu vikukharako pachanya pa khuni, panyakhe vinayi panji vinkhonde pa munthavi uwo wapambika chomene.” Ntheura ndimo FUMU, Chiuta wa Israele wakuyowoyera.

⁷Pa zuŵa leneilo ŵanthu ŵizamkulaŵiska kwa Mlengi wawo, ndipo maso ghawo ghizamkurazga kwa Mutuŵa Yura wa Israele kupenja wovwiri.

⁸Kuti ŵizamkuŵikaso mitima yawo pa majochero chara, gheneagho ŵakapanga ŵekha na mawoko ghawo, nanga nkhulorako za mizati ya Ashera, pamoza na majochero ghakocherapo vyakununkhira.

⁹Pa zuŵa lenelira misumba ya nkhongono ya Israele yizamkurekeka nga ndi umo misumba ya ŵaHivi na ŵaAmori[3] yikarekekera para ŵakachimbiranga ŵaIsraele ndipo mukamera thengere na kuŵa mapopa.

¹⁰Imwe ŵaIsraele, mwaruwa Chiuta Muponoski winu, mundakumbuke jarawe linu yakuponoskekerako. Ntheura nanga mukupanda makuni ghaweme, kupandira ŵachiuta ŵachilendo,

¹¹nanga mukuyizgora kuti yikule pa zuŵa ilo mukuyipandira, na kuyizgora kuti yiŵale maluŵa mu mulenje weneuwo mukuseŵera. Ndipouli ivyo mwamkuvuna vizamkumara, pa zuŵa la visuzgo na la vyakuŵinya vyambula kuchizgika.

¹²Pulikani! Ndi mphomo ya ŵanthu ŵanandi, ŵakupoma nga ndi chipopoma cha maji gha mu nyanja. Pulikani! Ndi mphomo ya ŵanthu ŵanandi, ŵakupoma nga ndi maji ghanandi ya nkhongono.

¹³Nangauli ŵamitundu ŵakupoma nga ndi maji ghanandi, kweni Chiuta wizamkuŵachenya ndipo ŵizamkuchimbilira kutali. Ŵizamkuchimbizgika nga ndi umo mwerero ukuwuruskikira na mphepo pa mapiri, nga ndi kavuruvuru wa fuvu pambere chimphupuru chindize.

¹⁴Pa nyengo ya mise, ŵanthu aŵa ŵakofya chomene, kweni ku matandakucha ŵakuwoneka chara. Ili ndilo phande la awo ŵakutibira, njombe ya awo ŵakutiskogha.