Read new_tumbuka_bible Yesaya 19 Bible Online

Yesaya 19 - new_tumbuka_bible bible

Yesaya 19

¹Agha ndi mazgu gha Chiuta ghakachima vya charu cha Eguputo: Wonani, FUMU yikwiza mu charu cha Eguputo, yakwera pa bingu ilo likwenda luŵiroluŵiro. Vikozgo vya charu cha Eguputo vizamkutenthema panthazi pakhe, ndipo ŵanthu ŵa ku Eguputo ŵizamkuthika lusoko.

²FUMU yikuti, “Ndamkuŵakhuŵirizga ŵaEguputo kuti ŵawukirane ŵekha. Iwo ŵizamkuwukirana mwana munyakhe na mwana munyakhe, mzengezgani na muzengezgani wakhe, msumba na msumba unyakhe, ndipo ufumu na ufumu unyakhe.

³ŴaEguputo ŵizamkuthika lusoko ndipo ndizamkutimbanizga ivyo ŵakunozgera kuchita. Ŵizamkufumbilira ku vikozgo na ku mizimu ya ŵakufwa, ku ŵamayere na ku ŵawukwi.

⁴Ndizamkuŵapereka ŵaEguputo, mu woko la murongozgi wa nkhaza. Karonga wakofya ndiyo wizamkuŵawusa.” Ntheura ndimo wakuyowoyera Chiuta, FUMU Mwenenkhongono zose.

⁵Maji gha mronga wa Nayelo ghizamkuphwa, ndipo mronga wizamkukamuka na komira.

⁶Tumifwirenji twa mronga tuzamkumunkha, tumadambo tunyakhe twa Nayelo, tuzamkukamuka na komira, Matete na marukwa ghizamkufota.

⁷Vyakumera vya mu mphepete mwa Nayelo vizamkomira, ivyo vyapandika mu mphepete mwa Nayelo vizamkufota, ndipo vizamkuputwa na mphepo na kureka kuwonekaso.

⁸Ŵarovi ŵati ŵatamphe na kutengera, awo ŵakuŵeja mu mronga wa Nayelo. Ŵati ŵasuzgike awo ŵakuponya mikwawu pa maji.

⁹Ŵati ŵathike lusoko, awo ŵakupanga salu na wazi uweme, awo ŵakuruka na thonje lituŵa.

¹⁰Awo ndi mizati ya charu ŵizamkuthika lusoko, awo ŵakuteŵeta kuti wasangirepo chandulo, ŵizamkuŵa na chitima.

¹¹Nduna za msumba wa Zowani nvindere chomene. Ŵanthu ŵamahara awo ŵakumupa urongozgi Faro, ŵakupereka urongozgi wa uchindere. Kasi imwe mungamuphalira uli Faro kuti, “Ine ndine yumoza wa ŵanthu ŵavinjeru, musambiri wa ŵakaronga ŵa mwaka.”

¹²Iwe Faro, kasi ŵavinjeru ŵako ŵalinkhu? Ŵize sono kuti ŵakuphalire na kukumanyiska, ivyo FUMU Mwenenkhongono zose, yanozgera kuchita vyakususka charu cha Eguputo.

¹³Nduna za msumba wa Zowani zazgoka vindere, ŵarongozgi ŵa msumba wa Memufisi ŵapusikika. Ŵanthu awo mbakuzirwa mu mitundu yakhe, ŵapuruska charu cha Eguputo.

¹⁴FUMU yaŵikamo mukati mu ŵanthu aŵa, mzimu wa chitimbaheti. Iwo ŵazgora charu cha Eguputo, kuŵa chakupenthyapenthya mu machitiro ghakhe ghose, nga ndi mloŵevu uyo wakukunkhuruka mu bukuzi lakhe.

¹⁵Kwamkuŵavye na chimoza icho ŵa mu Eguputo ŵamkuchitapo, manyi wangaŵa musambazi panji mukavu, wakuzirwa panji munthu waka waliyose.

¹⁶Mu zuŵa leneilo, ŵaEguputo ŵizamkuŵa nga mbanakazi. Iwo ŵizamkutenthema pamoza na kopa para ŵakuwona FUMU Mwenenkhongono zose yawuskira woko lakhe muchanya kuti yiŵalange.

¹⁷Charu cha Yuda chamkuŵa chakofya kwa ŵaEguputo. Munthu yose mweneuyo wamkuphalirika vya charu cha Yuda, ŵizamkuŵa na wofi chifukwa cha icho FUMU Mwenenkhongono zose yikukhumba kuŵachitira ŵaEguputo.

¹⁸Mu zuŵa leneilo, kwamkuŵa misumba yinkhonde mu charu cha Eguputo yeneiyo ŵanthu ŵakhe ŵamkuyowoya chiHebere ndipo ŵizamkurapa mu zina la FUMU Mwenenkhongono zose kuti ŵizamkulambira FUMU pera. Umoza wa misumba iyi wizamkuchemeka kuti, “Msumba wa Dazi.”

¹⁹Mu zuŵa leneilo, kwizamkuŵa jochero la FUMU mukati mu charu cha Eguputo ndipo mzati wa chikumbusko kwa FUMU wizamkuŵa ku mphaka za charu chakhe.

²⁰Chikumbusko ichi chamkuŵa chimanyikwiro na ukaboni kuti mu charu cha Eguputo muli FUMU Mwenenkhongono zose. Para ŵamkulira kwa FUMU chifukwa cha awo ŵakuŵatindiŵizgira pasi, FUMU yizamkuŵatumira Muponoski kuti waŵavikirire na kuŵathaska.

²¹Ntheura FUMU yizamkujivumbula yekha ku ŵaEguputo, ndipo mu zuŵa leneilo ŵaEguputo ŵizamkumanya FUMU. Ŵizamkulambira FUMU na kupereka sembe zakocha na sembe zinyakhe, ndipo ŵizamkuchita mapangano kwa FUMU na kughafiska.

²²FUMU yizamkuŵalanga nadi ŵaEguputo na vilengo vikuru, kweni pamanyuma yizamkuŵachizga. Iwo ŵizamkuwerera kwa FUMU ndipo iyo yizamkupulika maŵeyerero ghawo na kuŵachizga.

²³Mu zuŵa leneilo, kwizamkuŵako msewu ukuru pakati pa charu cha Eguputo na charu cha Asiriya. ŴaAsiriya ŵizamkuruta ku charu cha Eguputo ndipo ŵa ku Eguputo nawo ŵizamkurutanga ku charu cha Asiriya, ndiposo ŵaEguputo ŵizamkusopanga pamoza na ŵaAsiriya.

²⁴Mu zuŵa leneilo, Israele wizamkuŵa pamoza na Eguputo na Asiriya, ndipo vyaru vitatu ivi vizamkuŵa chitumbiko pa charu cha pasi.

²⁵FUMU Mwenenkhongono zose yizamkuŵatumbika pakuyowoya mazgu ghakuti, “Ŵatumbikike ŵaEguputo, ŵanthu ŵane, ŵaAsiriya, ŵanthu ŵeneawo nkhaŵalenga, ndiposo na ŵaIsraele, ŵanthu ŵeneawo nchiharo chane.”