Read new_tumbuka_bible Yesaya 2 Bible Online

Yesaya 2 - new_tumbuka_bible bible

Yesaya 2

¹Mazgu agho Chiuta wakavumbula mu mboniwoni kwa Yesaya, mwana wa Amozi, vya charu cha Yuda na msumba wa Yerusalemu ndi agha:

²Icho chizamkuŵako mu mazuŵa gha kunthazi nchakuti, phiri la Nyumba ya FUMU, lamkwimikika kuŵa litali kuruska mapiri ghose, lamkutumphuska pachanya tumapiri tose. Mafuko ghose ya ŵanthu ghizamkuthirimukira kwenekuko.

³Ŵanthu ŵanandi ŵizamkuruta kwenekura na kuyowoya kuti, “Zaninge, tiyeni tikwerere ku Phiri la FUMU, ku Nyumba ya Chiuta wa Yakhobe. Iyo wamkutisambizga nthowa zakhe, mwakuti tendenge mu maluwayo ghakhe. Pakuti mu Ziyoni ndimo muli dango lakusambizga ise, mu Yerusalemu ndimo FUMU yiti yiyowoyenge kwa ise.”

⁴FUMU yizamkweruzga pakati pa ŵamitundu, ndipo yizamkumarizga kureka kupulikana, pakati pa mafuko ghanandi. Ŵanthu ŵizamkufura malupanga ghawo, kuŵa mayembe ghakulimira, mikondo yawo kuŵa zimphopo. Kwamkuŵavye charu chakuchita nkhondo na charu chinyakhe, nanga nkhusambiramo vya nkhondo.

⁵Zaninge, imwe ŵa mu mbumba ya Yakhobe, tiyeni tendenge mu ungweru wa FUMU.

⁶Imwe Chiuta, mwaŵareka ŵanthu ŵinu, ŵa mbumba ya Yakhobe. Mwaŵareka chifukwa ŵakuchita maula nga ndi ŵanthu ŵa ku mafumiro gha dazi. Iwo mbawukwi nga ndi ŵaFilisiti, ndipo ŵakuchita nawo maluso gha ŵakuwaro.

⁷Charu chawo chazura na siliva na golide, vyuma vyawo kuti vikumara chara. Charu chawo chazura na mahachi, ndipo magareta ghawo ngambula mapendeko.

⁸Charu chawo chazura na vikozgo, ŵakuvijikamira ivyo ŵakapanga na mawoko ghawo, vyeneivyo ŵakawumba na minwe yawo.

⁹Ntheura ŵanthu ŵakuyuyurika, ndipo waliyose wakukhizgikira pasi. Mungaŵagowokeranga chara.

¹⁰Ŵizamkuphalirika kuti, “Njirani mu zimphanji, bisamani mu makhururu,” chifukwa cha kopa ukari wa FUMU, na uchindami wa ufumunkhuru wakhe.

¹¹Pa zuŵa ilo, yose uyo wakujitukumura wati wayuyurike, ndipo uyo wakujikuzga ŵati ŵakhizgikire pasi. Pakuti FUMU yekha ndiyo yizamkukwezgeka.

¹²FUMU Mwenenkhongono zose yili nalo zuŵa, lakukhizgira pasi wose awo mbakujikuzga na ŵakutitemwa, ndiposo na wose awo mbakujikwezga na ŵakujitukumura.

¹³Yili na zuŵa lakudumulira makuni gha milange gha mu Lebanoni, agho ngatali na ghakutunthumuskika, ndiposo na makuni ghose gha musoro gha mu Bashani.

¹⁴Yili na zuŵa lakusalazira mapiri ghatali ghose, ndiposo na tumapiri uto nthwakutunthumuskika.

¹⁵Yili na zuŵa lakuwiskira pasi vigongwe vyose vitali, na kudilimulira pasi malinga ghose.

¹⁶Yili na zuŵa lakubizgira ngaraŵa zose ku Tarishishi, ngaraŵa zose zakutowa.

¹⁷Munthu uyo ngwa kujitukumura wizamkukhizgikira pasi, uyo ngwa kujikuzga wizamkuyuyurika. FUMU yekha ndiyo yizamkukwezgeka pa zuŵa leneilo.

¹⁸Vikozgo navyo vizamkumalirathu.

¹⁹Ŵanthu ŵizamkuchimbira kuya kabisama mu zimphanji za majarawe, na mu makhururu pasi pa charu, chifukwa chakopa ukari wa FUMU, ndiposo na uchindami wa ufumunkhuru wakhe, para yizenge kwiza kasunkhunya charu.

²⁰Pa zuŵa ilo, ŵanthu ŵizamkutayira ŵakamuzumi na ŵakasuska, vikozgo vyawo vya siliva na vya golide, ivyo ŵakavipanga kuti ŵavisope,

²¹na kuchimbira kuya kabisama mu zimphanji za majarawe, na mu makhururu pasi pa charu, chifukwa chakopa ukari wa FUMU, ndiposo na uchindami wa ufumunkhuru wakhe, para yizenge kwiza kasunkhunya charu.

²²Rekani kugomezga munthu, mweneuyo iyo ndi mvuchi wa waka. Ntheura munthu wali na chandulo uli?