Read new_tumbuka_bible Yesaya 20 Bible Online

Yesaya 20 - new_tumbuka_bible bible

Yesaya 20

¹Chirimika chinyakhe, Sarigoni, karonga wa charu cha Asiriya, wakatuma murongozgi wa ŵasilikari ku msumba wa Ashidodi. Iyo wakarwa na msumba uwu na kuwupoka.

²Pa nyengo yeneiyo, FUMU yikaŵa yayowoya kale na Yesaya, mwana wa Amozi, kuti, “Ruta ukavure chigudulu mu chiuno chako ndiposo na kuwuskako skapato ku malundi ghako.” Yesaya wakachita ntheura ndipo wakenda nkhule na kwambula skapato.

³Ntheura FUMU yikati, “Nga ndi umo muteŵeti wane Yesaya wendera nkhule, na kwambula kuvwara skapato pa virimika vitatu, kuŵa chimanyikwiro pa icho chiti chitikenge mu charu cha Eguputo na Etiyopiya,

⁴ntheura ndimo karonga wa charu cha Asiriya wati waŵatorere ŵaEguputo na ŵanthu ŵa ku Etiyopiya ku umikori, ŵachoko na ŵarara wuwo uku ŵali nkhule na ŵambula kuvwara skapato ndipo matako ghali bengende kuti wakhozge soni charu cha Eguputo.

⁵Sono awo ŵakagomezganga Etiyopiya na awo ŵakajikuzgiranga mwa Eguputo, ŵizamkuŵa na wofi na kukhozgeka soni.

⁶Pa zuŵa leneilo ŵanthu awo ŵakukhara mu mphepete mwa nyanja ŵizamkuyowoya kuti, ‘Wonani icho chaŵachitikira ŵanthu awo tikaŵagomezganga, ŵanthu awo tingachimbilirangako kuti tikasangako wovwiri na kuthaskika kwa karonga wa charu cha Asiriya. Sono ise kasi ndi tingaponoskeka uli?’ ”