Read new_tumbuka_bible Yesaya 21 Bible Online

Yesaya 21 - new_tumbuka_bible bible

Yesaya 21

¹Agha ndi mazgu gha Chiuta ghakuchima vya Babuloni, charu icho chili ku chiparamba mphepete mwa nyanja: Soka lifikenge kufuma ku charu cha chiparamba, nga ndi umo kavuruvuru wa ku mwera wakuputira, kufuma ku charu chakofya.

²Mu mboniwoni yane ndawona vinthu vyakofya, wakuskogha, wakaskoghanga waka, wakuparanya, wakaparanyanga waka. Imwe ŵasilikari ŵa charu cha Elamu yambani nkhondo, imwe ŵasilikari ŵa charu cha Mediya zingirizgani msumba uwo. Ine FUMU nditi ndimarizge mitampho yose, iyo yikiza na ŵanthu ŵa mu Babuloni.

³Pa ichi thupi lane lazura na vyakuŵinya, urwirwi wandikora nga ndi mwanakazi, uyo wali pafupi kubaba. Ndasuzgika mu mtima, nkhutondeka na kupulika, ndathika lusoko, nkhutondeka na kulaŵiska.

⁴Mtima wane ukulipuka, nkhutenthema pakuŵa na wofi. Nyengo ya mise iyo nkhayikhumbanga, yazgoka nyengo ya kumbwambwanthira.

⁵Iwo ŵakunozgera chiphikiro, ŵakutandika mphasa zakukharapo, ndipo wakumwa na kurya. Penepapo ŵakupulika mazgu ghakuti, “Imwe nduna, wukani, phakazgani mafuta nguru zinu.

⁶Pakuti icho Fumu yayowoya kwa ine ndi ichi: ‘Ruta ukimike mulinda, iyo wapharenge icho wakuchiwona.

⁷Para wawona ŵanthu ŵali pa mahachi, ŵakwenda ŵaŵiriŵaŵiri, ŵanyakhe ŵakwera pa zimbunda, ŵanyakhe ŵakwera pa ŵangamila, iyo wategherezge chomenechomene nkhanira.’ ”

⁸Mulinda yura wakachemerezganga kuti, “Mwe sekuru wane, ine nkhwimilira pa chigongwe ichi zuŵa na zuŵa, usiku wose nkhuŵa pa malo ghane pano.

⁹Wonani, nkhuwona ŵanthu ŵakwiza, ŵakwenda ŵaŵiriŵaŵiri pa mahachi. Ndipo mulinda yura wakazgora wakati, ‘Babuloni wawa, Babuloni wawa. Vikozgo vyose vya ŵachiuta ŵakhe, ŵaswera pasi tuchokotuchoko.’

¹⁰Mwa ŵanthu ŵane, mwaphwanyika nga ndi tirigu, Ine nditi ndimuphalirani icho ndapulika, kufuma kwa FUMU Mwenenkhongono zose, kufuma kwa Chiuta wa ŵaIsraele.”

¹¹Agha ndi mazgu gha Chiuta ghakuchima vya charu cha Edomu: Munthu yunji wakundichema kufuma ku Edomu wakuti, “Iwe mulinda, usiku umarenge pauli? Iwe mulinda, kasi kuti kuchenge pauli?”

¹²Mulinda wakuti, “Kukucha, kweni kufipengeso. Usange ukukhumba kufumbaso, ukizeso wizakafumbe.”

¹³Agha ndi mazgu gha Chiuta ghakuchima vya charu cha Arabiya. Imwe mipingo ya ŵa ulendo ŵa ku Dedani, mwamkugona mu matundu gha charu cha Arabiya.

¹⁴Imwe ŵanthu ŵa ku charu cha Tema, muŵape maji awo ŵali na nyota kuti ŵamwe, muŵape chakurya awo ŵakuchimbira nkhondo.

¹⁵Ŵanthu ŵakuchimbira kuti ŵathaskike ku malupanga, agho ghawuskika kuti ŵaŵakome nagho ŵakachimbira kuti wathaskike ku mauta ghakukweŵa, ndiposo na ku nkhondo yakofya.

¹⁶Chifukwa FUMU yandiphalira kuti, “Chindamare chirimika, kwakuyana na umo virimika vikupendekera kwa uyo walembeka nchito, uchindami wose wa ŵaKedara wamkumara.

¹⁷Kweni ŵachoko waka awo ndi vinkhara vyakuponya mivwi mu mauta ghawo, kufuma mu Kedara, ndiwo ŵamkukharako. Pakuti cheneichi ndicho FUMU, Chiuta wa Israele wayowoya.”