Read new_tumbuka_bible Yesaya 22 Bible Online

Yesaya 22 - new_tumbuka_bible bible

Yesaya 22

¹Agha ndi mazgu gha Chiuta ghakuchima vya Dambo la Mboniwoni. Kasi mukung'anamula vichi, kuti mose imwe mukwere pa mtenje wa zinyumba zinu,

²imwe ŵa mu msumba wakuzura na viwawa, msumba wa chitimbaheti na wakuhenera. Ŵanthu awo ŵali kukomeka, kuti ŵali kufwa na lupanga chara, panji nesi kuti ŵali kufwira ku nkhondo chara.

³Ŵarongozgi ŵinu wose ŵakachimbira pamoza, ŵakakoreka kwambula kujivikirira. Nangauli ŵakachimbilira kutali, ndipouli ŵakakoreka na kutoreka kuŵa ŵazga.

⁴Ntheura ine nkhati, “Fumanipo, mundireke kuti ndilire chomene. Mureke na kukoserezga kuti mundisanguruske, chifukwa cha nyifwa ya ŵanthu ŵa ku kwithu.

⁵Pakuti FUMU, Chiuta Mwenenkhongono zose, wali kwimika zuŵa, leneilo lamkuŵa la visuzgo na la kuthereskeka, ndipo na la chitimbaheti mu Dambo la mboniwoni. Lamkuŵa zuŵa ilo malinga ghamkubwangandukira pasi, ndiposo na kuchemerezga ku mapiri kuti ŵarombe wovwiri.”

⁶ŴaElamu ŵakayegha phodo la mivwi pamoza na magareta na ŵakukwera pa mahachi, ndipo ŵasilikari ŵa charu cha Kiri ŵakaŵa na nguru.

⁷Madambo ghinu gha nyata yiweme, ghakazura na magareta gha nkhondo, ndipo ŵasilikari ŵakukwera pa mahachi, ŵakimilira panthazi pa vipata vya msumba.

⁸Ŵawuskako vyakuvikirira charu cha Yuda. Mu zuŵa leneilo mukagomezga mahomwa gha ku Nyumba ya Ufumu ya mu Nkhorongo.

⁹Ndipo mukawonaso kuti mu msumba wa Davide, muli malo ghanandi ghakugumuka, ndipo mukasunga maji gha chiziŵa cha kusika.

¹⁰Mukapenda nyumba za mu Yerusalemu, ndipo mukazibwangandulira pasi kuti muzengere linga.

¹¹Mukanozga chakusungiramo maji gha chiziŵa chakale pakati pa viliŵa viŵiri. Kweni mukaghanaghanako za Chiuta uyo wakachita ichi chara, panji nesi kupwererako za mweneuyo wakanozgera papo kale.

¹²Mu zuŵa leneilo FUMU, Chiuta Mwenenkhongono zose, wakamuchemani imwe kuti mulire na kutengera, kuti mumete masisi ghinu na kuvwara vigudulu.

¹³Kweni wonani, imwe mukasekereranga na kukondwera, mukakomanga ng'ombe ndiposo na mberere na mbuzi, mukaryanga nyama na kumwa vinyo. Mukayowoyanga kuti, “Tiyeni tiryenge na kumwa, pakuti na machero titi tifwenge.”

¹⁴FUMU Mwenenkhongono zose, yavumbula ichi kwa ine, yati, “Nadi, kuti mwizamkugowokereka kwananga uku chara mpaka mufwe.” Ndimo FUMU Chiuta Mwenenkhongono zose wakuyowoyera.

¹⁵FUMU, Chiuta Mwenenkhongono zose wakati, “Zanga, urutenge kwa Shebina, murara wa nyumba ya ufumu, na kumufumba kuti,

¹⁶‘Kasi uchitengechi kuno ndipo ŵabali ŵako mbanjani apa wajinozgera dindi pano? Asi iwe ukujijimira dindi pa malo ghakukwera, na kujinozgera chikhazi mukati mu majarawe?

¹⁷Iwe wa munthu wankhongono, uchenjere pakuti FUMU yili pafupi kukukoma mwa nkhongono na kukuponya kutali.

¹⁸FUMU yizamkukuvunga ndipo yizamkuzungunyazungunya nga ndi bola na kukuponya mu charu chikuru ndipo kwenekuko ndiko wamkufwira. Kwenekuko ndiko magareta ghako gha uchindami ghamkuŵa ndipo iwe wamwene wamkukhozga soni ŵa mu nyumba ya sekuru wako.

¹⁹Ndizamkukuchimbizga pa nchito yako ndipo wizamkukhizgikira pasi kufuma apo uli.’ ”

²⁰“Mu zuŵa leneilo ndizamkuchema muteŵeti wane Eliyakimu, mwana wa Hilikiya.

²¹Ndipo iyo ndizamkumuvwarika malaya ghako gha urara wa mu nyumba ya ufumu ndiposo na lamba wako mu chiuno chakhe. Ndizamkupereka mazaza ghako mu mawoko ghakhe ndipo wizamkuŵa nga ndi wiske wa awo ŵakukhara mu Yerusalemu na ku ŵaYuda.

²²Ndizamkumupa mazaza ya mu mbumba ya Karonga Davide, mwakuti wizamkuŵa na makiyi ghakuti para wajula, pamkuŵavye na yumoza wakujara ndipo para wajara, pamkuŵavye na yumoza wakujula.

²³Ndizamkumukhozga nga ndi chikhomo icho chili pa malo ghakukhora. Eliyakimu waŵenge nga ndi chizumbe cha uchindami ku nyumba ya ŵawiske.”

²⁴Kweni ŵana ŵakhe na ŵa ŵabali ŵakhe wose ŵizamkuŵa chinthu chakuzotofya kwa iyo. Iwo ŵizamkudemerera kwa iyo nga ndi umo masefuliya, mabakule na nkhombo vikupayikikira.

²⁵FUMU Mwenenkhongono zose yikuti, “Zuŵa leneilo, chikhomo icho chaŵikika pa malo ghakukhora chamkumara nkhongono. Chiti chidumurike na kuwa ndipo wose awo ŵakademerera pa icho ŵati ŵamare petu.” Ntheura ndimo yikuyowoyera FUMU.