Read new_tumbuka_bible Yesaya 23 Bible Online

Yesaya 23 - new_tumbuka_bible bible

Yesaya 23

¹Agha ndi mazgu gha Chiuta ghakuchima vya msumba wa Ture: Tengerani, imwe mukwendeska ngaraŵa za ku Tarishishi, chifukwa msumba wa Ture wazgoka mapopa, ulije nyumba nanga ndi madowoko. Mazgu agha mukaghapulika, para mukafumanga ku Kipuro.

²Chetamani, imwe mukukhara mu mphepete mwa nyanja, na imwe ŵamalonda ŵa charu cha Sidoni, mwaŵeneimwe nthumi zinu zikambuka nyanja yikuru.

³Iwo ŵakenda pa maji ghanandinandi, ŵakiza na tirigu wa ku mu dambo la Shihoro, vuna kufuma mu mronga wa Nayelo. Imwe mukachitanga malonda na ŵamitundu

⁴Ukhozgeke soni, iwe msumba wa Sidoni, msumba uwo uli na linga pa nyanja, pakuti nyanja yayowoya, yati, “Ine ndilije kupulikapo vyakuŵinya vya pa kubaba, nanga nkhubabapo ŵana. Ine ndilije kulerapo ŵana ŵanarume, nanga nkhukuzgapo ŵamwali.”

⁵Para ŵaEguputo ŵapulika kuti msumba wa Ture wapasuka, ŵati ŵasuzgike chomene na kuŵa na wofi.

⁶Yambukirani ku charu cha Tarishishi, tengerani imwe mukukhara mu mphepete mwa nyanja.

⁷Kasi uwu ndi msumba winu uwo mukakondwera nawo, uwo ukambika mu mazuŵa gha kale? Kasi ndi weneuwu uwo ukatumanga ŵanthu, kwambuka nyanja kuya kakhara ku vyaru vinyakhe.

⁸Kasi ndi njani uyo wakanozgekera cheneichi, kuti walimbane na Ture, msumba uwo ukaŵa wapachanya chomene? Ŵamalonda ŵakhe ŵakaŵa ŵakaronga, ŵanthu ŵakuzirwa ŵa charu cha pasi.

⁹FUMU Mwenenkhongono zose ndiyo yikanozgera cheneichi, kuti yikhizgire pasi uchindami uwo ŵakajikuzganga nawo, na kuŵayuyura wose awo mbakuzirwa pa charu.

¹⁰Imwe mwa ŵanthu ŵa charu cha Tarishishi, sono limaninge waka minda yinu nga mbaEguputo, pakuti malonda ghinu pa dowoko ghamara.

¹¹FUMU yarongora nkhongono yakhe pa nyanja, ndipo maufumu ghakhe ghatenthema. FUMU yapereka marango ghakususka charu cha Kanani, ghakuti malinga ghakhe ghapankhurike.

¹²FUMU yikayowoyaso yikati, “Imwe ŵakutindiŵizgika ŵa msumba wa Sidoni, kuti muti mukondwereso chara. Nangauli mungachimbilira ku charu cha Kipuro, kwenekura nako mwamkuŵa na mutende chara.”

¹³Wonani ivyo ŵaAsiriya ŵachita ku charu cha Babuloni. Ŵachirotokera na kuparanya nyumba yose ya ufumu mu charu chira. Iwo ŵazgora msumba wa Babuloni kwakukhara vikoko vya mu thengere. Iwo ŵakazenga vigongwe vyawo vya nkhondo, ŵakawiskira pasi malinga gha msumba na kuwuzgora kuŵa mahami.

¹⁴Tengerani, imwe mukwendeska ngaraŵa za ku Tarishishi, pakuti malinga ghinu ghabwanganduka.

¹⁵Nyengo yiti yizenge apo msumba wa Ture uti uruwike pa virimika 70, nyengo iyo yikuyana waka na umoyo wa karonga yumoza. Pamanyuma pa virimika 70 ivi, msumba wa Ture wamkuŵa nga ndi mwanakazi muzaghali mweneuyo wakwimbika mu sumu yakuti,

¹⁶“Tora chiding'indi ndipo wendendeke mu msumba, iwe mwanakazi muzaghali wakuruwika. Yimba mwakunozga, yimba sumu zinandi mwakuti ŵanthu ŵakukumbuke.”

¹⁷Pakumara pa virimika 70 FUMU yizamkuwukumbuka msumba wa Ture. Wizamkwambaso mlimo wakhe wakuchita uzaghali na maufumu ghose gha charu cha pasi.

¹⁸Ndipouli chandulo chakhe na vyakusanga vinyakhe vya pa malonda ghakhe, wizamkuvipatuliskira FUMU. Kuti vizamkusungika panji kuwunjikika waka chara, kweni vizamkuperekeka ku ŵanthu awo ŵakusopa FUMU kuti ŵagule chakurya chinandi na vyakuvwara viweme.