Read new_tumbuka_bible Yesaya 24 Bible Online

Yesaya 24 - new_tumbuka_bible bible

Yesaya 24

¹Nadi, FUMU yizamkupankhura charu cha pasi, na kuchizgora charu cha mapopa. Yiti yichibwangandule, na kumbininiska awo ŵakukharamo.

²Ŵanthu wose vizamkuŵachitikira kwakuyana waka. Ivyo vyamkuchitikira munthu waka ivyo vyamkuchitikira musofi. Ivyo vyamkuchitikira muzga, ndivyo vyamkuchitikira sekuru wakhe. Ivyo vyamkuchitikira muteŵeti-kazi, ndivyo vyamkuchitikira fumukazi yakhe. Ivyo vyamkuchitikira uyo wakugula, ndivyo vyamkuchitikira uyo wakuguliska. Ivyo vyamkuchitikira uyo wakubwereka, ndivyo vyamkuchitikira uyo wakubwerekeska. Ivyo vyamkuchitikira uyo wakukongora, ndivyo vyamkuchitikira uyo wakukongozga.

³Charu cha pasi chizamkupankhuka ndipo chizamkuŵavye na chilichose. Pakuti gheneagha, ndigho mazgu agho FUMU yayowoya.

⁴Charu cha pasi chikulira na kufota, charu chose chikusuzgika na kufota, ndipo mtambo ukusuzgika pamoza na charu cha pasi.

⁵Charu chakazuzgika na ŵanthu awo ŵakukharamo. Iwo ŵareka kupulikira marango, ŵanangira malangulo gha Chiuta ndipo ŵaswa phangano la muyirayira ilo iwo ŵakapangana.

⁶Ntheura charu chatembekera kumara, awo ŵakukhara mu charu ŵakusuzgika, chifukwa cha mauheni ghawo. Nadi awo ŵakukhara mu charu ŵakunyeka, ŵachoko waka ndiwo ŵati ŵakharengeko.

⁷Vinyo liphya likuzgeŵa, makuni gha mpheska ghakomira, wose awo ŵakasangwanga, sono ŵakutampha.

⁸Kulira kwakunozga kwa vimbitiku kwarekeka, kamphomezi ka awo ŵakasekereranga kamara, kulira kwakunozga kwa chiding'indi kwarekeka.

⁹Ŵanthu kuti ŵakwimbaso chara para ŵakumwa vinyo. Moŵa ukuŵaŵa ku awo ŵakuwumwa.

¹⁰Msumba wa chitimbaheti wabwangandulikira pasi. Nyumba yiliyose yajarika, mwakuti palije uyo wanganjiramo.

¹¹Ŵanthu ŵakulira mu misewu chifukwa vinyo kulije. Chimwemwe chose chamara, kusangwa mu charu kwamalirathu.

¹²Msumba wakhara mapopa, vipata vyabwangandulika na kuŵa mahami.

¹³Ntheura ndimo kwamkuŵira pa charu mu mafuko gha mu charu cha pasi. Kwakuyana waka nga ndi khuni la maolive para lapuruta, panji nga ndi kuvulura kwa mpheska para kuvuna kwamara.

¹⁴Ŵakukharako ŵizamkuchemerezga na kwimba mwakukondwa, ŵa ku manjiliro gha dazi, ŵizamkurumba uchindami wa FUMU.

¹⁵Ntheura imwe ŵa ku mafumiro gha dazi, rumbani FUMU, kuzgani zina la FUMU, Chiuta wa Israele, imwe mukukhara mu mphepete mwa nyanja.

¹⁶Kufumira ku mphererekezgo za charu, tikupulika ŵanthu ŵakwimba sumu zakurumba Chiuta ŵakuti, “Uchindami kwa Chiuta Murunji Yura.” Kweni ine nkhati, “Nkhumara ine! Nkhumara ine!” Soka kwa ine! Ŵaryarya ŵakuchitira mu uryarya, na uryarya wawo ŵakundendera mphiska.

¹⁷Imwe ŵanthu ŵa charu cha pasi, vinthu vyakofya, mbuna na vipingo, vikumulindirirani.

¹⁸Uyo wizamkuchimbira mphomezi ya vinthu vyakofya, wizamkuwira mu mbuna, uyo wamkukwera kufuma mu mbuna, wizamkukoreka na chipingo. Vidangazi vya kuchanya vyamkujurika na kurokweska vura yikuru, malufura gha charu ghamkusunkhunyika.

¹⁹Charu cha pasi chizamkusweka, charu chizamkugaŵikana, nadi chizamkusunkhunyika chomene.

²⁰Charu cha pasi chizamkupenthyapenthya, nga ndi munthu uyo waloŵera, Chizamkusunkhunyika nga ndi chigongwe, pakuputa kwa mphepo. Kwananga kwa ŵanthu kwachinyekezga charu, chikudodomera ndipo kuti chizamkuwukaso chara.

²¹Mu zuŵa leneilo, FUMU yizamkulanga ŵamazaza wose ŵa kuchanya, ndiposo na ŵakaronga ŵa pa charu cha pasi.

²²Iwo ŵizamkuwunjikika pamoza nga ndi ŵakayidi awo ŵali mu gadi la mdima. Ŵizamkujalirika mu gadi, ndipo pamanyuma pa mazuŵa ghanandi ŵizamkulangika.

²³Penepapo mwezi na dazi vizamkureka kuŵala chifukwa vyakhozgeka soni. Pakuti FUMU Mwenenkhongono zose ndiyo yizamkuwusa pa Phiri la Ziyoni na mu Yerusalemu. Yizamkurongora uchindami wakhe panthazi pa ŵararaŵarara ŵa ŵanthu ŵakhe.