Read new_tumbuka_bible Yesaya 25 Bible Online

Yesaya 25 - new_tumbuka_bible bible

Yesaya 25

¹Mwe FUMU, imwe ndimwe Chiuta wane, ine nditi ndimuchindikani na kurumba zina linu. Pakuti imwe mukuchita vinthu vyakuzizwiska, mwakugomezgeka na mu unenesko, vinthu ivyo mukanozgekera liro mwaka.

²Imwe mwazgora msumba kuŵa mulu wa mahami, msumba wa linga lakukhora kuŵa pharaniko. Nyumba zankhongono za ŵarwani ŵithu kuti ndi msumbaso chara, ndipo wizamkuzengekaso chara kwa muyirayira.

³Ntheura ŵanthu ŵankhongono, ŵizamkumuchindikani imwe FUMU, ŵankhaza awo ŵakukhara mu misumba ŵizamkumopani.

⁴Mwe FUMU, mwaŵa linga la munthu mukavu, linga ku musokwano uyo wali mu visuzgo. Mwaŵa malo ghakuphokweramo ku chimphupuru, ndiposo mufwiri ku chithukivu. Pakuti muvuchi wa awo mbankhaza, uli nga ndi chimphupuru icho chikutimba pa chiliŵa,

⁵uli nga ndi chithukivu mu charu chakomira. Imwe mukuchetamiska viwawa vya ŵanthu ŵalendo. Nga ndi umo chithukivu chikumalira na mufwiri wa bingu, ntheura ndimo sumu ya awo mbankhaza yizamkuchetamiskikira.

⁶Pa phiri leneili, FUMU Mwenenkhongono zose, yizamkunozgera mitundu yose chiphikiro cha vyakununa. Chamkuŵa chiphikiro cha vinyo liweme lambula visika, cha nyama ya mafuta na vinyo ilo lasujika makora.

⁷Pa phiri leneili FUMU yizamkuchinanga chibenekerero icho chabenekerera ŵanthu wose, chidiko icho chatandazgika pa mafuko ghose.

⁸FUMU Chiuta wizamkuvivya nyifwa kwa muyirayira. Iyo wizamkufyura masozi pa ŵanthu wose, wizamkuwuskako kulengeskeka kwa ŵanthu ŵakhe, mu charu chose cha pasi. Pakuti cheneichi ndicho FUMU yayowoya.

⁹Mu zuŵa leneilo, ŵanthu ŵizamkuyowoya kuti, “Nadi, uyu ndiyo Chiuta withu. Ise tikugomezga mwa iyo kuti watiponoskenge. Yeneiyi ndiyo FUMU mu yeneiyo tikugomezga. Ntheura tiyeni tikondwenge na kusekerera mu chiponosko chakhe.”

¹⁰Nkhongono ya FUMU yizamkuŵa pa phiri ili. ŴaMowabu ŵizamkutindiŵizgikira pasi mu malo agha, nga ndi umo mulu wa mapekesi ukukandikira pasi mu chizara cha ulongwe.

¹¹ŴaMowabu ŵizamkutandazga mawoko ghawo, nga ndi umo wakuchitira munthu uyo wakuskugha. Kweni FUMU yizamkukhizgira pasi kujikuzga kwawo, ndiposo na chose icho mawoko ghawo ghakuchita mu unkhwantha.

¹²FUMU yizamkugumulira pasi malinga ghawo ghatalighatali, yizamkughawiskira pasi, pa fuvu penecho.