Read new_tumbuka_bible Yesaya 26 Bible Online

Yesaya 26 - new_tumbuka_bible bible

Yesaya 26

¹Mu zuŵa leneilo sumu iyi yizamkwimbika mu charu cha Yuda: “Tili na msumba wakukhora. Chiuta wakwimika chiponosko, kuŵa chiliŵa na malinga ghakhe.

²Jurani vipata vya msumba, kuti fuko ilo likuchita urunji, leneilo likusungilira chigomezgo, linjire.

³Mwe FUMU mukuŵasunga mu mutende, ŵanthu awo ŵakugomezga imwe na mtima wawo wose, chifukwa ŵakugomezga mwa imwe.

⁴Gomezgani mwa FUMU nyengo zose pakuti FUMU Chiuta ndi Jarawe la muyirayira.

⁵Pakuti FUMU yikuyuyura awo ŵakukhara mu malo ghakukwera, yikugumulira pasi msumba wa pachanya. Yikuwuwiskira pasi skee, na kuwuponya pasi mu fuvu.

⁶Malundi ghakuwukandirizgira pasi, malundi gha awo mbakavu, malundi gha ŵasokwano.

⁷“Mwe FUMU, mukuzgora nthowa ya ŵarunji kuŵa yiweme, nthowa ya awo mbakunyoroka kuŵa waka skee.

⁸Nadi, Mwe FUMU, kwenda mu nthowa ya maweruzgo ghinu, ndicho ise tikugomezga. Kukumbuka zina linu, ndicho mitima yithu yikunwekera.

⁹Mtima wane ukunwekera imwe FUMU mukati mu usiku, mzimu wane mukati mwa ine ukumupenjani imwe chomene, chifukwa, para weruzgi winu wakunyoroka uli mu charu, ŵanthu awo ŵakukhara mu charu, ŵakusambira urunji.

¹⁰Para munthu muheni mwamurongora uchizi, iyo kuti wakusambira kuchita urunji chara. Mu charu cha ŵakunyoroka, iyo wakuchita uheni, wakuwona ufumunkhuru wa FUMU chara.

¹¹Mwe FUMU, nkhongono yinu yathumphuskika, kweni kuti ŵakuyiwona chara. Mwe FUMU, rekani ŵawone phamphu linu pa ŵanthu ŵinu, kuti iwo ŵalengeskeke. Moto winu uwo ulikunozgekera ŵarwani ŵinu uŵamyangure petu.

¹²Mwe FUMU, imwe ndimwe mukutipa ise mutende, vyose ivyo ise tavifiska, imwe ndimwe mwatichitira.

¹³Mwe FUMU, Chiuta withu, ŵanji ŵali kutuwusapo, kweni zina linu pera ndilo ise tikulichindika.

¹⁴Iwo sono ŵali kufwa, kuti ŵaŵengeso ŵamoyo chara. Iwo ndi mizguka waka, kuti ŵizamkuwukaso chara. Imwe mukaŵalanga pakuŵamara petu, nadi muli kuŵasisita kuti ŵareke kukumbukikaso.

¹⁵Kweni imwe, Mwe FUMU mwandaniska mafuko ghithu, nadi mwakuzgirako mafuko ghithu. Imwe mwajitorera uchindami, pakusanuzga mphaka za charu chithu.

¹⁶Mwe FUMU, mu visuzgo vyawo ŵakumupenjani, para mwaŵalanga, ŵakumurombani.

¹⁷Mwe FUMU, nga ndi mwanakazi wa nthumbo, uyo wakunyongozeka na kulira mu urwirwi wakhe para nyengo yakhe yaneng'enera, ntheura ndimo ise tikaŵira chifukwa cha imwe.

¹⁸Ise tikaŵa na nthumbo ndipo tikanyongozeka mu urwirwi. Kweni ise tikandurapo kanthu chara. Ise tilije kwizapo na chiponosko mu charu, tilije kubabiskapo ŵanthu ŵaphya mu charu chose cha pasi.

¹⁹Kweni ŵakufwa ŵinu ŵizamkuŵa na umoyo, mathupi ghawo ghizamkuwuka. Imwe mwagona mu madindi, wukani ndipo mwimbe sumu mwakukondwa. Nga ndi umo jumi likunyevyera charu, ntheuraso ndimo FUMU yizamkuwuskira awo ŵali kufwa.

²⁰Zaninge mwa ŵanthu ŵane, njirani mu nyumba zinu, ndipo jarani vijaro. Mubisame mwa kanyengo kachoko waka, mpaka ukari wakhe ujumphe.

²¹Wonani, FUMU yikwiza kufumira uko yikukhara, kuti yizakalange ŵa charu chifukwa cha kwananga kwawo. Charu chizamkuvumbula ndopa izo zikathikirapo, kuti chizamkubisaso awo ŵakakomeka chara.”