Read new_tumbuka_bible Yesaya 27 Bible Online

Yesaya 27 - new_tumbuka_bible bible

Yesaya 27

¹Mu zuŵa leneilo, FUMU yizamkutora lupanga lwakhe lwakuthwa, lukuru na lwa nkhongono kuti yilangire chikoko chakofya cha mu nyanja, chakuchimbira ndiposo na chakunyongoroka, ndipo yizamkuchikoma chikoko chakofya cha mu nyanja chira.

²Mu zuŵa leneilo, muyimbe za munda wa mpheska uweme kuti,

³“Ine FUMU ndine nkhusungilira munda uwu, nkhuwuthilira maji nyengo yose. Nkhuwulinda muhanya na usiku, kuti munthu yunji wareke kuwunanga.

⁴Ine ndilije ukari. Kuŵenge minga na mikolankhanga kuti virwe nane mphanyi ndawuka kuti ndirwe navyo, ndipo mphanyi ndavyochera pamoza.

⁵Panji ŵarekani ŵademerere kuti ndiŵathaske, ŵakhare nane mu mutende, nadi, ŵakhare nane mu mutende.”

⁶Mu mazuŵa agho ghakwiza, Yakhobe wizamkujintha nkhorozi, ŵaIsraele ŵizamkuphukira na kuŵala maluŵa, ndipo ŵati ŵazuzge charu chose cha pasi na vipambi vyawo.

⁷Kasi FUMU yikaŵalanga ŵaIsraele, nga ndi umo yikalangira awo ŵakaŵasuzganga? Kasi ŵaIsraele ŵakakomeka, nga ndi umo ŵakakomekera awo ŵakaŵakomanga?

⁸FUMU yikaŵalanga pakuŵachimbizgamo mu charu, na kuŵatorera ku charu cha umikori. Yikaŵafumiskamo na mphepo yakhe ya ukari, nga ndi mu nyengo ya kavuruvuru wa ku mafumiro gha dazi.

⁹Ntheura mwa cheneichi mrandu wa Yakhobe wizamkugowokereka, ndipo chipambi chenecho chakufumyira ubendezi wakhe chizamkuŵa ichi: para waswa mawe ghose gha majochero gha chiuta ngoza kuŵa nga ndi mawe ghakufukutuka, gheneagho ghaphwanyika tuchokotuchoko, para makuni ghakusoperapo Ashera na majochero gha vyakununkhira, vyamkuŵamoso chara.

¹⁰Msumba wa malinga wazgoka mayiyi, malo ghakurekeka na ghakuruwika, nga ndi mapopa. Kwenekura kwazgoka malo ghakuliskirako vyakuŵeta, uko vikupumulirako na kurya minthavi ya makuni.

¹¹Para minthavi yakhe yomira, yikuphyoka, ndipo ŵanakazi ŵakuyitora na kuyizgora nkhuni la moto. Pakuti aŵa ndi ŵanthu ŵambula kumanyiska. Ntheura uyo wakaŵalenga, kuti wizamkuŵa nawo na chiwuravi chara, Mlengi wawo kuti wizamkuŵalengera lusungu chara.

¹²Mu zuŵa ilo, FUMU yizamkusunkhunya charu kufuma ku mronga wa Yufurate mpaka ku mronga wa Eguputo na kuwunganya ŵanthu ŵakhe yumozayumoza.

¹³Mu zuŵa leneilo, mbata yikuru yamkulizgika kuchema ŵaIsraele wose awo ŵali kuzgeŵerekera ku umikori, ku charu cha Asiriya na ku Eguputo. Iwo ŵamkwiza na kuyilambira FUMU pa phiri lakupatulika mu Yerusalemu.