Read new_tumbuka_bible Yesaya 28 Bible Online

Yesaya 28 - new_tumbuka_bible bible

Yesaya 28

¹Soka ku ufumu ŵakujikuzga, wa ŵaloŵevu ŵa ku Efurayimu, na ku luŵa ilo likufota, utozi wa uchindami wakhe, msumba uwo uli kunena kwa dambo la vundira, weneuwo awo ŵaloŵera na vinyo ŵakujikuzga nawo.

²Wonani, FUMU yili nayo mweneuyo ngwa nkhongono ndipo nchinkhara. Iyo wizamkwiza nga ndi chimphupuru cha matalala, kavuruvuru wakunanga vinthu, nga ndi chigumura cha maji icho chikukukura vyose, ndipo wizamkuŵaponya pasi mwa nkhaza.

³Ufumu ŵakujikuzga wa ŵaloŵevu ŵa ku Efurayimu, wizamkukandikira pasi.

⁴Ntheura luŵa ilo likufota, utozi wa uchindami wakhe, msumba uwo uli kunena kwa dambo la vundira, uzamkuŵa nga ndi chipasi cha chikuyu chakudanga kuphya, pambere chihanya chindafike, cheneicho para munthu wachiwona, wakurya pa nyengo iyo chikufikira waka mu woko lakhe.

⁵Mu zuŵa leneilo, FUMU Mwenenkhongono zose, ndiyo yizamkuŵa mphumphu ya uchindami, ndiposo mphumphu yakutowa, ku ŵanthu ŵakhe ŵakukharako.

⁶FUMU ndiyo yamkuŵa mzimu wa weruzgi wakunyoroka, ku awo ŵakukhara mu mphara za weruzgi. Ndiyo yamkuŵa nkhongono, ku awo ŵakuwezga nkhondo, yichali yindafike pa chipata.

⁷Aŵa nawo wali penthyapenthya chifukwa cha vinyo, ŵakuŵa na chizgumbu chifukwa cha moŵa. Ŵasofi na nchimi ŵali penthyapenthya na moŵa, mbakutimbanizgika chifukwa cha kumwa vinyo, ŵali penthyapenthya chifukwa cha moŵa. Ŵakuvipulikiska makora chara, vinthu ivyo ŵakuviwona mu mboniwoni, ndipo ŵakutondeka kweruzga mirandu.

⁸Malo ghose agho ŵakuryerapo, ghali kuzura na mawukuzi pera, palije na malo ghambula kukazguka.

⁹Kasi Chiuta wasambizgenge njani mahara? Kasi uthenga uwu wawurongosorenge kwa njani? Kasi nkhu awo ŵali kureka kumwa mkaka, ŵeneawo ŵali kurumurika?

¹⁰Pakuti kwa iwo ndi marango waka, agho ghakurondezga dango pa dango, mzere pa mzere, mzere pa mzere, pano kusambizga pachoko waka, para napo pachoko waka.

¹¹Nadi Chiuta wizamkusambizga ŵanthu ŵakhe aŵa, kwizira mu ŵanthu ŵa kutali, ŵa chiyowoyero cha chilendo.

¹²Kwa ŵeneaŵa FUMU yikati, “Ichi ndicho chipumulo. Rekani ŵakuvuka ŵapumuliremo. Agha ndi malo ghakweghamirapo.” Ndipouli imwe mukakana kupulikira.

¹³Ntheura mazgu gha FUMU kwa iwo, ghamkuŵa marango gha waka, agho ghakurondezga dango pa dango, mzere pa mzere, mzere pa mzere, pano kusambizga pachoko waka, para napo pachoko waka, mwakuti iwo ŵendenge na kuwa chagada, na kuphyoka, ŵawire mu chipingo na kukoreka.

¹⁴Sono imwe ŵanthu ŵakugoska, mwaŵeneimwe mukuwusa ŵanthu ŵakhe mu Yerusalemu, pulikani ivyo FUMU yikuyowoya.

¹⁵Imwe mukujikuzga pakuyowoya kuti, “Ise tili kuchita phangano na nyifwa, tili kuzomerezgana na malo gha ŵakufwa. Para kulanga kwachikukura kukufika, kuti kwizamkutikhwaska chara, pakuti utesi taghazora kuŵa malo ghakuphokwerapo kwithu, ndipo kupusika kuŵa malo ghakubisamamo.”

¹⁶Sono ivyo FUMU Chiuta wakuyowoya ndi ivi: “Wonani, nkhuŵika libwe mu Ziyoni libwe leneilo ndakukhora, libwe lakuzirwa la nkhorezgero ya chingodya, kuŵa lufura lwenecho. Uyo wakugomezga libwe leneili kuti wati wasunkhunyike chara.

¹⁷Ine nditi ndizgore weruzgi wakunyoroka, kuŵa chingwe chakupimira, ndipo urunji kuŵa chakunyoroskera mizere. Matalala ghizamkupasula, icho mautesi ghakubisamamo, ndipo maji ghizamkuzura mu malo ghakubisamamo.

¹⁸Phangano linu na nyifwa lizamkuzgoka la waka, kuzomerezgana kwinu na malo gha ŵakufwa kwamkukhora chara. Para kulanga kwa chikukura kukufika, kwizamkumufyenyerani pasi.

¹⁹Nyengo yose apo kulanga uku kukujumpha, kwizamkumuyeghani, pakuti kwizamkujumpha mulenje uliwose, na muhanya ndiposo na usiku.” Para ŵanthu ŵapulikiska uthenga uwu, ŵizamkuŵa na wofi ukuru.

²⁰Pakuti chitara chiti chiŵe chifupi kuti munthu wathambalarepo, ndipo chakudika nacho chiti chiŵe chichoko kuti ŵadike.

²¹FUMU yamkurwa nkhondo, nga ndi umo yikarwera ku Phiri la Perazimu, yamkukaripa nga ndi umo yikakaripira ku dambo la Gibeyoni. Yizamkuchita nchito yakhe yeneiyo njakuzizwiska, na kuchita mlimo wakhe weneuwo ngwachilendo.

²²Sono rekani kuhoya mazgu gha Chiuta, mzire maunyoro ghinu ghakhozgeke chomene. FUMU, Chiuta Mwenenkhongono zose, waphara za languro lakhe, kuti pharaniko nda ŵanthu wose ŵa mu charu cha pasi.

²³Tegherezgani, ndipo mupulike mazgu ghane. Pulikizgani, ndipo mupulike ivyo nkhuyowoya.

²⁴Para mulimi wakulima kuti waseŵe, kasi wakurutilira waka kulima? Kasi wakurutilira waka kusinda na kupopota munda?

²⁵Para waskesketa munda wakhe, asi wakuseŵa munchesi panji chitoŵe? Asi wakupanda tirigu mu mizere, na nyauti mu malo ghakhe ndiposo na mbuto zinyakhe mu mphepete mwa munda wakhe?

²⁶Pakuti Chiuta wakhe ndiyo wakumurongozga, na kumusambizga umo wangapandira.

²⁷Munchesi kuti ukubulika na gareta lakubulira chara, nanga ndi chitoŵe nacho kuti chikubulika na mukombero wa gareta chara. Munchesi ukubulika na kakhuni, ndipo chitoŵe chikubulika na ndodo.

²⁸Mphuzi za tirigu zikugayika kuti muphike chingwa. Ntheura pakubula tirigu kuti ŵakurutirizga chara. Para ŵakubula tirigu na mikombero ya gareta na mahachi ghakhe, kuti ŵakuphwanya chara.

²⁹Vyose ivi vikufumira kwa FUMU Mwenenkhongono zose. Urongozgi wakhe ngwa kuzizwiska, ndipo vinjeru vyakhe nvyakufikapo.