Read new_tumbuka_bible Yesaya 29 Bible Online

Yesaya 29 - new_tumbuka_bible bible

Yesaya 29

¹Ariyele, Ariyele, soka kwa iwe, iwe msumba uwo Davide wakazengamo misasa. Sazgirako chirimika ku chirimika, viphikiro vichitikenge nyengo zose.

²Ndipouli msumba wa Ariyele nditi ndiwuŵike mu visuzgo. Kwizamkuŵa kulira na kutengera, ndipo msumba wizamkuŵa kwa ine nga ndi ng'anjo ya jochero la sembe.

³Ndizamkuwuzingirizga msumba na misasa, ndizamkuwujarizga na vigongwe, na kuŵika vibumira vya nkhondo.

⁴Iwe Yerusalemu uti ukhizgikire pasi ndipo uyowoyenge uku uli pasi. Mazgu ghawo ghati ghapulikikwe pasipasi kufuma mu fuvu. Mazgu ghako ghati ghafumire pasi nga ndi mazgu gha muzguka, ghaŵenge ghakupwerezgeka kufumira pasi pa fuvu.

⁵Kweni ŵarwani ŵako ŵanandinandi, ŵamkumwalalika nga ndi fuvu lakulipwitika, ndipo ŵanthu ŵankhaza ŵanandinandi, ŵamkubalalika nga ndi mwerero wakuputwa. Mu kanyengo kachoko waka, kwa mabuchibuchi,

⁶FUMU Mwenenkhongono zose yamkwiza, yamkwiza na chidudumira, na chindindindi, na mphomo yikuru. Yamkwiza na kavuruvuru, pamoza na chimphupuru, ndiposo na dimi la moto wakumyangura.

⁷Ŵasilikari ŵa mafuko ghose agho ghakurwa na Ariyele, wose awo ŵakurwa na msumba uwu, pamoza na malinga ghakhe na kuwuzingirizga, wose ŵizamkuzgeŵerekera nga ndi maloto, panji nga ndi mboniwoni ya usiku.

⁸Mizinda ya mitundu yinyakhe yose iyo yikurwa na Phiri la Ziyoni yizamkuŵa nga ndi munthu wa njara uyo wakulota kuti wakurya, ndipo para wakuwuka wakupulika kuti njara yichali waka, panji nga ndi munthu wa nyota uyo wakulota kuti wakumwa maji, ndipo wakuwuka wakomirwa, na kupulika kuti nyota yichali waka.

⁹“Mujizerezeske mwekha kuti muŵe ŵakuzerezeka. Jiburumutizgani mwekha kuti muŵe vinthuru. Muŵe ŵakuloŵera, kweni na vinyo chara. Muŵe ŵakupenthyapenthya, kweni na moŵa chara.

¹⁰Pakuti FUMU yapungulira pa imwe, mzimu wa tulo tuzitu. Wajara maso ghinu, imwe nchimi, wamudikiskani ku mitu yinu, imwe ŵawoni.”

¹¹Pakuti mboniwoni ya vyose ivi yaŵa kwa imwe nga ndi mazgu gha mu buku ilo lamatika. Usange buku ilo laperekeka ku munthu wakumanya kuŵazga na languro lakuti, “Ŵazga,” iyo wizamkuzgora kuti, “Ndingaŵazga chara pakuti ndakumata.”

¹²Panji usange laperekeka kwa uyo wandamanye kuŵazga na languro lakuti, “Ŵazga,” iyo wizamkuzgora kuti, “Ndilije kumanya kuŵazga.”

¹³Fumu yikati, “Ŵanthu aŵa ŵakwiza kwa ine na mazgu pera, ndipo ŵakundichindika na milomo yawo pera, kweni mitima wawo yili kutali na ine. Kundilambira kwawo nkhwa waka, ndi marango gha ŵanthu agho ŵakughasambira waka pa mtima.

¹⁴Pa chifukwa ichi nditi ndiŵazukumiske, na vyakuzizwiska na vya minthondwe vinandinandi. Vinjeru vya ŵanthu ŵa vinjeru vizamkumara, umanyi wa ŵanthu ŵawo ŵakuchenjera ŵizamkubisika waka.”

¹⁵Soka ku awo ŵakubisa chomene ivyo ŵakunozgera kuchita, kuti FUMU yireke kuvimanya, ŵeneawo ŵakuchita milimo yawo mu mdima. Iwo ŵakughanaghana kuti, “Ndi njani wakutiwona ndipo ndi njani wakutimanya?”

¹⁶Imwe mukugadabula vinthu. Kasi muwuvi wangayana waka na dongo? Kasi icho chapangika chingayowoya kwa uyo wachipanga kuti, “Iwe kuti ndiwe ukandipanga chara.” Panji chiŵiya, kasi chingayowoya kwa muwuvi kuti, “Icho ukuchita kuti ukuchimanya chara.”

¹⁷Asi kwakhara kanyengo kachoko waka, apo nkhorongo ya Lebanoni, yamkuŵa charu cha nyata yiweme, ndipo charu cha nyata yiweme, chamkuŵa nga ndi thengere.

¹⁸Mu zuŵa ilo ŵakumangwa makutu, ŵizamkupulika mazgu gha mu buku, ndipo ŵachiburumutira awo ŵali mu mdima wa bii, ŵizamkulaŵiska.

¹⁹Awo ŵakujiyuyura ŵizamkusekerera mwa FUMU, ndipo ŵanthu awo mbakavu ŵizamkusekerera, chifukwa cha Mutuŵa Yura wa FUMU.

²⁰Ŵanthu awo mba nkhaza ŵizamkumara, ŵakugoska ŵanyawo ŵizamkuzgeŵerekera, ndipo wose awo ŵakunwekera kuwona uheni, nawo ŵizamkumara petu.

²¹Chiuta wizamkulanga awo na mazgu ghawo ŵakupacha munthu wambula kafukwa kuti wali na mrandu, ndiposo na awo ŵakupuruska munthu uyo wakuchenya pa mrandu. Wizamkulangaso awo ŵakupereka ukaboni wa utesi kuti ŵambula kafukwa ŵeruzgike nga ŵali na mrandu.

²²Ntheura FUMU, Iyo yikawombola Abrahamu, yikuti ku mbumba ya Yakhobe: “Yakhobe kuti waŵengeso na soni chara, nanga ndi chisko chakhe kuŵa cha chitima.

²³Pakuti para wakuŵawona ŵana ŵakhe mukati mwawo, ŵeneawo ndi mlimo wa mawoko ghane, wizamkuchindika zina lane Lituŵa. Ŵizamkumanya utuŵa wakhe wa Mutuŵa Yura wa Yakhobe, ndipo ŵizamkuŵa na wofi na Chiuta wa Israele.

²⁴Ndipo awo ŵakupuruka mu mzimu, wizamkupulikiska, awo ŵakusinginika ŵizamkusambizgika.”