Read new_tumbuka_bible Yesaya 3 Bible Online

Yesaya 3 - new_tumbuka_bible bible

Yesaya 3

¹Wonani, Chiuta, FUMU Mwenenkhongono zose, wali pafupi kuwuskamo mu Yerusalemu na mu charu cha Yuda, wovwiri wa mtundu uli wose uwo ŵanthu ŵakugomezga. Wizamkuwuskamo chakurya chose na maji ghose.

²Wizamkuwuskamo ngwazi na vinkhara vya nkhondo, ŵeruzgi na nchimi, ŵakuroska na ŵararaŵarara ŵawo.

³Wizamkuwuskamo ŵarongozgi ŵa ŵasilikari 50 na ŵanthu ŵakuchindikika, ŵakovwira pa mrandu na ŵamayere, ndiposo na nkhwantha pakupanga vinthumwa.

⁴Ndizamkuŵazgora ŵasepuka kuŵa ŵakaronga ŵawo twabonda ndito tuŵawusenge iwo.

⁵Ŵanthu ŵamkutindiŵizgirana pasi. Munthu yumoza ŵamkutindiŵizga munthu munyakhe, muzengezgani wamkutindiŵizga muzengezgani munyakhe. Ŵawukirano ŵamkujikuzga pa ŵararaŵarara, ndiposo vichwapi vyamkujikuzga pa ŵanthu ŵakuzirwa.

⁶Munthu wamkukora mwana munyakhe, mu mbumba ya wiske na kuti kwa iyo, “Iwe uli na chakuvwara, sono uti uŵe murongozgi withu, ndipo mulu wa mahami uwu, ndiwo uti uwuwusenge.”

⁷Kweni mu zuŵa leneilo iyo wizamkuzgora kuti, “Ine kuti ndingakuchizga chara. Mu nyumba yane ndilije chakurya panji chakuvwara. Mureke kundimika ine kuŵa murongozgi wa ŵanthu.”

⁸Nadi, Yerusalemu wapasuka, charu cha Yuda chikuwa. Ivyo ŵanthu ŵakuyowoya na nchito izo ŵakuchita, ndi vya kutuka FUMU pera. Ntheura ŵakuderera uchindami wa Chiuta.

⁹Kutemwera kwawo kukuŵapanikizgira iwo. Ŵakwananga pakweru nga ndi ŵanthu ŵa mu Sodomu, kuti ŵakubisa chara. Soka kwa iwo, chifukwa ŵajitorera pharaniko pa iwo ŵenecho.

¹⁰Uŵaphalire ŵarunji kuti vyose vyamkuŵaŵira makora, pakuti ŵizamkurya vipambi vya milimo yawo.

¹¹Soka kwa ŵanthu awo ŵakuchita uheni, pharaniko liti liŵenge pa iwo. Chiheni icho ŵakachita ku ŵanyakhe, ndicho chichitikenge kwa iwo.

¹²Imwe ŵanthu ŵane, ŵanichi ndiwo ŵakumutindiŵizgani, ŵanakazi ndiwo ŵakumuwusani. Mwe ŵanthu ŵane, ŵarongozgi ŵinu ndiwo ŵakumupuruskani, ŵakutimbanizga nthowa zinu.

¹³FUMU yakhara pa malo ghakhe mu mphara ya mirandu, kuti yeruzge mirandu ya ŵanthu ŵakhe.

¹⁴FUMU yamba kweruzga mirandu, ghakususka ŵararaŵarara na ŵarongozgi ŵakhe. FUMU yikuŵasuska yikuti, “Imwe ndimwe muli kunanga munda wane wa mpheska. Ivyo muli kwiba ku ŵakavu, vili mu zinyumba zinu.

¹⁵Kasi mukung'anamulachi, pakuŵatindiŵizga ntheura ŵanthu ŵane, na pakuŵayuzgayuzga ŵakavu?” Ntheura ndimo FUMU Mwenenkhongono zose yikuyowoyera.

¹⁶FUMU yikati, “Ŵanakazi ŵa mu Yerusalemu mbakujikuzga, ŵakwenda uku singo zawo zili nyoronyoro, maso ghawo ghali ŵiruŵiru. Pakwenda ŵakuti binyubinyu, uku ŵakulizga vibangili mu malundi ghawo.

¹⁷Pa chifukwa ichi, Fumu yizamkuŵameta mipara ŵanakazi ŵa mu Ziyoni, ndipo FUMU yizamkuŵendeska nkhule.”

¹⁸Mu zuŵa ilo Fumu yizamkuŵavura ŵanakazi ŵa mu Yerusalemu vibangili ivyo ŵakuvwara mu malundi ghawo, mathauro ku mitu yawo na majuda mu singo zawo.

¹⁹Yizamkuŵavura ndewerewe mu makutu ghawo, vingwenjere mu mawoko ghawo na salu zakuzinga mu singo.

²⁰Yizamkuŵavura maduku gha ku mutu, mabangili, salu zamanyanda, tumabotolo twa mafuta na vinthumwa,

²¹mphete za chidindo, na mphete za mu mphuno,

²²malaya gha pa viphikiro, vidiko, vilundu, na vikwama.

²³Yizamkuŵavura malaya gha usikiti, malaya gha bafuta, vilemba, na vidiko.

²⁴Mu malo mwa mafuta ghakununkhira, pizamkuŵa kununkha. Mu malo mwa lamba, ŵizamkuvwara mukusa. Mu malo mwa sisi liweme, ŵizamkuŵa na mupara. Mu malo mwa munjilira wakudula, ŵizamkuvwara vigudulu. Mu malo mwa kutowa, ŵizamkukhozgeka soni.

²⁵Ŵasilikari ŵinu ŵizamkukomeka na lupanga, vinkhara vyinu navyo vizamkukomeka mu nkhondo.

²⁶Vipata vyakhe vizamkutengera na kulira. Msumba wa Ziyoni wizamkubwanganduka ndipo wizamkuŵavye ŵanthu.