Read new_tumbuka_bible Yesaya 30 Bible Online

Yesaya 30 - new_tumbuka_bible bible

Yesaya 30

¹FUMU yikuti, “Soka kwa awo mbachigaruka, ŵeneawo ŵakuchita ivyo ŵanozgera, kweni kuti nvya ine chara, awo ŵakuchita mapangano gha ubwezi, kweni kuti ndi khumbo lane chara, mwakuti ŵasazgireko kwananga pa kwananga.

²Iwo ŵakuruta ku charu cha Eguputo, kwambula kufumba urongozgi wane. Ŵakupenja wovwiri kwa Faro kuti waŵavikirire, ndipo ŵakupenja chiphokwero mu mufwiri wa charu cha Eguputo.

³Kweni chivikiriro cha Faro chizamkuŵakhozga waka soni, chiphokwero mu mufwiri wa charu cha Eguputo chizamkuŵa kulengeskeka kwawo.

⁴Nangauli ŵali na ŵimiliri ku Zowani, ndipo nthumi zawo nazo zafika mu msumba wa Hanesi,

⁵ndipouli wose ŵizamkukhozgeka soni, chifukwa cha awo ŵakaŵa na chandulo chara. Ŵanthu aŵa kuti ŵamkuŵavwira chara, panji nesi kusanga chandulo kufuma kwa iwo, kweni kukhozgeka waka soni na kulengeskeka.”

⁶Agha ndi mazgu gha Chiuta ghakuchima vya vinyama vya ku chiparamba ku mwera: “Pakuporota mu charu cha visuzgo na cha vyakuŵinya, umo muli nkharamu zanarume na zanakazi, ndiposo na njoka za chipiri na njoka zinyakhe zakuduka, imwe mukuyegha usambazi winu pa zimbunda, ndiposo na vyuma vyinu pa ngamila, na kuruta navyo ŵanthu awo ŵalije kumanya kuchita navyo chandulo.

⁷Wovwiri kufuma mu charu cha Eguputo ngwawakawaka Ntheura charu cha Eguputo ndachithya zina lakuti, ‘Rahabu uyo wakukhara waka.’ ”

⁸FUMU yikati kwa ine, “Sono rutanga ukaghalembe mazgu agha, pa mawe ghapapati uku ŵanthu ŵakuwona, ndipo ukaghalembe mu buku, mwakuti mu mazuŵa agho ghakwiza, ghizakaŵe ukaboni kwa muyirayira.

⁹Ukalembe kuti, ‘Ŵanthu aŵa mbachigaruka, ndi ŵana ŵatesi, ŵana awo kuti ŵakukhumba chara kupulika marango gha FUMU.’

¹⁰Iwo ŵakuti ku ŵawoni, ‘Mureke kuwonaso mboniwoni.’ Ndipo ku nchimi ŵakuti, ‘Mungachimanga kwa ise ivyo ndi vyakunyoroka, mutiyowoyerenge vinthu ivyo vikutikondweska, muchimenge ivyo kuti ndi vyenecho chara.’

¹¹Fumanimo mu nthowa, patukirani ku mphepete. Tikukhumba chara kutitimbanizga, pakupulika vya Mutuŵa Yura wa Israele.”

¹²Ntheura Mutuŵa Yura wa Israele wakuti, “Pakuti mwe mukukana mazgu agho nkhuyowoya, na kugomezga kutindiŵizga ŵanthu na kuchita maubendezi,

¹³kwananga uku kuŵenge kwa imwe, nga ndi chiliŵa chitali chakusweka na kusendemuka, icho chingawa mwa mabuchibuchi.

¹⁴Chiti chisweke nga ndi chiŵiya cha muwuvi, icho chikusweka uheni chomene, ndipo madengere ghakhe, palije na limoza ilo likuwoneka makora, ilo munthu wangatora kuti wapalirepo moto kufuma pa ziko, panji kunegherapo maji kufuma mu chisimi.”

¹⁵FUMU Chiuta, Mutuŵa Yura wa Israele wakuti, “Para mukuzgoka mtima na kupumula, muti muponoskeke. Mu kukhara chete kwinu pamoza na kugomezga kwinu, ndivyo viŵenge nkhongono yinu. Kweni imwe kuti mukakhumba chara.

¹⁶Kweni imwe mukuti, ‘Chara! Ise titi tende luŵiro pa ŵakavalo.’ Ntheura muti muchimbirenge nadi na kuruta. Imwe mukutiso, ‘Ise titi tikwerenge pa ŵakavalo ŵakuchimbira luŵiro.’ Ntheura nadi, kweni awo ŵamuchimbizganinge, ŵati ŵachimbirenge chomene kuruska imwe.

¹⁷Ŵanthu 1,000 ŵamkuchimbira, para murwani yumoza waŵawofya. Para ŵarwani ŵankhonde ŵamofyani, mose mwakuchimbira. Awo ŵamkukhara, ŵamkuŵa nga ndi khuni, lakupayikapo ndembera pa phiri, panji nga ndi nchimanyikwiro pachanya pa kaphiri.”

¹⁸Ndipouli FUMU yikunweka kuŵa na lusungu na imwe, njakunozgeka kuŵa ya uchizi kwa imwe. Pakuti FUMU ndi Chiuta wa weruzgi wakunyoroka. Mbakutumbikika wose awo ŵakugomezga mwa iyo.

¹⁹Imwe mwa ŵanthu ŵa mu Ziyoni mwaŵeneimwe mukukhara mu msumba wa Yerusalemu, kuti mwizamkuliraso chara. FUMU yiŵenge ya uchizi na imwe para muti mulirire kwa iyo. Para yiti yipulike waka, yiti yichedwenge chara kumuzgorani.

²⁰Nangauli Fumu yimupaninge visuzgo na vitima kuŵa chakurya na chakumwa chinu, kweni ŵasambizgi ŵinu kuti ŵizamkujibisa chara. Imwe mwizamkuŵawona na maso ghinu.

²¹Para mukupatukira ku maryero panji ku mazere, mwizamkupulika mazgu kumanyuma zinu kuti, “Nthowa ndi iyi, mwende mwenemumo.”

²²Penepapo mwizamkuvizgora vikozgo vyinu vyakuŵaja ivyo muli kuviphaka siliva na golide kuŵa vya ukazuzi, ndipo mwizamkuvitaya nga ndi vyamwikho pakuyowoya kuti, “Vyose ivi vifumepo.”

²³Ndipo FUMU yizamkutuma vura kuti yimezge mbewu zinu izo mukupanda mu minda yinu. Mwamkuŵa na vyakurya viweme na vyakuzara ivyo vyamkufuma mu minda yinu, ndipo mu zuŵa leneilo, vyakuŵeta vyinu vizamkurya mu maluhari ghasani.

²⁴Nkhaŵi na mbunda izo zikulima zamkurya vyakurya viweme vyakurungako muchere vyeneivyo ŵawuskako gaga na lupetero na chakuwuruskira viswaswa.

²⁵Mu zuŵa leneilo vigongwe na misasa ya ŵarwani vizamkupokeka ndipo ŵasilikari ŵawo ŵanandi ŵizamkukomeka. Tumironga twa maji kufuma ku mapiri ghatali na ghachoko twamkwendanga.

²⁶Mwezi wizamkuŵara nga ndi dazi ndipo dazi nalo lizamkuŵara chomene kuruska kankhonde na kaŵiri kwa kuŵala kwa zuŵa limoza, para FUMU yakaka na kupozga vilonda vya ŵanthu ŵakhe ivyo iyo yikachitiska para yikaŵalanganga.

²⁷Wonani, FUMU, yikwiza kufuma kutali, na ukari uwo ukugolera, mukati mu josi linandi ilo likutoroka. Milomo yakhe njakuzura na ukari, ndipo lulimi lwakhe lukulingana na moto wakumyangura.

²⁸Muvuchi wakhe uli nga ndi mronga wakufurukira, weneuwo ukukwera mpaka mu singo. Iyo yikwiza na sefa ya pharaniko kuti yisunkhunye mitundu yinyakhe, na kuŵika kachisulo kakupuruska mu njegheyeghe za ŵamitundu.

²⁹Kweni imwe ŵanthu ŵa Chiuta, mwizamkukondwa na kwimba sumu, nga ndi umo mukuchitira na usiku pa chiphikiro chakupatulika. Mwizamkufwasa nga ndi ŵanthu awo ŵakwenda uku ŵakwimba fyoliro, mukuruta ku phiri la FUMU, ilo ndi Jarawe la Israele.

³⁰FUMU yizamkuchita kuti mazgu ghakhe ghakofya ghapulikikwe, ndipo yizamkuchita kuti ŵanthu ŵawone nkhongono ya woko lakhe. Iyo yikwiza na ukari wakulanga kwa dimi la moto wakusakaza, ŵaleza, chimphupuru na matalala.

³¹Mazgu gha FUMU ghizamkuŵaparanya ŵaAsiriya ndipo na ndodo yakhe yizamkuŵalanga.

³²Apo FUMU yamkulanga ŵarwani aŵa, ŵanthu ŵakhe ŵamkwimbanga na viding'indi na ŵakalimba. Chiuta iyomwene ndiyo wamkurwa na Asiriya.

³³Pakuti malo ghakhe ghakochera vinthu ghali kunozgeka kale. Nadi malo ghakocheramo karonga wa charu cha Asiriya ghali kunozgeka. Malo gheneagho ngakuzongoka na ghasani ndipo muli moto na khuni zinandi. Muvuchi wa FUMU ukugorezga mulu ura nga ndi mronga wa sulufure.