Read new_tumbuka_bible Yesaya 32 Bible Online

Yesaya 32 - new_tumbuka_bible bible

Yesaya 32

¹Kunthazi, karonga yunji wizamkuwusa mu urunji, ndipo nduna zakhe zizamkweruzganga mwakunyoroka.

²Munthu waliyose wizamkuŵa nga ndi msasa wakubisamamo mphepo, na malo ghakuchimbilirako kufuma ku chimphupuru. Wizamkuŵa nga ndi tumironga mu malo gha chinkhamwa, ndiposo nga ndi mufwiri wa jarawe likuru mu charu chomizo.

³Penepapo awo ŵakulaŵiska, maso ghawo kuti ghizamkujarika chara, ndipo awo ŵakupulika, makutu ghawo ghizamkutegherezga.

⁴Ŵanthu ŵa mtima wakuchitira vinthu mu luŵiro, ŵizamkuŵa na keruzgiro kaweme. Ndipo awo ŵakuyowoya na chikwikwi, ŵizamkuyowoya makora na kupulikikwa.

⁵Munthu uyo nchindere kuti wizamkuyowoyekaso kuŵa wakuzirwa chara, ndipo wa nkharo yiheni kuti wizamkuchindikikaso chara.

⁶Pakuti uyo nchindere wakuyowoya vya uchindere, mtima wakhe ukunozgera kuchita ubendezi pera. Ivyo wakuchita nvya ukazuzi, ndipo mazgu agho wakuyowoya ngaheni kwa FUMU. Awo ŵali na njara kuti wakuŵapa chakurya chara, nanga nkhuŵapa maji ghakumwa awo ŵali na nyota.

⁷Machitiro gha munthu muheni ngaheni. Iyo wakunozgera kuchita viheni pera, mwakuti waparanye awo mbakavu na mazgu gha utesi, nangauli ivyo ŵakavu ŵakuromba nviweme.

⁸Kweni muweme wakughanaghana vinthu vya unthu, ndipo mu vinthu vya unthu ndimo wakwimilira.

⁹Wukani, mupulike mazgu ghane, mwa ŵanakazi imwe mwafwasa. Tegherezgani na makutu ghinu ku ivyo nkhuyowoya, mwa ŵanakazi ŵambula kupwererako.

¹⁰Mu nyengo ya kujumpha waka chirimika chimoza, mwizamkutenthema imwe ŵanakazi, mwaŵeneimwe muli mu kufwasa. Pakuti kuvuna mpheska kwizamkutondeka, ndipo kuvuna vipambi kwizamkuŵavye.

¹¹Tenthemani, imwe ŵanakazi ŵambula kupwererako, mbwambwanthani, mwaŵeneimwe mwakhara mwakufwasa. Vurani vyakuvwara vyinu, muvware vigudulu mu viwuno vyinu.

¹²Jitimbani pa vifuŵa vyinu kurongora chitima, chifukwa cha minda yiweme iyo yanangika, chifukwa cha mpheska zakupambika izo zanangika,

¹³chifukwa cha charu cha ŵanthu ŵane, cheneicho mwamera minga na nthura. Nadi, lirani chifukwa cha nyumba zose mwenemumo ŵanthu ŵakakondwanga, ndiposo na msumba umo mukaŵa chimwemwe.

¹⁴Nyumba ya ufumu yizamkurekeka, msumba wa ŵanthu ŵanandinandi wizamkusidika. Malinga na chigongwe cha ŵalinda, vizamkuzgoka vimphanji kwa muyirayira. Ŵaboli ŵizamkukondwa mwenemumo, vyakuŵeta vizamkusanga luhari mwenemumo.

¹⁵Ichi chizamkuŵa ntheura, mpaka Chiuta wizakapungulire Mzimu wakhe, pa ise kufuma kuchanya, ndipo charu cha mapopa chizakazgoke, kuŵa charu cha nyata yiweme, ndiposo munda wakupambika chomene, wizakaŵe nga ndi nkhorongo.

¹⁶Penepapo mu charu chose, mwizamkuŵa ŵeruzgi wakunyoroka, kufuma ku mapopa mpaka ku minda ya nyata yiweme.

¹⁷Pakuti chipambi cha urunji chizamkuŵa mutende, ndipo chifukwa cha urunji, ŵanthu ŵizamkukhara mu kufwasa na mu chigomezgo kwa muyirayira.

¹⁸Ŵanthu ŵa Chiuta ŵizamkukhara mu vikaya umo muli mutende, muvikaya umo muli chivikiriro, ndiposo bata kwambula kutimbanizgika.

¹⁹Thengere lizamkumara na matalala, ndipo msumba wizamkubwanganduka wose skee.

²⁰Ŵakutumbikika mwamkuŵa imwe, mwaŵeneimwe mwamkupanda mbewu zinu, mu mphepete mwa mironga, ndipo mwamkuliskanga ng'ombe na mbunda zinu mu wanangwa.