Read new_tumbuka_bible Yesaya 33 Bible Online

Yesaya 33 - new_tumbuka_bible bible

Yesaya 33

¹Soka kwa iwe ukukoma, wa mweneiwe undakomekepo. Soka kwa iwe wa mupusikizgi, wamweneiwe na yumoza wandakupusikepo. Para iwe wamara kukoma, ndipo iwe wizamkukomeka. Para iwe wareka kupusika, ndipo iwe wizamkupusikika.

²Mwe FUMU, muŵe na lusungu na ise, ise tikumulindirirani. Muŵenge nkhongono zithu mulenje uliwose, Muponoski withu mu nyengo ya visuzgo.

³Para imwe mwadudumira na mazgu ghinu, ŵamitundu ŵakuchimbira, para imwe mwarongora ukuru winu, mitundu yinyakhe yikumbininika.

⁴Ŵanthu ŵakuwunjika vyakuskogha nga ndi umo mphazi zikuchitira. Ŵanthu ŵakudukirapo pa vyakuskogha nga ndi umo zombe wakuchitira.

⁵Yichindikike FUMU pakuti yikukhara kuchanya. Yamkuzuzga msumba wa Ziyoni, na weruzgi wakunyoroka ndiposo na urunji.

⁶Ndiyo yizamkumupani chimango pa nyengo yinu, ndipo yizamkumupaniso chiponosko chakuzara, mahara ghanandi na vinjeru vinandi. Kopa FUMU ndicho chuma chinu.

⁷Wonani vinkhara vyawo vya nkhondo, vikuchemerezga mu misewu, nthumi zakuŵika mutende zikulira chomene.

⁸Mu misewu ya mu misumba muli yii, mulije munthu wakwendamo. Mapangano agho ghakaŵako ghasweka, ŵakaboni nawo ŵayuyurika, palije na yumoza uyo wakughanaghanika.

⁹Charu chikomira na kuya kukumara, nkhorongo ya Lebanoni yikulengeskeka na kufota. Dambo la Sharoni lomira nga ndi chiparamba, ndipo nkhorongo ya Bashani na ya pa Phiri la Karimele yikupuruta.

¹⁰FUMU yikuti, “Sono nditi ndichitengepo chinthu chinyakhe, sono nditi ndirongorenge nkhongono yane ndipo nditi ndichindikike chomene.”

¹¹Imwe mukughanaghana vyawakawaka, ndipo ivyo mukuchita nvyambula chandulo. Ivyo vikufuma mwa imwe vili nga ndi moto uwo ukumumyangurani mwaŵene.

¹²Ŵanthu ŵizamkunyeka na kuzgoka utoto, ŵizamkuŵa minga yadumulika kuti yocheke pa moto.

¹³Imwe mukukhara kutali, muchipulike icho ndachita, ndipo imwe mukukhara pafupi, muzimanye nkhongono zane.

¹⁴Mu Ziyoni ŵanthu ŵakwananga ŵakopa, Awo ŵakureka kopa Chiuta ŵakutenthema. Iwo ŵakuti, “Kasi ndi njani mwa ise, wangakhara mu moto wakumyangura? Kasi ndi njani mwa ise, wangakhara mu moto wakugolera kwa muyirayira?”

¹⁵Munthu uyo wakwenda mu urunji na kuyowoya icho ncha urunji, uyo wakukana chandulo pa ŵanthu ŵakunyekezgeka, uyo wakukanizga mawoko ghakhe mzire ghapokerere vimbundi, uyo wakujara makutu ghakhe kuti wareke kupulika, mazgu ghakupangana za kuthiska ndopa, ndiposo na uyo wakujara maso ghakhe mwakuti ghareke kuwona viheni,

¹⁶mweneuyo ndiyo wamkukhara pa malo ghapachanya. Malo ghakhe gha chivikiriro, ndi malinga gha mu zimphanji. Chakurya wizamkupokeranga, ndipo maji ghakumwa nagho ghakuŵa ghanandi.

¹⁷Mu nyengo yeneiyo, mwizamkumuwona karonga mu uchindami wakhe, mwizamkuwona charu icho nchisani.

¹⁸Mu maghanoghano ghinu, mwizamkulanguruka na icho nchakofya. Imwe mwizamkuti, “Kasi nduna yikuru yili nkhu? Kasi uyo wakasonkheskanga msonkho wali nkhu? Kasi murongozgi wa vigongwe wali nkhu?”

¹⁹Mwizamkuŵawonaso chara ŵanthu ŵa msinjiro aŵa, ŵeneawo kayowoyero kawo nkhanonono kukapulikiska. Iwo ŵakuyowoya na lulimi lwa chikwikwi lweneulo munthu wangapulika chara.

²⁰Laŵiskani mu Ziyoni umo tikuchitiramo viphikiro vyithu vyakwimikika. Maso ghinu ghati ghawone Yerusalemu, msumba umo muli mutende, hema lambula kusezgeka. Vikhomo vyakhe kuti vyamkuzgurika chara, nanga vingaŵa vingwe vyakhe.

²¹Kwenekura FUMU, mu ufumunkhuru wakhe, yizamkuŵa kwa ise, nga ndi malo gha mironga yisani na tumironga tusani, mwenemumo vyombo vya nkhafi kuti vingarutako chara, nanga ndi ngaraŵa zikuruzikuru kuti zingendamo chara.

²²Pakuti FUMU ndiyo mweruzgi withu, ndiyo yikutipa marango, ndiyo yikutiwusa ndipo yikutiponoska.

²³Vingwe vya mu ngaraŵa zinu vyagowozgeka, vilije kumanya kukhozga mulongoti mu malo ghakhe, nanga ndi kughatandaula mathanga. Penepapo mphango zinandi zizamkugaŵika, ndipo nanga mbakupendera ŵizamkutorapo vyakuskogha ivi.

²⁴Kwamkuŵavye na yumoza mu Ziyoni wamkuyowoya kuti, “Ine nkhurwara.” Awo ŵakukhara mwenemumo, zakwananga zawo zizamkugowokereka.