Read new_tumbuka_bible Yesaya 34 Bible Online

Yesaya 34 - new_tumbuka_bible bible

Yesaya 34

¹Sendererani kufupi kuti mupulike, imwe ŵanthu ŵa mitundu yose, tegherezgani, imwe mwa ŵamitundu. Charu cha pasi na vyose ivyo vili mwenemumo vipulike. Charu chose na vyose ivyo vikufuma mwenemumo vipulike.

²FUMU yaŵakwiyira ŵamitundu yose, ukari wakhe uli pa ŵasilikari wose ŵa nkhondo. FUMU yiti yiŵamare wose petu, yiti yiŵapereke kuti ŵakomeke wose.

³Vitanda vya awo ŵakomeka viti viponyeke kuwaro, ndipo kununkha kwa vitanda ivi kwizamkupulikikwa kutali, mapiri nagho ghizamkuzura na ndopa zawo pera.

⁴Dazi, mwezi na nyenyezi vizamkusongonoka, mtambo wizamkuzingika nga ndi chikarata chakuzingika. Nyenyezi zizamkuyoyoka, nga ndi mahamba gha mpheska panji nga ndi mahamba gha chikuyu.

⁵Pakuti lupanga lwane lwamwa mwakukwanira kuchanya, sono lukukhira kwiza kalanga ŵa charu cha Edomu, ŵeneawo ndadumula kuti ŵamare petu.

⁶Lupanga lwa FUMU lwageza ndopa, ndipo lwanata na mafuta. Ndopa izo lwageza ndi za ŵana-mberere na za mbuzi, ndi mafuta kufuma mu ziso za mberere zanarume. Pakuti FUMU yamkupereka sembe mu msumba wa Bozira, ŵakukomeka mbanandi mu charu cha Edomu.

⁷Njati zizamkufwira pamoza nawo, nkhambako zikuru na zichoko wuwo. Charu chawo chizamkunyewa na ndopa, ndipo dongo lizamkuzumbwa na mafuta.

⁸Pakuti FUMU yili na zuŵa lakhe lakuwezgera nduzga, chirimika chakulangira ŵarwani, chifukwa cha msumba wa Ziyoni.

⁹Mironga ya mu Edomu yizamkuzgoka mathipa, ndipo dongo lakhe lizamkuzgoka moto wa sulufure. Charu chakhe chizamkuzgoka mathipa ghakugolera moto.

¹⁰Moto uwu wizamkugoleranga waka muhanya na usiku, josi lakhe lizamkukweranga waka kwambula kureka. Charu chizamkuŵa chambula ŵanthu kwa miwiro na miwiro, palije na yumoza uyo wizamkukwendamoso mu charu ichi kwa muyirayira.

¹¹Ŵaphururu na ŵachinungu ndivyo vizamkukhara mwenemumo, ŵamachinchi na ŵachihoŵe ndivyo vizamkugoneranga mwenemumo. FUMU yizamkunyoroskera chingwe cha nthimbanizgo pa charu cha Edomu, na chakupimira vitimbaheti pa ŵarongozgi ŵakhe.

¹²Nduna zakhe zizamkuŵavye na chimoza kuchithya ufumu, ŵarongozgi wose ŵizamkufumamo.

¹³Minga yizamkutaŵana pa nyumba zakhe za ufumu, nkhunga na nthura zizamkumera mu malinga ghakhe, ŵakambwe na ŵaphururu vizamkukhara mwenemumo.

¹⁴Vikoko vizamkukumananga na ŵachimbwe, mphoyo yizamkuchemerezga ku mphoyo yinyakhe. Inya, kwenekuko ndiko vinyama vyakwenda usiku na kufika, ndipo vizamkusanga malo ghakupumuliramo.

¹⁵Kwenekura ŵamachinchi ŵizamkuzengako vivimbo, ŵizamkutayira masumbi na kukonkhomora, ŵizamkufukatira twana twawo mu mapapindo ghawo. Makuŵi nagho ghizamkuwungana kwenekura, lirilose na mwendezgani wakhe.

¹⁶Penjererani ndipo muŵazge mu Buku la FUMU, palije na chimoza cha vyeneivi icho chamkusoŵapo, palije na chimoza icho chamkusoŵa wakwendezgana nacho. Pakuti FUMU ndiyo yalangula, ndipo Mzimu wakhe ndiwo wizamkuviwungana.

¹⁷FUMU ndiyo yachita mphenduzgo pakuŵagaŵira charu, ndipo na woko lakhe yaŵagaŵira charu na chingwe chakupimira. Chiti chiŵenge chawo kwa muyirayira, ŵizamkukhara mwenemumo ku miwiro na miwiro.