Read new_tumbuka_bible Yesaya 35 Bible Online

Yesaya 35 - new_tumbuka_bible bible

Yesaya 35

¹Mapopa na charu chomizo vizamkukondwa, chiparamba chizamkusekerera na kutuŵa maluŵa. Nga ndi luŵa,

²charu ichi chizamkutuŵa maluŵa ghanandi, chizamkusekerera na kwimba mwakukondwa. Uchindami wa nkhorongo za Lebanoni wizamkuperekeka ku charu ichi, ndiposo na utozi wa Phiri la Karimele na Dambo la Sharoni. Ŵanthu ŵizamkuwona uchindami wa FUMU, na ufumunkhuru wa Chiuta withu.

³Khozgani mawoko ghakuropwa, ghapani nkhongono makongono ghakutomboroka.

⁴Awo ŵali na mtima wa chitenthe muŵaphalire kuti, “Khwimani mu mtima, mungawopanga chara. Wonani, Chiuta winu wati wizenge kuti wawezgere nduzga, na kulanga ŵarwani ŵinu. Iyo wati wize na kumuponoskani.”

⁵Penepapo awo mbachiburumutira ŵizamkulaŵiska, ndipo awo mbakumangwa makutu ŵizamkupulika.

⁶Ŵakupendera ŵizamkudukaduka nga ndi nyiska, awo ndi mbuwu ŵizamkwimba mwakukondwera. Mbwiwi za maji zizamkufuma mu mapopa, mironga ya maji yizamkwenda mu chiparamba.

⁷Muchenga wakocha wizamkuzgoka chiziŵa, charu cha chinkhamwa chizamkuŵa mbwiwi za maji. Ku malo gha ŵakambwe kwizamkuŵa visapa vya maji, ndipo utheka wamkuzgoka matete na marukwa.

⁸Msewu ukuru wizamkuŵako kwenekura, uwo wizamkuchemeka kuti, “Msewu Wakupatulika.” Ŵambula kuphotoka kuti ŵizamkwendamo chara. Wizamkuŵa wa ŵanthu ŵa Chiuta. Vindere kuti vizamkupurukiramo chara.

⁹Nkharamu kuti zizamkuŵako kwenekura chara, nanga ndi chikoko chakofya kuti chamkufikako chara. Ivi kuti vyamkusangikako kwenekura chara, kweni wakuwombokwa pera ndiwo ŵamkwendanga kwenekura.

¹⁰Awo FUMU yili kuŵawombola, ndiwo ŵizamkuwerera, ndipo ŵizamkunjira mu Ziyoni ŵakwimba na chimwemwe. Mwenemumo ŵizamkukondwa kwa muyirayira, ndipo ŵizamkufwasa na kuŵa na chimwemwe, chitima na kutampha kuti kwizamkuŵako chara.