Read new_tumbuka_bible Yesaya 36 Bible Online

Yesaya 36 - new_tumbuka_bible bible

Yesaya 36

¹Mu chirimika cha 14 cha kuwusa kwa Hezekiya, karonga wa charu cha Yuda, Senakeribu karonga wa charu cha Asiriya wakiza na kurwa nkhondo na misumba yose ya malinga gha charu cha Yuda na kuyipoka.

²Penepapo karonga wa charu cha Asiriya wakatuma murongozgi wakhe murara wa ŵasilikari kuti warute na ŵasilikari ŵanandi chomene kufuma ku msumba wa Lakishi kuya kwa Karonga Hezekiya mu msumba wa Yerusalemu. Murongozgi yura wakimilira pafupi na chimufwerenje icho chikuyegha maji kufuma ku chiziŵa cha kunena pa msewu ukuru wakuya ku munda wa munthu uyo wakuchapa salu.

³Ŵanthu awo ŵakaruta kuya kakumana nayo murongozgi yura ŵakaŵa aŵa: Eliyakimu mwana wa Hilikiya uyo wakaŵa murara wa nyumba ya ufumu, Shebina uyo wakaŵa mulembi ndiposo na Yowa mwana wa Asafu uyo wakaŵa msungiliri wa vya mudauko.

⁴Ndipo murongozgi wa ŵasilikari wa charu cha Asiriya wakati kwa iwo, “Muphalirani Hezekiya kuti: “Karonga mukuru wa charu cha Asiriya wakuti, ‘Kasi icho chikukupa chikanga nchivichi?

⁵Kasi ukughanaghana kuti kunozgekera kwa pa mlomo pera ndiko kungakupa mahara na nkhongono yakurwera? Kasi chomene ukugomezga njani kuti mpaka undigarukire ine?’

⁶Iwe ukugomezga charu cha Eguputo, icho chili nga ndi ndodo ya thete lakuphyoka ilo lizamkulasa mu woko la waliyose uyo wakweghamako. Ntheura ndimo Faro, karonga wa ku Eguputo waliri kwa yose uyo wakumugomezga.”

⁷Kweni usange iwe ukundiphalira kuti, “Ise tikugomezga mwa FUMU, Chiuta withu, asi iyo ndi mweneuyo malo gha pachanya ghakusoperako na majochero ghakhe, Hezekiya wali kubwangandulira pasi na kuŵaphalira ŵaYuda na ŵa mu msumba wa Yerusalemu kuti imwe mukwenera kusopa FUMU panthazi pa jochero ili la mu Yerusalemu pera.

⁸“Iwe zanga uzomerezgane na sekuru wane, karonga wa charu cha Asiriya. Ine nditi ndikupenge mahachi 2,000 usange ungaŵa na ŵanthu awo ŵangamanya kukwera.

⁹Iwe ungamanya chara kuthereska nanga njumoza wa ŵachoko wa ŵateŵeti ŵa sekuru wane, apo ukugomezga kuti magareta na ŵanthu ŵakukwera pa mahachi ŵati ŵafumenge ku charu cha Eguputo.

¹⁰Ndiposo kasi ukughanaghana kuti ine ndiza kuti ndirwe nkhondo na charu ichi kwambula kuti FUMU yandituma? FUMU ndiyo yandituma kuti ndize na kurwa nkhondo na charu ichi na kuchiparanya.”

¹¹Penepapo Eliyakimu, Shebina na Yowa ŵakamuphalira murongozgi wa ŵasilikari yura ŵakati, “Tikumuŵeyani ta ŵateŵeti ŵinu kuti mutiyowoyere mu chiAramayiki chifukwa tikuchipulika. Mureke kutiyowoyera mu chiyowoyero cha Yuda chara. Chifukwa ŵanthu wose awo ŵakhara pa chiliŵa ŵakupulikako.”

¹²Kweni murongozgi wa ŵasilikari yura wakazgora wakati, “Kasi mukughanaghana kuti uthenga uwu, sekuru wane wandituma kuti ndizakayowoye ngwa sekuru winu na imwe pera? Uthenga uwu ngwa ŵanthu wose nanga ndi awo ŵakhara pa viliŵa ŵeneawo pamoza na imwe, ŵanozgeka kurya mavi ghawo na kumwa matuzi ghawo?”

¹³Penepapo murongozgi wa ŵasilikari yura wakimilira na kuchemerezga chomene mu chiyowoyero cha chiHebere, wakati, “Pulikani mazgu gha karonga wa ŵakaronga wa charu cha Asiriya!

¹⁴Karonga wakuti, ‘Mungazomerezganga kuti Hezekiya wamupusikani. Iyo kuti wangamuthaskani chara.’

¹⁵Mungazomerezganga kuti Hezekiya wamukhorweskani kuti mugomezge mwa FUMU, para wakuti kwa imwe, ‘FUMU yitithaskenge nadi. Msumba uwu kuti upokekenge na karonga wa charu cha Asiriya chara.’ ”

¹⁶Mureke kupulikira Hezekiya chara, pakuti karonga wa charu cha Asiriya wakuti, “Imwe therani ndipo paŵe mutende pakati pa imwe na ine. Ntheura waliyose wa imwe wati waryenge vipambi vyakhe vyakufuma mu khuni lakhe la mpheska na chikuyu ndipo munthu yose wati wamwenge maji gha mu chisimi chakhe na chakhe,

¹⁷mpaka apo ine ndamkwizira kumutorerani ku charu chinu na chinu, charu cha vyakurya na vinyo, charu cha vingwa, na minda ya mpheska.”

¹⁸“Mungazomerezganga kuti Hezekiya wamupuruskani pakuyowoya kuti, ‘FUMU yitithaskenge.’ Kasi ndi chiuta nju pa ŵachiuta ŵa mafuko uyo wali kuthaskapo charu chakhe kufuma ku woko la karonga wa charu cha Asiriya?

¹⁹Kasi ŵali nkhu ŵachiuta ŵa msumba wa Hamati na Aripadi? Kasi ŵali nkhu ŵachiuta ŵa misumba ya Sefarivayimu? Kasi ŵachiuta ŵeneaŵa ŵakamanya kuthaska msumba wa Samariya ku woko lane?

²⁰Pa ŵachiuta wose aŵa, ndi chiuta wa charu nchi uyo wakathaska charu chakhe ku woko lane. Kasi sono FUMU yingathaska uli Yerusalemu ku woko lane?”

²¹Kweni ŵanthu ŵakakhara waka chete, kuti ŵakamuzgora chara pakuti Hezekiya wakalangula kuti, “Mureke kumuzgora.”

²²Penepapo Eliyakimu, mwana mwa wa Hilikiya, uyo wakaŵa murara wa nyumba ya ufumu, Shebina uyo wakaŵa mulembi, na Yowa mwana wa Asafu, uyo wakaŵa msungiliri wa vya mudauko, ŵakiza kwa Hezekiya uku ŵaparura malaya ghawo. Iwo ŵakamuphalira vyose ivyo murongozgi wa ŵasilikari ŵa charu cha Asiriya yura ŵakayowoya.