Read new_tumbuka_bible Yesaya 37 Bible Online

Yesaya 37 - new_tumbuka_bible bible

Yesaya 37

¹Para Karonga Hezekiya wakapulika uthenga uwu, wakaparura vyakuvwara vyakhe ndipo wakavwara chigudulu na kuruta ku Nyumba ya FUMU.

²Iyo wakatuma Eliyakimu, murara wa nyumba ya ufumu pamoza na Shebina mulembi ndiposo na ŵasofi ŵarara uku ŵavwara vigudulu kuti ŵarute kwa nchimi Yesaya mwana wa Amozi.

³Iwo ŵakamuphalira, ŵakati, “Karonga Hezekiya wakuti, ‘Ili ndi zuŵa la visuzgo, zuŵa la kuchenyekera na kulengeskekera. Tili nga ndi mwanakazi uyo wafika pa nyengo yakuti wababe mwana, kweni nkhongono zakuti wababire walije.

⁴Ntheura tikumuŵeyani, mutirombere ise ŵachoko waka, taŵeneise takharako ŵamoyo. Pakuti karonga wa charu cha Asiriya watuma murongozgi wakhe wa ŵasilikari kwiza kanyoza Chiuta wamoyo. FUMU, Chiuta winu panji wapulika mazgu gha murongozgi uyu. Rombani kuti FUMU yimulange chifukwa cha mazgu ghakhe ghakunyoza.’ ”

⁵Para ŵateŵeti ŵa Karonga Hezekiya ŵakiza kwa Yesaya,

⁶Yesaya wakati, “Rutaninge mukamuphalire sekuru winu kuti, ‘FUMU yikuti: Ureke kuŵa na wofi chifukwa cha mazgu agho waghapulika, mazgu agho ŵateŵeti ŵa karonga wa charu cha Asiriya wayowoya, ghakutuka ine.

⁷Pulika ichi! Ine nditi ndiŵike mzimu mwa iyo mwakuti wati wapulike mphwepwerezgo waka na kuwerera ku charu chakhe. Ine ndamkumukoma na lupanga mu charu chakhe.’ ”

⁸Murongozgi wa ŵasilikari yura wa cha charu cha Asiriya wakati wapulika kuti karonga wa wafumako ku msumba wa Lakishi ndipo wakurwa nkhondo na ŵanthu ŵa msumba wa Libina, wakawerako kuti wakaŵe na karonga wakhe.

⁹Pa nyengo yeneiyi Karonga Senakeribu wakapulika kuti Tirihaka, muEtiyopiya, wakwiza kuti wizakarwe nayo nkhondo. Wakati wapulika, wakatuma mathenga kwa Hezekiya na mazgu ghakuti,

¹⁰“Mukamuphalire karonga wa charu cha Yuda kuti Chiuta wako uyo ukumugomezga wareke kukupusika pakuyowoya kuti, ‘Yerusalemu kuti wati wapokekenge chara na karonga wa charu cha Asiriya.’

¹¹Nkhumanya, uli kupulika ivyo ŵakaronga ŵa charu cha Asiriya ŵali kuchita na vyaru vyose pakuvimara petu. Kasi iwe ungathaskika uli?

¹²Ŵasekuru ŵane ŵakapankhura misumba ya Gozani, Harani, Rezefu ndiposo na ŵanthu ŵa charu cha Edeni awo ŵakakharanga mu msumba wa Telasara? Kasi ŵachiuta ŵa mafuko agha wakaŵathaska?

¹³Kasi ŵakaronga ŵa misumba ya Hamati, Aripadi, Sefarivayimu, Hena na Iva, ŵali nkhu?”

¹⁴Karonga Hezekiya wakapokera karata iyo mathenga ghara ghakayegha ndipo wakati wayiŵazga, wakaruta ku Nyumba ya Chiuta, na kuyitandaula panthazi pa FUMU.

¹⁵Ndipo wakaromba panthazi pa FUMU wakati,

¹⁶“Mwe FUMU Mwenenkhongono zose, Chiuta wa Israele, imwe muli pa chizumbe cha ufumu winu kuchanya pakati pa ŵakerubi, imwe mwekha pera ndimwe Chiuta, mwaŵeneimwe mukuwusa maufumu ghose gha charu cha pasi, imwe ndimwe muli kulenga kuchanya na pasi.

¹⁷Mwe FUMU, tegherezgani. Pulikani, Mwe FUMU. Jurani maso ghinu mulaŵiske, ndipo mupulike mazgu agho Senakeribu watuma kunyoza imwe Chiuta wamoyo.

¹⁸“Mwe FUMU, mbunenesko nadi kuti ŵakaronga ŵa charu cha Asiriya ŵamara ŵamitundu yinandi na kureka vyaru vyawo kuŵa mapopa.

¹⁹Ŵali kocha pa moto ŵachiuta ŵa vyaru ivi pakuti ŵakaŵa ŵachiuta nadi chara. Ŵakaŵa ŵachiuta ŵakupangika na mawoko gha ŵanthu kufuma ku makuni na mawe. Ntheura ŵali kuŵaparanya.

²⁰Ntheura sono imwe, Mwe FUMU, tithaskani ku woko la Senakeribu, mwakuti maufumu ghose gha pa charu ghamanye kuti imwe FUMU, ndimwe pera Chiuta.”

²¹Ntheura Yesaya mwana wa Amozi wakatuma uthenga kwa Hezekiya uwo ukaŵa wakuti, “FUMU, Chiuta wa Israele wakuti, ‘Chifukwa chakuti wandiromba ine pa makani gha Senakeribu, karonga wa charu cha Asiriya,’ ”

²²mazgu agho FUMU yayowoya ghakususka Senakeribu ndi agha: “Ŵanthu ŵa mu Ziyoni, ŵakukuyuyura na kukuseka iwe, ŵanthu ŵa mu Yerusalemu, ŵakukung'ora iwe.

²³Kasi wanyoza na kutuka njani? Kasi ndi njani uyo ukumupomera? Kasi ndi njani uyo ukumurongora chisko chakujikuzga? Wachitira Mutuŵa Yura wa Israele.

²⁴Iwe wanyoza FUMU kwizira mu mathenga ghako. Iwe wayowoya kuti, ‘Na magareta ghane, ndili kuya kafika pachanya pa mapiri ghatalighatali, na ku umaliro wa Lebanoni. Ndili kughadumulira pasi, makuni ghakhe ghatalighatali gha milanje, na makuni ghakutowa chomene gha mulombwa. Ndili kufikako nadi kuchanya chomene, na ku nkhorongo za mdima bii.

²⁵Ine ndili kujimamo visimi mu vyaru vya chilendo, na kumwako maji ghakhe kwenekura, Na vitende vya malundi ghane, ndili komizga mironga ya charu cha Eguputo.’ ”

²⁶“Kasi undapulikepo, kuti kale chomene nkhachiyowoyapo? Ine nkhachinozgera cheneichi mu mazuŵa gha mwaka, sono ndipo nkhuchifiska. Iwe chako changuŵa kubwangandulira pasi, misumba ya malinga na kuyizgora miwulu ya mahami.

²⁷Ŵanthu ŵa mu misumba yeneiyi, ŵathika lusoko, ŵakofiwa na kutimbanizgika. Ŵaŵa nga ndi vyakumera vya ku munda, panji nga ndi utheka wa kumera sono. Ŵaŵa nga ndi utheka uwo wamera pachanya pa nyumba, weneuwo ukaŵawuka pambere undakule.

²⁸“Kweni ine nkhumanya vyose vya iwe, nkhumanya para ukufumamo na para ukwiza, ukari wako pa ine nawo nkhuwumanya.

²⁹Chifukwa chakuti wandikaripira ine, na chifukwa chakuti kujikuzga kwako nako ndapulika, sono nditi ndikore mphuno yako na mbeja yane, ndipo mu mlomo wako nditi ndikoroŵekemo na kachisulo. Ine nditi ndikuwezge, pakukuyendeska mu nthowa iyo ukiziramo.”

³⁰“Sono ichi ndicho chizamkuŵa chimanyikwiro kwa iwe Karonga Hezekiya: Chirimika chino muti muryenge vya mankhoro, mu chirimika cha chiŵiri ivyo vyaphukira mu mankhoro. Kweni mu chirimika cha chitatu mukapande na kuvuna. Mukapande mpheska na kurya vipambi vyakhe.

³¹Ndipo ŵaYuda ŵakukharako ŵizamkumeraso misisi mu charu chawo na kupambika vipambi muchanya.

³²Pakuti awo ŵakharapo ŵamkufuma mu msumba wa Yerusalemu ndiposo ŵakuphokwa ŵamkufuma mu Phiri la Ziyoni. Phamphu la FUMU Mwenenkhongono zose ndilo liti lifiskenge ichi.”

³³“Ntheura pa vya karonga wa charu cha Asiriya FUMU yikuti, ‘Iyo kuti wamkunjiramo mu msumba chara nanga nkhuponyamo muvwi! Iyo kuti wati wasenderere na nguru yakhe kufupi na msumba chara, nesi kuzenga chibumira chakubisamamo.

³⁴Nthowa iyo wakiziramo, ndiyo wati wawererengemo ndipo kuti wanjirengemo mu msumba chara.’ ” Ntheura ndimo yikuyowoyera FUMU.

³⁵“Iyo yikuti, ‘Nditi ndiwuvikirire na kuwuthaska msumba uwu, chifukwa cha ine ndekha, ndiposo na chifukwa cha muteŵeti wane Davide.’ ”

³⁶Ntheura mungelo wa FUMU wakaruta ku msasa wa ŵaAsiriya ndipo wakaya kakomapo ŵasilikari 185,000. Para ŵanthu ŵakawukanga na mulenje chomene, ŵakasanga kuti wose nvitanda pera.

³⁷Penepapo Senakeribu, karonga wa charu cha Asiriya wakawukako na kuruta ku kwakhe, ndipo wakaya kakhara mu msumba wa Nineve.

³⁸Sono zuŵa limoza apo Senakeribu wakasopanga chiuta wakhe Nisiroki mu nyumba yakusoperamo, ŵana ŵakhe ŵanarume Adirameleki na Sharezara ŵakamukoma pakumuheta na malupanga ghawo ndipo ŵakachimbilira ku charu cha Ararati. Mwana wakhe Esarihadoni ndiyo wakamba kuwusa mu malo ghakhe.