Read new_tumbuka_bible Yesaya 38 Bible Online

Yesaya 38 - new_tumbuka_bible bible

Yesaya 38

¹Nyengo yimoza Hezekiya wakarwara chomene ndipo wakaŵa pafupi na kufwa. Sono nchimi Yesaya mwana wa Amozi wakiza ndipo wakati kwa iyo, “FUMU yikuti kwa iwe, ‘Layira ku ŵa mbumba yako pakuti matenda agha uti ufwenge nagho kuti uchirenge chara.’ ”

²Penepapo Hezekiya wakazgoka na kulaŵiska ku chiwumba ndipo wakaromba kwa FUMU wakati,

³“Nkhumuŵeyani Mwe FUMU, kuti mukumbuke umo ine ndateŵeteranga mwakugomezgeka na mtima wakufikapo panthazi pinu. Ine nkhachita icho chikaŵa chiweme kwa iwe.” Ndipo wakalira chomene.

⁴Penepapo FUMU yikati kwa Yesaya,

⁵“Werera kwa Hezekiya ndipo ukati kwa iyo, ‘FUMU, Chiuta wa ŵawusokuru Davide wakuti: Ndapulika kuromba kwako ndiposo ndaghawona masozi ghako. Wona, nditi ndisazgireko virimika 15 kuti uŵe na umoyo.

⁶Nditi ndikuthaske iwe na msumba uwu kwa karonga wa charu cha Asiriya ndipo nditi ndiwuvikirire msumba uwu.’ ”

⁷“ ‘Chimanyikwiro cha FUMU kuti yiti yikuchizge iwe nga ndi umo yapanganirana ndi ichi:

⁸Mufwiri uwo ukuŵako chifukwa chakupendama kwa zuŵa pa chakupimira cha Ahazi, nditi ndiwuzgore uwerere nyuma mikwamba khumi.’ ” Penepapo dazi likawerera nyuma mikwamba khumi.

⁹Hezekiya, karonga wa charu cha Yuda wakati warwara na kuchira ku matenda ghakhe wakalemba sumu iyi:

¹⁰“Ine nkhaghanaghana kuti nkhwenera kufwa apo ndichali muwukirano. Ine ndapimikira kuruta ku malo gha ŵakufwa, na kukhara kwenekura umoyo wane wose.”

¹¹Ine nkhati, “Ine kuti ndiyiwonenge FUMU chara, mu charu ichi cha ŵamoyo. Munthu kuti ndiwonengeso chara, nanga nkhuŵa pamoza na awo ŵakukhara mu charu.

¹²Umoyo wane wafumyiskikako kwa ine, nga ndi chihema icho muliska wakuchiwiskira pasi. Umoyo wane ukadumulika, nga ndi umo salu yikadumulikira kufuma ku chakurukira. Muhanya na usiku umoyo wane ukamaranga waka.

¹³Nkhuchemerezganga kuya kafika na mulenjelenje kuti ndovwirike., Kweni nga ndi nkharamu, wakutekenyura viwangwa vyane vyose. Kwamba na kuya kafika na usiku mukundimarizga waka.

¹⁴Ine nkhaliranga nga ndi nkhuku panji kaŵeruŵeru, nkhadaghanga nga ndi kulira kwa nkhunda na mulenje. Maso ghane ghakavuka apo nkhalaŵiskanga kuchanya, Mwe FUMU, ndili mu visuzgo, zaninge mundovwire.

¹⁵Kweni ine kasi ndingayowoya vichi? FUMU ndiyo yayowoya kwa ine, ndipo iyoyene ndiyo yachichita. Pa umoyo wane wose nditi ndiŵenge mu visuzgo, chifukwa cha kuŵinya kwa mu mtima wane.

¹⁶Mwe FUMU, na vyeneivi ŵanthu ŵakuŵa na umoyo, ndipo mzimu wane ukusanga umoyo mu vyeneivi. Nadi, mundichizge na kuwezgerapo umoyo wane.

¹⁷Nadi, kuti ine ndiŵe paweme, nkhaŵa mu visuzgo vya ntheura. Mu kutemwa kwinu mukandisungilira, apo nkhaŵa mu dindi la pharaniko. Kwananga kwane kose, mwaponya kunyuma kwinu.

¹⁸Pakuti malo gha ŵakufwa kuti ghangamuwongani chara, ŵakufwa nawo kuti ŵangamurumbani chara. Awo ŵakukhilira ku dindi, kuti ŵangamugomezgani imwe chara.

¹⁹Ŵamoyo, nadi ŵamoyo pera, ndiwo ŵakumurumbani, nga ndi umo nkhuchitira ine muhanya uno. Ŵapapi ŵakuŵaphalira ŵana ŵawo, kugomezgeka kwinu.

²⁰FUMU yiti yindiponoske ine, ndipo titi timbe sumu na ŵabango, mazuŵa ghose gha umoyo withu mu nyumba ya FUMU.”

²¹Penepapo Yesaya wakati, “Rekani ŵanthu ŵatore nthimphwa ya chipambi cha chikuyu na kuŵika pa phumba, mwakuti karonga wachire.”

²²Penepapo Hezekiya wakafumba wakati, “Kasi chimanyikwiro chakuti ine ndamkuruta ku Nyumba ya FUMU nchivichi?”