Read new_tumbuka_bible Yesaya 39 Bible Online

Yesaya 39 - new_tumbuka_bible bible

Yesaya 39

¹Pa nyengo yeneyira Karonga Merodaki Baladani wa charu cha Babuloni uyo wakaŵa mwana wa Baladani wakati wapulika kuti Hezekiya wakaŵa murwari, wakamutumira ŵanthu kuti ŵarute na karata na chawanangwa kwa iyo.

²Ntheura Hezekiya wakaŵapokerera ŵanthu ŵara ndipo wakaŵarongora vyose ivyo vikaŵa mu nyumba yakusungiramo usambazi wakhe, kwamba siliva, golide, vyakununkhira, mafuta ghakuzirwa, mahomwa ghakhe gha nkhondo na vyose ivyo vikasungikanga mu nyumba zakhe zakusungira katundu. Pa kaŵavye kanthu ka mu nyumba yakhe ya ufumu panji ku ufumu wakhe wose ako Hezekiya wakareka kuŵarongora.

³Penepapo nchimi Yesaya wakiza kwa Karonga Hezekiya ndipo wakafumba wakati, “Kasi ŵanthu awo ŵangwiza ŵayowoya vichi ndipo kasi ŵafumira nkhu?” Hezekiya wakazgora wakati, “Ŵangwiza kufuma ku charu cha kutali chomene, cha Babuloni.”

⁴Nchimi yira yikafumba yikati, “Kasi wanguwonamo vichi mu nyumba yinu ya ufumu?” Hezekiya wakazgora wakati, “Vyose ivyo vili mu nyumba ya ufumu waviwona. Palije nanga nchimoza cha mu nyumba zane zakusungiramo vinthu cheneicho ndilije kuŵarongora.”

⁵Penepapo Yesaya wakati kwa Hezekiya, “Pulika sono icho FUMU Mwenenkhongono zose yikuyowoya.

⁶Mazuŵa ghakwiza apo vyose, ivyo vili mu nyumba yinu na ivyo ŵawiskemwekuru ŵali kusunga mpaka muhanya uno, vyamkutorekera ku Babuloni. Pamkuŵavye na chimoza icho chamkukharako. Ntheura ndimo yikuyowoyera FUMU.

⁷Ndipo ŵana ŵanji awo mwababa mwekha ŵamkutorekera ku charu cha Babuloni kuŵa ŵamikori ndipo ŵamkuŵazgora kuŵa nthunguli zakuteŵeta mu nyumba ya ufumu ya karonga wa charu cha Babuloni.”

⁸Penepapo Hezekiya wakati kwa Yesaya, “Mazgu gha FUMU agho wayowoya ngaweme.” Hezekiya wakazgora pakuti wakaghanaghananga kuti, “Pati paŵe mutende na chivikiriro pa umoyo wane wose.”