Read new_tumbuka_bible Yesaya 4 Bible Online

Yesaya 4 - new_tumbuka_bible bible

Yesaya 4

¹Mu zuŵa ilo ŵanakazi ŵankhonde na ŵaŵiri ŵizamkukora mwanarume yumoza na kumuphalira kuti, “Ise tiryenge vyakurya vyithu ndipo tijivwarikenge tekha, kweni utizomerezge kuti tichemekenge na zina lako mwakuti tiwuskeko soni zithu.”

²Mu zuŵa leneilo, FUMU yamkumezga munthavi wakhe uwo wamkuŵa wakutowa na wa uchindami. Ndipo vuna ya mu charu yamkuŵa yakuthumbwiramo na kuŵaso uchindami wa awo ŵati ŵaponepo mu charu cha Israele.

³Wose awo ŵakharako mu Ziyoni na kukhara mu Yerusalemu ŵati ŵachemekenge ŵakupatulika, wose awo ŵalembeka pamoza na ŵamoyo mu Yerusalemu.

⁴Penepapo FUMU yamkuphotora zakwananga za ŵanthu ŵa mu Yerusalemu. Ndipo yamkusuka ndopa izo zikathika mwenemura na mzimu wakhe wa weruzgi na wa moto.

⁵Penepapo, na muhanya, FUMU yizamkuŵika bingu pachanya pa Phiri la Ziyoni na pa wumba wa ŵanthu, ndipo na usiku yizamkuŵika josi na kuŵala kwa dimi la moto. Pakuti uchindami wa Chiuta uti uŵenge nga ndi chihema chakubenekerera malo ghose ghara.

⁶Uchindami wakhe uti uŵenge nga ndi mufwiri wakupumulirako ku chithukivu pa nyengo ya muhanya ndiposo na malo ghakuphokweramo na ghabisamamo ku chimphupuru na vura.