Read new_tumbuka_bible Yesaya 40 Bible Online

Yesaya 40 - new_tumbuka_bible bible

Yesaya 40

¹Chiuta withu wakuti, “Sanguruskani, sanguruskani ŵanthu ŵane.”

²Ŵayowoyerani makora ŵa mu Yerusalemu, muŵaphalire kuti, “Umikori wawo wamara, zakwananga zawo zagowokereka. Iwo ŵapokera kaŵiri kufuma kwa FUMU, chigowokero cha zakwananga zawo zose.”

³Munthu yunji wakuchemerezga wakuti, “Nozgani nthowa ya FUMU mu mapopa, nyoroskani msewu wa Chiuta withu mu chiparamba.

⁴Vinkhwawu vyose viwundike, mapiri ghose na tumapiri wuwo, vigumurikire pasi. Malo gha mabonkhobonkho ghaskesketeke, ndipo malo gha vituntha ghazgoke vidika.

⁵Penepapo uchindami wa Fumu uti uŵenge pakweru, ndipo ŵanthu wose wizamkuwuwona, pakuti ntheura ndimo yayowoyera FUMU.”

⁶Mazgu ghakapulikikwa ghakuti, “Pharazga chomene.” Ine nkhafumba kuti, “Kasi ndipharazgenge vichi?” “Upharazge kuti ŵanthu wose ŵali nga ndi utheka, kutowa kwawo kose kuli nga ndi maluŵa gha mu thengere.

⁷Utheka ukomira ndipo maluŵa nagho ghakufota, para muvuchi wa FUMU waphutirapo. Nadi ŵanthu ŵali nga ndi utheka.

⁸Utheka ukomira, maluŵa nagho ghakufota. Kweni mazgu gha Chiuta withu, ghakukhalira kwa muyirayira.”

⁹Iwe ukwiza na uthenga uweme mu Ziyoni, kwera pa phiri litali. Iwe ukwiza na uthenga uweme mu Yerusalemu, chemerezga chomene. Upharazge, ureke kopa. Uŵaphalire ŵa mu misumba ya Yuda kuti, “Chiuta winu wakwiza.”

¹⁰Wonani FUMU Chiuta wakwiza na nkhongono, wakwiza kuti wizakawuse na nkhongono zakhe. Wonani, wakwiza na njombe yakhe, ndipo wadangizga malipiro ghakhe.

¹¹Wizamkuliska mberere zakhe nga ndi muliska, wizamkuwunganya ŵana-mberere mu mawoko ghakhe. Wizamkutupakata pa chipakato chakhe, ndipo wizamkuzirongozga makora izo zili na twana.

¹²Kasi ndi njani wali kupimako maji mu chikufi chakhe, panji kupimako usani wa mtambo na chikufi chakhe? Kasi ndi njani wali kuwunjikapo fuvu la charu mu chidunga, panji kupimako uzitu wa mapiri, na tumapiri tuchokotuchoko pa sikelo?

¹³Kasi ndi njani uyo wali kurongozgapo mzimu wa FUMU, panji kuyisambizgapo FUMU na kuyipa urongozgi?

¹⁴Kasi nkhwa njani uko FUMU yili kufumbako mahara, ndipo ndi njani uyo wali kuyisambizgapo FUMU, vya weruzgi wakunyoroka? Kasi ndi njani kuyisambizgapo vya mahara, panji kuyirongozgapo nthowa ya kapulikiskiro ka vinthu?

¹⁵Nadi, mafuko ghali nga ndi nthonyezi la maji, kufuma mu ndowo, ndipo ghakupimika nga ndi fuvu pa sikelo. Yikupima virwa kuŵa vyakuyuyuka nga ndi fuvu.

¹⁶Nkhorongo ya ku Lebanoni kuti njinandi chara, kuŵa nkhuni zakupembera moto, nanga ndi nyama kuŵa sembe zakocha zinandi.

¹⁷Panthazi pa FUMU mafuko ghose ndi chinthu chawakawaka, wakughapima kuŵa chinthu cha waka na ghambula kanthu.

¹⁸Kasi Chiuta muti mumukozganiske na njani? Panji kasi ndi chikozgo nchini icho mungachilinganizga na iyo?

¹⁹Pakuti nanga ndi chikozgo, nkhwantha ndiyo wakuchipanga, ndipo mufuzi wakuchiphaka golide, na kuchipangira unyoro wa siliva.

²⁰Munthu uyo ndi mukavu chomene kupereka sembe, wakusankha khuni ilo ndambula kuvunda. Iyo wakupenja nkhwantha yakumanya kupanga chikozgo, icho kuti chingasunkhunyika chara.

²¹Kasi mukumanya chara? Kasi mundapulike? Kasi kwamba pakudanga mundaphalirikepo? Kasi mundamanyiske kufuma apo charu chikalengekera?

²²Iyo ndiyo wakukhara pa chizumbe chakhe pachanya pa charu, ndipo awo ŵakukhara pa charu ŵali nga ndi mphazi. Iyo wali kutandazga mtambo nga ndi salu yakuchinga, ndipo wakuchitandaula nga ndi chihema chakukharamo.

²³Iyo wakuŵazgora ŵakaronga kuŵa vichwapi, ndipo wakuŵakhizga ŵakuwusa kuŵa ŵawakawaka.

²⁴Iwo ŵali nga ndi mbuto izo zapandika sonosono, panji izo zamijika waka sono, izo zayamba waka kujintha misisi mu dongo. Para Chiuta waputiskirapo mphepo, mbuto zeneizo zikufota, ndipo kavuruvuru wakuziwuruskira kutali nga ndi mwerero.

²⁵Mutuŵa Yura wakuti, “Kasi muti mundikozganiske na njani? Kasi walipo uyo wakuyana na ine?”

²⁶Laŵiskani kuchanya kuti muwone. Ndi njani uyo wakalenga vyeneivi? Iyo wakurongozga nyenyezi na kuzipenda, ndipo yiliyose wakuyichema na zina. Chifukwa cha nkhongono na mankharo ghakhe ghakuru, palije na yimoza iyo yikuzgeŵapo.

²⁷Iwe Yakhobe, kasi ukuyowoyerachi, ndipo iwe Israele, kasi ukudandaulirachi pakuyowoya kuti, “FUMU yikumanya chara visuzgo vyane, Chiuta wakughanaghanako chara na wanangwa wane?

²⁸Kasi mukumanya chara, ndipo kasi mundapulike? FUMU ndi Chiuta wa muyirayira, Mlengi wa charu chose cha pasi. Iyo kuti wakuropwa chara nanga nkhuvuka, ndipo palije uyo wangamanya kamanyiro kakhe.

²⁹FUMU yikupereka nkhongono ku awo mbakuropwa, yikuŵakhozga awo ŵalije nkhongono na ŵakuvuka.

³⁰Nanga ndi ŵawukirano ŵakuropwa na kuvuka, ndipo ŵanyamata nawo ŵakukhuŵara na kuwa.

³¹Kweni awo ŵakugomezga mwa FUMU, nkhongono zawo zamkuwereramo. Ŵamkuwurukira muchanya na mapapindo nga ndi nombo. Ŵamkuchimbira kweni kuti ŵamkuvuka chara, ndipo ŵamkwenda pasi kwambula kuropwa.”