Read new_tumbuka_bible Yesaya 41 Bible Online

Yesaya 41 - new_tumbuka_bible bible

Yesaya 41

¹Chiuta wakuti, “Kharani chete na kutegherezga kwa ine, imwe vyaru vya mu mphepete mwa nyanja. Ŵanthu ŵa mitundu yose ŵaŵe na nkhongono ziphya. Ŵasenderere kufupi ndipo rekani ŵayowoye. Tiyeni tose pamoza tikumane pa malo ghakweruzgira.

²“Kasi ndi njani wakawuska yumoza kufuma ku mafumiro gha dazi, uyo wakuthereska pose apo wakukandanga? Wakughapereka mafuko gha ŵanthu panthazi pakhe, mwakuti ŵakaronga ŵakuŵakandirizgira pasi pa malundi ghakhe. Na lupanga lwakhe wakuŵazgora nga ndi fuvu, ndipo na uta wakhe wakuŵaparanya nga ndi mwerero.

³Wakuŵachimbilira na kuŵajumpha kwambula suzgo, mu nthowa izo malundi ghakhe ghandakandepo na kale.

⁴Kasi ndi njani uyo wachita vyeneivi na kuvifiska, pakuyirongozga miwiro ya ŵanthu kufuma ku mutendeko? Ine ndine FUMU. Ku mutendeko nkhaŵa ine, ndipo na ku umaliro ndiŵenge ine.

⁵“Ŵanthu ŵa mu mphepete mwa nyanja, ŵachiwona icho ndachita ndipo ŵakopa. Ŵanthu ŵa vyaru vya kutali nawo ŵakutenthema, ndipo wose ŵawungana pamoza na kwiza.

⁶Munthu yose wakovwira munyakhe, ndipo wakuti ku munyakhe, ‘Khwima mtima.’

⁷Muŵaji wa mathabwa wakuchiska mufuzi wa golide, ndiposo uyo wakuskesketa chikozgo na nyondo, nayo wakuchiska uyo wakudinya pa libwe lakufulirapo, ŵakuyowoya za icho ŵawocherera kuti, ‘Nchiweme.’ Ntheura wakuchikhomerera na mizumali mwakuti chireke kuwa.

⁸“Kweni iwe Israele muteŵeti wane, iwe Yakhobe wa mweneiwe ndili kukusankha, ndiwe muzukuru wa Abrahamu wakutemweka wane.

⁹Nkhakutora kufuma ku mphererekezgo za charu, nkhakuchema kufuma ku ngodya zakutali chomene. Ine nkhati kwa iwe, ‘Iwe ndiwe muteŵeti wane.’ Ndakusankha, kuti ndipo ndikutayenge chara.

¹⁰Ntheura ungopanga pakuti ine ndili nawe, ungathikanga lusoko pakuti ine ndine Chiuta wako. Nditi ndikukhozge na kukovwira, nditi ndikufighilire na nkhongono zane zakutonda.

¹¹“Wose awo ŵakakukwiyiranga, ŵizamkukhozgeka soni na kulengeskeka. Wose awo ŵakulimbana nawe, ŵizamkuŵa ŵawakawaka, ndiposo ŵizamkumara.

¹²Wizamkuŵapenja awo ŵakulimbana nawe, kweni kuti wizamkuŵasanga chara. Awo ŵakurwa nawe nkhondo, wizamkuŵa ŵanthu ŵawakawaka.

¹³Pakuti ine ndine FUMU, Chiuta wako, ndine nkhukukora woko lako la maryero. Ine ndine nkhuti kwa iwe, ‘Ungopanga. Ine nditi ndikovwire.’ ”

¹⁴FUMU yikuti, “Ungopanga iwe Yakhobe, wakutomboroka nga munyororo, Ungopanga iwe Israele, pakuti ine ndikovwirenge. Ine ndine muwomboli wako, Mutuŵa Yura wa Israele.

¹⁵Wona, nditi ndikuzgore iwe kuŵa chakubulira tirigu, icho chiti chiŵenge chiphya na cha mino ghakuthwa. Uti ughadirimulire pasi mapiri na kughaphwanya, ndipo wizamkuzgora tumapiri kuŵa nga ndi fuvu.

¹⁶Wizamkuŵapeta ndipo mphepo yizamkuŵawuruskira kutali, ndipo kavuruvuru wizamkuŵaparanya. Kweni iwe wizamkusekerera mwa FUMU, ndipo wizamkuchindamiskika mwa Mutuŵa Yura wa Israele.

¹⁷“Ŵakavu na ŵasokwano ŵizamkupenja penja maji, kweni kuti ŵizamkughasanga chara, pa singo zawo pizamkuŵa waka gwa kukhumba maji. Kweni ine FUMU ndizamkuŵazgora, Ine Chiuta wa Israele ndizamkuŵataya chara.

¹⁸Ndamkujula mironga kwenda muchanya mu mapiri yomizo, ndipo mbwiwi za maji zamkuŵa mu vidika. Ndamkuzgora mapopa kuŵa viziŵa vya maji, ndipo charu chomizo kuŵa mbwiwi za maji.

¹⁹Mu mapopa ndizamkumezgamo makuni, gha milanje, gha akesha, gha kachere na gha olive. Ndipo mu chiparamba ndamkumezgamo makuni, gha mulombwa, gha mikuyu na makuni gha payini pamoza.

²⁰Ndamkuchita ichi mwakuti ŵanthu ŵawone na kumanya, ŵalanguruke na kupulikiska, kuti nkhongono ya FUMU ndiyo yachita ichi, ndipo kuti Mutuŵa Yura wa Israele ndiyo wali kulenga ichi.”

²¹FUMU yikuti, “Rongorani mrandu winu.” Karonga wa Yakhobe wakuti, “Perekani ukaboni winu.

²²Zaninge nawo ŵangoza winu kuti ŵatiphalire icho chizamkuŵako. Ŵatiphalire vinthu vya kale, kuti ndi vinthu uli, mwakuti tilanguruke navyo, na kumanya ivyo vikurondezgapo. Panji ŵatiphalire vyithu ivyo vizamkuŵako.

²³Tiphalirani ivyo vikwiza pamanyuma pa ivi, mwakuti timanye kuti ndimwe ŵachiuta nadi. Chitani chilichose, manyi nchiweme panji nchiheni, mwakuti tizukume na kutenthema.

²⁴Kweni imwe ndimwe vinthu vya wakawaka, ndipo milimo yinu nayo nja wakawaka. Munthu uyo wakumusankhani imwe nayo ndi mukazuzi.”

²⁵“Ndakhuŵirizga yumoza kufuma ku mpoto ndipo wakwiza, iyo wakufumira ku mafumiro gha dazi uyo wakuchindike zina lane. Ndipo wizamkuŵakandira pasi ŵakaronga nga ndi mathipa, nga ndi muwuvi uyo wakuponda dongo.

²⁶Kasi ndi njani uyo wakachiphara kufuma ku mutendeko, mwakuti tichimanye ichi, panji uyo wakachiyowoya kale chomene, mwakuti ise tiyowoye kuti, ‘Wakaneneskanga?’ Palije na yumoza uyo wakachipharapo, palije na yumoza uyo wakachiyowoyapo, palije na yumoza uyo wakapulikapo mazgu ghinu.

²⁷Ine ndine nkhaŵa wakudanga kupharazga mu Ziyoni kuti, ‘Wonani, awo ŵakwiza.’ Ine ndine nkhatuma nthumi mu Yerusalemu, kwiza na uthenga uweme.

²⁸Nkhati ndalaŵiska, nkhasanga kuti palije na yumoza, pakaŵavye na yumoza uyo wangarongozga, pakaŵavye uyo wangazgora para ndafumba fumbo.

²⁹Nadi, ŵachiuta wose aŵa mba utesi, milimo yawo nayo nja wakawaka. Vikozgo vyawo vyakusongonora vili nga ndi mphepo yawakawaka.”