Read new_tumbuka_bible Yesaya 43 Bible Online

Yesaya 43 - new_tumbuka_bible bible

Yesaya 43

¹Kweni sono FUMU iyo yikakulenga iwe Yakhobe FUMU yeneiyo yikakuwumba iwe Israele yikuti, “Ungopanga pakuti ine ndine ndakuwombola, ndakuchema iwe pakukuzunura zina kuti uli wane.

²Para ukwenda pakati pa maji, ine nditi ndiŵenge nawe, para ukwambuka mironga, kuti yamkukubizga chara, para wamkuporota mukati mu moto, wamkuphya chara, ndipo dimi la moto kuti lamkukumyangura chara.

³Pakuti ine ndine FUMU, Chiuta wako, Mutuŵa Yura wa Israele, Muponoski wako. Nkhupereka Eguputo kuti ndiwombole iwe, ndipo Etiyopiya na Seba mu malo mwa iwe.

⁴Pakuti iwe ndiwe wakuzirwa na wakuchindikika panthazi pane, ndipo ine nkhukutemwa. Nditi ndipereke ŵanthu mu malo mwa iwe, na mafuko gha ŵanthu kuti ndiwombole iwe.

⁵Ungopanga, ine ndili nawe. Ine ndizenge na mphapu yako kufuma ku mafumiro gha dazi, ndizamkumusokororani kufuma ku manjiliro gha dazi.

⁶Ndizamkuyowoya ku vyaru vya ku mpoto kuti, ‘Ŵarekani,’ ndipo ku vyaru vya mwera kuti, ‘Mungaŵakaniliranga chara. Ŵana ŵane ŵanarume mwize nawo, kufuma ku vyaru vya kutali, ŵana ŵane ŵanakazi, kufuma ku mphererekezgo za charu.

⁷Ŵizenge wose awo ŵakuchemeka na zina lane, awo nkhaŵalenga na uchindami wane, ŵeneawo nkhaŵawumba na kuŵapa umoyo.’ ”

⁸Chiuta wakuti, “Zaninge nawo ŵanthu awo mbachiburumutira, kweni maso ŵali nagho, awo mbakumangwa makutu, kweni makutu ŵali nagho.

⁹Mafuko ghose ghawungane pamoza, ŵamitundu ŵaŵe pa malo ghamoza. Kasi ndi njani mwa iwo uyo wakapharapo cheneichi, ndipo wali kutiphalirapo ise na vinthu vya kale? Rekani ŵize na ukaboni wawo, mwakuti ŵarongore kuti ŵakuneneska, mwakuti ŵanthu ŵapulike ndipo ŵati, Ncha unenesko.”

¹⁰FUMU yikuti, “Imwe ndimwe ŵakaboni ŵane, ndimwe ŵateŵeti ŵane awo ndili nkhuŵasankha, mwakuti mundimanye na kugomezga mwa ine, ndipo mupulikiske kuti ine ndine Chiuta munyakhe kulije. Ndichali ndindaŵeko ine, kukaŵavye Chiuta munyakhe, nesi kuŵengeko munyakhe pamanyuma pa ine.”

¹¹Ine pera ndine FUMU, ndipo pa dera pa ine, palije Muponoski munyakhe.

¹²FUMU yikuyowoya, yikuti, “Ine ndine nkhayowoya, ndine nkhaponoska na kuchipharazga. Kuti ndi Chiuta wa chilendo chara uyo wachita ichi, ndipo imwe ndimwe ŵakaboni ŵane.

¹³Ine ndine Chiuta, ndipo sono na kunthazi wuwo, ndine mweneuyo, Kulije na yumoza uyo wangamanya kukwapura icho chili mu woko lane. Para nkhuchita mlimo, kasi ndi njani uyo wangandirekiska?”

¹⁴FUMU, Muwomboli winu, Mutuŵa Yura wa Israele, wakuti, “Chifukwa cha imwe, ndamkutuma nkhondo ku charu cha Babuloni. Yizamkuphyora mphingirizgo za mu vipata vya msumba, ndipo kusekerera ŵaKaladeya, kwizamkuzgoka kulira.

¹⁵Ine ndine FUMU, Mutuŵa winu Yura, Mlengi wa Israele ndiposo Karonga winu.”

¹⁶FUMU, iyo yikajula nthowa mukati mu nyanja, nthowa pakati pa vimaji vya nkhongono,

¹⁷iyo yikawunganya magareta na mahachi, ndiposo na ŵasilikari na vinkhara vya nkhondo, awo ŵakagona waka, ndipo kuti ŵakawukaso chara, ŵeneawo ŵakaphwanyika na kuzimyika nga ndi chisunda, yikuti,

¹⁸“Mureke kuvikumbuka ivyo vikachitika kale, panji nesi kulanguruka na vinthu vya kale.

¹⁹Wonani, ine sono nkhuchita chinthu chiphya, chayamba kuwoneka, kasi mukuchiwona? Ndizamkujula msewu mu mapopa, na kuŵika mironga mu chiparamba.

²⁰Vinyama vya mu thengere vizamkundichindika, ŵakambwe na ŵaphururu wuwo. Pakuti nkhuŵika maji mu mapopa, na mironga mu chiparamba, kuti ndiŵape maji ŵanthu ŵane ŵakusoreka.

²¹Ŵanthu aŵa nkhaŵalenga chifukwa cha ine ndekha, mwakuti ŵaperekenge marumbo kwa ine.”

²²FUMU yikuti, “Imwe ŵa fuko la Yakhobe, kuti mukandisopa ine chara, mukavuka nane, imwe ŵaIsraele.

²³Kuti mukiza na mberere kwa ine kuŵa sembe zakocha mburuma chara, nesi kundichindika na sembe zinu zakukoma. Ine kuti ndili kumuzotofyani na vyawanangwa chara, nesi kumuvuskani kuti muperekenge vyakununkhira chara.

²⁴Imwe kuti mwandigulirapo vinthu vyakununkhira chara, nesi kundikhutiska na mafuta gha sembe zinu. Mu malo mwakhe mwandizotofya na zakwananga, ndiposo mwandivuska na maubendezi ghinu.

²⁵Ine nkhusisita zakwananga zinu, chifukwa cha icho ine ndili, ndipo kuti ndikumbukengeso zakwananga zinu chara.”

²⁶Mundikumbuske ndipo tiyeni tisuskane pamoza. Rongosorani mrandu winu mwakuti murongore kuŵa ŵakuneneska.

²⁷Wiskemwe wakudanga wakananga, ndipo ŵarongozgi ŵinu ŵara ŵakandigarukira.

²⁸Ndicho chifukwa ŵasofi ŵinu ndaŵakanizga kunditeŵetera mu malo ghane ghakupatulika. Ntheura nkhamupereka Yakhobe kuti wamare petu, ndipo ŵaIsraele nkhaŵapereka kuti ŵayuyurike.