Read new_tumbuka_bible Yesaya 44 Bible Online

Yesaya 44 - new_tumbuka_bible bible

Yesaya 44

¹FUMU yikuti, “Kweni sono pulika, iwe Yakhobe, muteŵeti wane, Iwe Israele wa mweneiwe ndamusankha.

²FUMU iyo yikakulenga iwe, iyo yikakuwumba iwe apo ukaŵa mu nthumbo, yeneiyo yikovwirenge iwe yikuti, ‘Ungopanga, We Yakhobe, muteŵeti wane. Imwe ndimwe ŵanthu ŵane ŵakutemweka, mwaŵeneimwe nkhamusankhani.’

³“Ine nditi ndipungulire maji pa charu cha chinkhamwa, na kujula mironga pa charu chomizo, Nditi ndipungulire Mzimu wane pa mphapu yako, ndipo ndizamkupereka vitumbiko vyane ku ŵana ŵako.

⁴Ŵizamkukura makora nga ndi utheka uwo ukuthilirika makora, panji nga ndi makuni gha katope mu mphepete mwa mironga.

⁵“Waliyose wizamkuyowoya kuti, ‘Ine ndine wa FUMU,’ ndipo munyakhe wizamkujithya zina lakuti Yakhobe. Ndipo munyakheso wizamkulemba pa woko lakhe kuti, ‘Ndine wa FUMU,’ na kujithya zina lakuti ‘Israele’.”

⁶FUMU, Karonga wa Israele, Muwomboli wawo, yeneiyo ndi FUMU Mwenenkhongono zose yikuti, “Ine ndine wakudanga na wa umaliro, ndipo pa dera pa ine palije Chiuta munyakhe.”

⁷Kasi ndi njani wakulingana na ine? Rekani wayowoye. Rekani waphare ndipo wachiŵike pakweru panthazi pane. Ndi njani wali kupharazga kufuma papo kale vinthu ivyo viti vizenge? Rekani watiphalire icho chizamkuchitika kunthazi.

⁸Mungatenthemanga panji nesi kopa, asi ine nkhachipharazga ichi na kuchichima kufuma papo kale? Imwe ndimwe ŵakaboni ŵane, kasi walipo Chiuta munyakhe pa dera pa ine? Nadi, palije Chiuta munyakhe Wankhongono nga ndi Jarawe, mweneuyo ine nkhumumanya.

⁹Ŵanthu wose awo ŵakupanga vikozgo mbawaka ndipo vinthu ivyo ŵakukondwera navyo nvyambula chandulo. Ŵanthu awo ŵakuvilambira mbachiburumutira ndipo ŵakumanya kanthu chara kuti ŵakhozgekenge soni.

¹⁰Kasi ndi njani uyo wangapanga chiuta panji kuwumba chikozgo chakusongonora icho chingamwandulira kanthu kalikose chara?

¹¹Wose awo ŵakujipereka pakulambira chikozgo cheneicho, ŵati ŵakhozgeke soni, ndipo ŵanthu awo ŵakupanga vikozgo ndi ŵanthu waka. Usange ŵakususka, rekani wose ŵawungane pamoza kuti ŵimikane nane. Wose ŵati ŵatenthemeskekenge na kukhozgeka soni.

¹²Mufuzi wakupanga chikozgo pakutora chisulo na kuchiŵika pa moto na kuchiskana na nyondo. Wakuchinozga makora na mawoko ghakhe gha nkhongono. Pamanyuma wakuŵa na njara na kumara nkhongono. Para wandamwe maji, wakutomboroka.

¹³Muŵaji wakupima khuni na chingwe. Wakugwarapo chithuzithuzi na chakulembera ndipo wakulipara makora na kulipima. Pamanyuma wakuliŵaja na kupanga chithuzithuzi cha munthu, chakutowa nga ndi munthu, kuti chikharenge mu nyumba yakusoperamo.

¹⁴Iyo wakutema makuni gha milanje, panji wakusankhamo khuni la mulombwa panji la musoro ndipo wakulichita kuti likule lankhongono pamoza na makuni gha mu thengere. Nyengo zinyakhe wakupanda khuni la milanje ndipo vura yikulikuzga.

¹⁵Munthu wali na milimo pa khuni mu nthowa zakupambanapambana. Nyengo zinyakhe khuni liri na mlimo wakupembere moto panyakhe kupanga chikozgo. Nyengo zinyakhe wakupemba moto kuti wothenge na kuphikapo chakurya. Nyengo zinyakhe wakupangako chiuta ngoza na kuchilambira.

¹⁶Khuni zinyakhe wakuziŵika pa moto ndipo pa moto wenewura wakuphikapo chakurya. Wakocheraposo nyama kuti warye na kukhuta. Pamanyuma wakothaso moto ura ndipo wakuti kwa iyomwene, “Eya! Ndathukira sono. Moto asi uwu.”

¹⁷Khuni zinyakhe wakupangapo chiuta ngoza wakhe ndipo wakuchijikamira na kuchilambira. Wakuromba kwa icho pakuyowoya kuti, “Iwe ndithaska, iwe chiuta wane.”

¹⁸Ŵanthu ŵa ntheura ŵakumanya chara nanga nkhupulikiska chilichose. Maso ghawo ngakujarika mwakuti ŵakuwonaso chara. Maghanoghano ghawo ngakujarika mwakuti ŵakupulikiska chara.

¹⁹Ŵanthu aŵa, palije na yumoza uyo wakughanaghana panji kuŵa na vinjeru nesi kupulikiska kuti ŵayowoye kuti, “Chiŵanduka chinyakhe cha khuni ili nkhawocha pa moto. Pa makara ghakhe gha moto nkhaphikapo chakurya ndipo nkhochapo nyama na kurya. Kasi ine ndingapanga chinthu cha ukazuzi ichi kufuma ku khuni ilo lakharako? Kasi ndijikamirenge chisinkho cha khuni?”

²⁰Ŵanthu ŵa ntheura ŵakumyangura waka vyoto. Maghanoghano ghakubendera ndigho ghaŵapuruska. Ntheura kuti ŵakujifumba chara na kuyowoya kuti, “Kasi ncha nadi icho ndakorera mu woko lane?”

²¹FUMU yikuti, “Iwe Yakhobe, ukumbukenge vinthu vyeneivi, pakuti ndiwe muteŵeti wane, iwe ŵaIsraele. Ine ndine nkhakulenga kuti uŵe muteŵeti wane, Iwe Israele, ine kuti ndikuruwenge chara.

²²Ndawuskapo maubendezi ghako nga ndi mtambo, ndipo zakwananga zako nga ndi nkhungu ku mulenje. Ntheura wererani kwa ine, pakuti nditi ndikuwombolenge.”

²³Yimbani imwe mitambo pakuti FUMU ndiyo yachita cheneichi, chemerezga iwe charu cha pasi. Yambani kwimba imwe mapiri, ndiposo na iwe thengere na khuni lirilose, pakuti FUMU yawombola Yakhobe, ndipo yarongora uchindami wakhe kwa Israele.

²⁴FUMU, Muwomboli wako, yeneiyo yikakuwumba kufuma mumu mu nthumbo yikuti, “Ine ndine FUMU, Mlengi wa vinthu vyose, ndamweneine ndekha na ndekha nkhatandaula mtambo, nkhachitandaula charu cha pasi. Ndine nkhalenga charu cha pasi, munyakhe palije.”

²⁵“Ndine nkhutimbanizga vimanyikwiro vya nchimi zitesi, ndipo ŵaroski nkhuŵazgora kuŵa vindere. Ndine nkhuwezgera nyuma kumanya kwa wa vinjeru, na kuzgora umanyi wawo kuŵa uchindere.

²⁶Ine ndine nkhukhozga mazgu gha ŵateŵeti ŵane, ndipo nkhufiska ivyo nthumi zane zikachima. Ndine nkhuyowoya vya Yerusalemu kuti, ‘Ŵanthu ŵizamkukhara mu msumba weneuwu.’ Vya msumba ya charu cha Yuda nkhuti, ‘Yizamkuzengekaso’. Ndipo mahami ghawo nkhuti, ‘Ndizamkughawuskaso.’

²⁷Ndine nkhuyowoya ku ndimba kuti, ‘Kamuka, ndipo nditi ndikamuske mironga yako.’

²⁸Ine ndine nkhuyowoya vya Karonga Kirusi kuti, ‘Mweneuyu ndi muliska wane’, ndipo wati wafiske vyose ivyo nkhucha navyo. Iyo wizamkulangula kuti, ‘Yerusalemu ŵazengekeso’, ndipo lufura lwa Nyumba ya Chiuta kuti, ‘Luzengekeso.’ ”