Read new_tumbuka_bible Yesaya 45 Bible Online

Yesaya 45 - new_tumbuka_bible bible

Yesaya 45

¹“FUMU yikuti kwa Kirusi wakuphakazgika wakhe, mweneuyo yikamukora woko lakhe la maryero, kuti uthereske mafuko panthazi pakhe, na kuwuskapo ŵakaronga kuti ŵareke kuwusa, kuti ujure miryango panthazi pakhe, mwakuti vipata vireke kujarikaso.

²Nditi ndikudangirire iwe, na kusesketa mapiri. Nditi ndiswe tuchokotuchoko vijaro vya mkuŵa, na kuphyora mphingirizgo za visulo.”

³Nditi ndikupe usambazi uwo uli kubisika mu mdima, chuma icho chili ku malo gha ku uzgevu, mwakuti umanye kuti ine ndine FUMU, Chiuta wa Israele, uyo wakuchema pakukuzunura zina.

⁴Chifukwa cha Yakhobe muteŵeti wane, na cha Israele wakusoreka wane, nkhukuchema iwe Kirusi pakukuzunura zina, na kukupa nchindi nangauli ukundimanya chara.

⁵Ine ndine FUMU, palije yinyakhe, pa dera pa ine palije Chiuta munyakhe. Nditi ndikukhozge nangauli ukundimanya chara,

⁶mwakuti kufuma ku mafumiro gha dazi mpaka ku manjiliro ghakhe, ŵanthu ŵamanye kuti kulije munyakhe pa dera pa ine. Ine ndine FUMU, kulije yinyakhe.

⁷Ine ndine nkhulenga ungweru na chisi, nkhwiza na uweme na soka. Ine ndine FUMU, yeneiyo yikuchita vinthu vyose ivi.

⁸Imwe mitambo rokweskani kufuma kuchanya, ndipo maŵingo gharokweskere urunji pasi. Charu cha pasi chijurike, kuti chiponosko chiphuke, na kuti chimezgeso na urunji. Ine FUMU, ndine nkhachilenga.

⁹Soka kwa uyo wakulimbana na Mlengi wakhe, chiŵiya cha dongo icho chikulimbana na muwuvi wakhe. Kasi dongo lingayowoya kwa uyo wakuliwumba kuti, “Kasi ukuchitachi?” Panji kuti, “Icho wawumba chilije vyakukorera.”

¹⁰Soka kwa uyo wakuti ku ŵawiske, “Kasi muli kubaba vichi?” Panji ku ŵanyina kuti, “Kasi icho mukusuzgika nacho pakubaba nchivichi.”

¹¹FUMU, Mutuŵa Yura wa Israele, Mlengi wakhe wakuti, “Kasi iwe ungandifumba ivyo vikwiza pa ŵana ŵane, panji kundilangula pa mlimo wane, uwo nkhuchita na mawoko ghane?

¹²Ine ndine nkhalenga charu cha pasi, ndine nkhalengaso munthu kuti wakharengemo. Mawoko ghane ndigho ghakatandaula mtambo, ndine nkhulangula vya mu mlengalenga vyose.

¹³Ine ndine nditi ndikhuŵirizge Kirusi, kuti wafiske icho ndi urunji, ndizamkunyoroska nthowa zakhe zose zakwendamo. Iyo wizamkuzenga msumba wane na kusutula ŵanthu ŵane, ndipo wizamkusutula awo ŵali mu umikori, kweni kwambula kulipirapo kalikose panji njombe.” Ntheura ndimo yikuyowoyera FUMU Mwenenkhongono zose.

¹⁴FUMU yikuti, “Usambazi wa charu cha Eguputo, na malonda gha charu cha Etiyopiya, ndiposo na ŵaSeba ŵanthu ŵataliŵatali, vyose vyamkwiza kwa imwe kuti viŵe vyinu. Ŵamkwiza kunyuma zinu kuŵa ŵazga, uku ŵakakika na maunyoro. Ndiposo wizamkujikama panthazi pinu, na kuŵeya kwa imwe kuti, ‘Nadi Chiuta wali na imwe, kulije munyakhe, kulije Chiuta munyakhe wakuyana na Chiuta winu.’ ”

¹⁵Nadi imwe ndimwe Chiuta uyo wakujibisa, Mwe Chiuta, Muponoski wa Israele.

¹⁶Wose awo ŵakupanga vikozgo, ŵati ŵakhozgeke soni na kulengeskeka, wose pamoza ŵati ŵatimbanizgike.

¹⁷Kweni FUMU yili kuŵaponoska ŵaIsraele, yili kuŵapa chiponosko cha muyirayira, kuti ŵati ŵakhozgekenge soni chara, nesi kulengeskekaso kwa muyirayira.

¹⁸FUMU iyo yikalenga mtambo, yikuti, “Iyo ndiyo Chiuta, ndiyo wakata na kulenga charu, ndiyo wakuchikhozga kuti chikhalirire kwa muyirayira. Kuti wakachilenga kuŵa cha wakawaka chara, kweni kuti ŵanthu ŵakharengemo. Ndiyo wakuti, Ine ndine FUMU, ndipo pa dera pa ine, palije Chiuta munyakhe.

¹⁹Ine kuti nkhayowoyera mu udesi chara, kufuma kutali ku charu cha mdima. Ine kuti nkhayowoyapo chara ku mbumba ya Yakhobe kuti, ‘Mundipenjenge ine ku malo gha wakawaka.’ Ine FUMU nkhuyowoya unenesko, nkhuphara icho nchakunyoroka.”

²⁰FUMU yikuti, “Wunganani pamoza mwizenge, sendererani pafupi, mose imwe mwathaskika ku ŵamitundu. Vinjeru ŵalije awo ŵakuyegha vikozgo vyakuŵaja, ŵeneawo ŵakuromba kwa ŵachiuta awo ŵangaponoska chara.

²¹Pharani ndipo yowoyani mrandu winu. Ŵarekani ŵadumbiskane pamoza. Kasi ndi njani uyo wakayowoya ichi mu nyengo za kale? Ndi njani uyo wakachipharazga ichi kufuma papo kale? Kasi asi ndine FUMU? Ndipo kulije Chiuta munyakhe pa dera pa ine. Chiuta Murunji na Muponoski. Kulije munyakhe pa dera pa ine.”

²²“Wererani kwa ine kuti muponoskeke, imwe mwa ŵanthu mose ŵa mu charu cha pasi, chifukwa ine ndine Chiuta, munyakhe palije.

²³Ine ndekha ndili kurapa, na mlomo wane ndili kuyowoya unenesko pera, ndili kuyowoya mazgu agho kuti ghasuskika chara. Ŵanthu wose ŵamkundilambira ine, ndipo ŵanthu wose ŵamkuchita chirapo mu zina lane.”

²⁴Iwo ŵizamkuyowoya kuti, “Mwa FUMU pera ndimo muli urunji na nkhongono.” Wose awo ŵakamukaripiska ŵamkwiza kwa iyo, ndipo ŵamkukhozgeka soni.

²⁵Mwa FUMU ndimo mphapu yose ya Israele, yizamkurunjiskika na kuchindikika.