Read new_tumbuka_bible Yesaya 46 Bible Online

Yesaya 46 - new_tumbuka_bible bible

Yesaya 46

¹Belu wakusindamira pasi, Nebo wakusindama, vikozgo vyawo vili pa vikoko na ng'ombe. Vinthu ivi mukuyegha, vikuyegheka nga ndi katundu pa vinyama vyakuvuka.

²Para vinyama vikusindama, vikozgo navyo vikubendamira pamoza Vinyama kuti vikumanya kuthaska katundu chara, kweni vyose vikutorekera ku umikori.

³Pulikani kwa ine, imwe ŵa mbumba ya Yakhobe, mose imwe mwakharako ŵa mu mbumba ya Israele. Ine ndaŵa wakumupwerererani, kufuma apo mukaŵira mu nthumbo za ŵanyinamwe, ndipo ndamusungani kufuma apo mukababikira.

⁴Ine ndimupwerereraninge mpaka ku uchekuru winu wa mbuha tuu. Ine FUMU, ndine ndimusunganinge. Ine ndine nkhamulengani ndipo nditi ndimuyeghani, nditi ndimusungani na kumuthaskani.

⁵Kasi ine mungandilinganizga na njani, panji kundikozganiska na njani? Mungandiyerezgera na njani kuti iyo na ine tiyane waka?

⁶Ŵanthu ŵanji wakufumiska golide munandi kufuma mu mathumba ghawo, ndipo ŵakupima siliva pa vyakupimira uzitu. Iwo ŵakumulemba nchito mufuzi wa golide, ndipo iyo wakulinozga kuŵa chiuta. Penepapo iwo ŵakujikama na kumulambira.

⁷Chiuta ngoza ŵakumunyamulira pa viŵegha vyawo na kumuyegha, ŵakumwimika pa malo ghakhe na kumukhazika penepapo, iyo kuti wangasezgeka pa malo ghara pa iyo yekha chara. Para munthu yunji wakuromba kwa iyo, kuti wakuzgora panji nkhumuponoska mu visuzgo vyakhe chara.

⁸Imwe mwa ŵachigaruka, kumbukani ichi na kughanaghana, ndipo mulanguruke nacho mu mtima.

⁹Mukumbuke vinthu vya mwaka, vinthu vya kale vira. Ine ndine Chiuta, palije munyakhe. Ine ndine Chiuta, palije munyakhe wakukozgana nane.

¹⁰Nkhayowoya vya ku umaliro, kufuma ku mutendeko. Nkhayowoya ivyo vizamkuchitika, kufuma papo kale. Ine nkhati, “Dazgo lane likhalirirenge. Nditi ndifiske nadi vyose ivyo nkhukhumba kuchita.”

¹¹Nkhuchema chinombo kufuma ku mafumiro gha dazi, icho ndi munthu wakufiska dazgo lane kufuma ku charu cha kutali. Ivyo ndayowoya, ndivyo ndizamkufiska. Ivyo ndanozgera, ndivyo ndizamkuchita.

¹²Pulikani kwa ine, mwa ŵanthu ŵa mitima yinonono, mwaŵeneimwe muchali mundathaskike.

¹³Ine ndili pafupi kumuponoskani, kuti ndili kutali namwe chara, kuti ndichedwenge kumuthaskani chara. Nditi ndiponoske msumba wa Yerusalemu, na kupereka uchindami ŵane ku ŵaIsraele.