Read new_tumbuka_bible Yesaya 47 Bible Online

Yesaya 47 - new_tumbuka_bible bible

Yesaya 47

¹Fumu yikuti, “Iwe Babuloni, mwali wakulangwa, khira ndipo khara pa fuvu. Iwe Babuloni khara pasi, fumapo pa chizumbe chako. Pakuti uti muchemekeso mutechitechi chara, nesi wakujipereka.

²Torani malwara kuti muske ufu, muwuskeko vidiko vyinu. Kwindani vyakuvwara, malundi ghawoneke, ndipo mwambuke mironga.

³Unkhule winu uti uwoneke pakweru, ndipo muti mulengeskeke na kukhozgeka soni. Nditi ndiwezgere nduzga, ndipo kuti nditi ndisidengepo munthu chara.”

⁴Muwomboli withu, uyo zina lakhe ndi FUMU Mwenenkhongono zose ndi Mutuŵa Yura wa Israele wakuti,

⁵“Imwe ŵa mu charu cha Babuloni, kharani chete, ndipo mukhare mu mdima pakuti muti muchemengeso chara kuti, ‘Fumukazi ya mafuko ghose.’

⁶Nkhaŵakwiyira ŵanthu ŵane, nkhaŵatinkha kuti nga ndi ŵanthu ŵane chara. Nkhaŵapereka mu mawoko ghako, kweni iwe kuti ukaŵachitira lusungu chara. Nanga ndi awo ŵakaŵa ŵachekuru, iwe ukaŵika pa iwo goliwoli lizitu chomene.

⁷Iwe ukaghanaghana kuti uŵenge fumukazi kwa muyirayira, kweni ukupwererako na vinthu ivi chara, nesi kughanaghanako icho chiti chichitikenge ku umaliro.

⁸“Pulika sono, iwe ukutemwa vyakukondweska, wa mweneiwe ukukhara kwambula kupwererako. Iwe ukuti, ‘Ndine pera munyakhe pa dera pa ine palije, kuti ndiŵenge chokoro chara, nesi ŵana kuti ŵafwenge chara.’

⁹Kweni mu kanyengo kachoko, mu zuŵa limoza, vinthu viŵiri ivi viti vikwizirenge. Ŵana ŵako ŵizamkufwa ndipo iwe wizamkuŵa chokoro. Vyose ivi vizamkukuwira mwankhongono nangauli uli na ŵawukwi ŵanandi ndiposo na vinthumwa vyankhongono chomene.

¹⁰“Iwe ukugomezga mu uheni wako, ndipo wati, ‘Palije na yumoza uyo wakundiwona.’ Vinjeru na mahara ghako vikukupuruska, ndipo ukuti, ‘Ndine pera, munyakhe pa dera pa ine palije.’

¹¹Kweni soka liti likwizirenge, ndipo uti umanye kuliwezga na mayere ghako chara. Kupasuka kuti kwizenge pa iwe, mwakuti wamkutondeka kuliwuskapo. Nyifwa yiti yikwizirenge kwa mabuchibuchi, yeneiyo ulije kuyighanaghanako.

¹²“Rutilira na vinthumwa vyako, ndiposo na ŵawukwi ŵako ŵanandi, ivyo waŵa navyo kufuma ku uwukirano wako. Panyakhe vingakwendera makora, panyakhe vingamanya kofya ŵarwani ŵako.

¹³Wavuka na maurongozgi ghako ghanandinandi. Rekani ŵanthu ŵako awo ŵakumanya vya mu mlengalenga, na kudodoliska nyenyezi, ŵeneawo, pa kuthwasa kwa mwezi, ŵakuchima icho chikuchitikirenge, ŵize kuno kuti ŵakuthaske.

¹⁴Ŵanthu aŵa ŵali nga ndi maphekese, ndipo moto uti uŵawochenge nadi. Kuti ŵangajithaska ŵekha chara, ku dimi la moto uwu. Ndi moto wa makara chara uwo munthu wakotha, panji kusenderera pafupi chifukwa ukocha chomene.

¹⁵Ichi ndicho ŵizamkuchita kwa iwe, wose awo watokatokanga nawo pamoza, ŵeneawo ukachitanga nawo malonda, kwamba pa uwukirano wako. Wose aŵa ŵakuyingayinga waka, pamkuŵavye na yumoza uyo wizamkukuponoska.”