Read new_tumbuka_bible Yesaya 48 Bible Online

Yesaya 48 - new_tumbuka_bible bible

Yesaya 48

¹Pulikani ichi, imwe ŵa mbumba ya Yakhobe, mwaŵeneimwe mukuchemeka na zina lakuti Israele, ndipo muli kufuma mu fuko la Yuda. Imwe mukurapira mu zina la FUMU, ndipo mukuromba kwa Chiuta wa Israele, kweni kuti ndi mu unenesko na mu urunji chara.

²Imwe mukujikuzga kuti ndimwe ŵenekaya ŵa msumba wakupatulika, ndipo mukugomezga mwa Chiuta wa Israele, uyo zina lakhe ndi FUMU Mwenenkhongono zose.

³FUMU yikuti, “Nkhapharazga vinthu vya kale, vikafumira mu mlomo wane ndipo nkhavivumbula. Pamanyuma maluŵiro nkhavichita, ndipo vikafiskika.

⁴Chifukwa nkhamanya kuti muli ŵanonono, singo zinu zili gwa nga ndi chisulo, ndipo mitu yinu nga ndi mkuŵa.

⁵Ine nkhakuphalira vinthu ivi kale chomene, pambere vindachitike, nkhaviphara kwa imwe, mwakuti mureke kuyowoya kuti, vikozgo vyinu ndivyo vyachita, vikozgo vyakuŵaja na vyakusongonora ndivyo vikalangula.

⁶“Imwe muli kuvipulika vinthu ivi. Ntheura sono muviwone vyose ivi. Kasi mungazomerezga chara? Kwamba sono mpaka kunthazi, nditi ndimuphalirani vinthu viphya, vinthu vyakubisika ivyo mundavimanyepo.

⁷Vinthu ivi vikulengeka sono, kuti vikalengeka kale chara, kuti mukavipulikapo na kale chara, mpaka muhanya uno. Ntheura mungayowoya chara kuti, ‘Tikaviwona kale.’

⁸Imwe kuti muli kuvipulikapo nesi kuvimanyapo chara, makutu ghinu ghaŵa ghakumangwa kufuma papo kale. Pakuti ine nkhumanya umo uliri uryarya winu, na kuti ndimwe ŵakugaruka kufuma apo mukababikira.

⁹“Ndaziwurika kukaripa chifukwa cha zina lane. Ukari wane ndawezgako kuti ndireke kumumarani petu, mwakuti ŵanthu ŵandichindike.

¹⁰Ndamuphotora, kweni nga ndi siliva chara, ndamuyezga mu ng'anjo ya visuzgo.

¹¹Pa chifukwa cha ine ndamwene, nadi, pa chifukwa cha ine ndekha, nkhuchita ichi. Kasi zina lane likazuzgikenge waka chifukwa uli? Uchindami wane kuti ndingapereka ku munyakhe chara.”

¹²FUMU yikuti, “Pulika kwa ine iwe Yakhobe, tegherezga iwe Israele, wa mweneiwe ndili kukuchema. Ine ndine Chiuta, ndine Wakudanga na wa Umaliro.

¹³Mawoko ghane ndigho ghakaŵika lufura lwa charu, nkhongono zane ndizo zikatandaula mtambo, para nkhuvichema vyose pamoza vikwiza kwa ine.

¹⁴“Mose imwe wunganani kuti mupulike. Kasi ndi chiuta ngoza nju uyo walikachimapo vinthu ivi? Uyo ndi mubwezi wa FUMU, wati wafiske chakurata cha FUMU pa charu cha Babuloni, ndiposo na nkhongono yakhe pa ŵaKaladeya.

¹⁵Ndine nadi ndayowoya ichi, ndine ndamuchema. Ine ndiza nayo, ndipo wati waŵe wakusakata mu ivyo wakuchita.

¹⁶“Zaninge pafupi na ine kuti mupulike ichi: Kufuma ku mutendeko ndilije kuyowoyera mu ubende. Kufuma apo vikambiranga, ine nkhaŵako kale.” Ndipo sono FUMU Chiuta, wandipa Mzimu wakhe ndipo wanditumaso.

¹⁷FUMU, Muwomboli winu, Mutuŵa Yura wa Israele wakuti, “Ine ndine FUMU, Chiuta winu, uyo wakumusambizgani icho nchiweme kwa imwe, uyo wakumurongozgani mu nthowa iyo mukwenera kwendamo.

¹⁸“Mupulikirenge marango ghane, mphanyi mutende winu wanguŵa nga ndi mronga, ndipo urunji winu nga ndi majigha gha mu nyanja.

¹⁹Ŵana ŵinu mphanyi wanguŵa nga ndi muchenga, ŵa mphapu yinu nga ndi fuvu. Zina lawo mphanyi lawuskikako chara kwa ine, nesi kumara chara panthazi pa ine.”

²⁰Fumanipo mu charu cha Babuloni, chimbiranimo mukati mu ŵaBabuloni. Chemerezgani ichi na mazgu gha chimwemwe, ndipo muchipharazge. Muchipharazge ichi ku charu chose cha pasi, muyowoye kuti, “FUMU yawombola muteŵeti wakhe Yakhobe.”

²¹Para yikarongozganga ŵanthu ŵakhe mu mapopa, kuti ŵakaŵa na nyota chara. FUMU yikaŵapa maji kufuma mu jarawe, yikaswa jarawe lira ndipo maji ghakafuma.

²²FUMU yikuti, “Munthu uyo ndi muheni, mutende kulije kwa iyo.”