Read new_tumbuka_bible Yesaya 49 Bible Online

Yesaya 49 - new_tumbuka_bible bible

Yesaya 49

¹Pulikani kwa ine, imwe ŵanthu ŵa mphepete mwa nyanja, pulikani ichi imwe mukukhara ku vyaru vya kutali. Ndichali mu nthumbo ya amama, FUMU yikandichema. Kufuma apo nkhawirangako, FUMU yikandithya zina.

²Mazgu ghane yikaghanozga kuŵa ghakuthwa nga ndi lupanga, yikandivikirira mu mufwiri wa woko lakhe. Yikandizgora kuŵa muvwi wakuthwa, ndipo yikandibisa mu phodo yakhe.

³FUMU yikati kwa ine, “Iwe Israele, ndiwe muteŵeti wane, ndipo mwa iwe ine ndizamkuchindikika.”

⁴Kweni ine nkhati, “Ndateŵeta kwambula chandulo, ndataya nkhongono zane pawakawaka, pambula kanthu. Ndipouli ivyo vikwenera kwa ine vili mu mawoko gha FUMU, ndipo njombe yane yili mwa Chiuta wane.”

⁵Sono FUMU iyo yikandiwumba mu nthumbo ya amama, kuŵa muteŵeti wakhe yikuti, “Nkhukwimika iwe kuti uwezgere mbumba ya Yakhobe kwa iyo, na kuwunganya ŵaIsraele pafupi na iyo. Ine nkhuchindikika panthazi pa FUMU, ndipo nkhusanga nkhongono mwa Chiuta wane.”

⁶FUMU yikati kwa ine, “Ndi chinthu chipusu kuti iwe uŵe muteŵeti wane, mwakuti uwuske mafuko gha Yakhobe, na kuŵawezgeraso kwawo awo ŵali kukharako. Nditi ndikwimike nga mbungweru ku ŵamitundu, mwakuti ndiŵaponoske ŵanthu kuya kafika na ku mphererekezgo za charu.”

⁷FUMU, Muwomboli wa Israele, na Mutuŵa wakhe Yura, uyo wakuyuyurika nkhanira na kutinkhika na ŵamitundu, mweneuyo ndi muzga wa ŵakuwusa, wakuti, “Ŵakaronga wamkukuwona iwe na kwimilira, nduna zamkukuwona na kukulambira, chifukwa FUMU iyo njakugomezgeka, Mutuŵa Yura wa Israele, wali kukusankha iwe.”

⁸FUMU yikuti, “Pa nyengo yiweme ya uchizi wane, ndamkukuzgora, pa zuŵa la chiponosko ndamkukovwira. Ndizamkukusunga na kukuzgora iwe, kuti uŵe phangano ku ŵanthu, kunozgaso charu na kugaŵira ŵanthu vyakharanga mapopa.

⁹Iwe wizamkuti ku ŵazga, ‘Fumaninge,’ ndipo ku awo ŵali mu mdima, ‘Zaninge ku ungweru.’ Ŵizamkusanga chakurya mu mphepete mwa nthowa, ndipo pa tumapiri tose twambula kumerapo makuni, ndipo pizamkuŵa luhari lwawo.

¹⁰“Kuti ŵizamkupulika njara nesi nyota chara, chithukivu panji dazi kuti vizamkuŵapweteka chara, pakuti uyo wali na chiwuravi na iwo, wizamkuŵarongozga kuŵatorera pafupi na mbwiwi za maji.

¹¹“Mu mapiri ghane ghose ndizamkujulamo nthowa, ndipo misewu yane yikuru yizamkusanuzgika.

¹²Wonani ŵanthu ŵamkwiza kufuma ku vyaru vya kutali, ŵanji ŵizamkufuma ku mpoto, ŵanji ku manjiliro gha dazi, ndipo ŵanji ŵizamkufuma ku Aswani, ku mwera kwa charu cha Eguputo.”

¹³Iwe mtambo, yimba mwakukondwa, iwe charu, sekerera! Imwe mapiri, chemerezgani na sumu za chimwemwe. Pakuti FUMU yikusanguruska ŵanthu ŵakhe, ndipo yiti yiŵenge na chiwuravi pa ŵakusuzgika ŵakhe.

¹⁴Kweni ŵanthu ŵa mu Ziyoni ŵakuti, “FUMU yatisida ise, FUMU yatiruwa.”

¹⁵Kasi mama wangaruwa mwana wakhe wakonkha, panji kuti wareke kuŵa na chiwuravi pa uyo wakababa yekha? Nangauli ŵangaruwa, ine kuti ndimuruwaninge chara.

¹⁶Iwe Yerusalemu, ine ndili kukulemba mu chikufi chane. Viliŵa vyako nkhuviwona kaŵirikaŵiri.

¹⁷Ŵanthu awo ŵizamkukuzengaso, ŵakwiza sonosono, ndipo awo ŵakakubwangandula, ŵati ŵafumengemo.

¹⁸Inuskani maso, mulaŵiske uku na uku na kuwona. Ŵanthu ŵinu ŵakuwungana, ŵakwiza ku chikaya chawo. FUMU yikuti, “Nkhurapa nadi, wizamkuvwara ŵanthu ŵako nga nchinthu chakukutoweska, ndipo wizamkuŵakakilira pa iwe nga ndi umo wakuchitira mlowokazi.

¹⁹“Malo ghinu ghakupasuka na gha mapopa ndiposo na charu chinu chakunangika, sono chamkuŵa chichoko chomene kuti ŵanthu ŵinu kuti ŵakakharemo. Ndipo awo ŵakachipankhura ŵizamkuŵa kutali na imwe.

²⁰Ŵana ŵinu awo ŵakababiwira ku umikori, ŵizamkuyowoya kwa imwe kuti mupulike kuti, ‘Malo agha ngachoko chomene kuti tikharemo, mutipe malo ghasani kuti tikharemo.’

²¹Ntheura imwe mwizamkuyowoya mu mitima yinu kuti, ‘Kasi ndi njani uyo watibabira ise ŵana aŵa? Ŵana ŵithu wose ŵakafwa ndipo tikazgoka vyumba. Tikaŵa ŵamikori ndipo tikaŵikika ku charu cha kutali. Kasi ndi njani uyo wakaŵalera ŵana aŵa? Ise tikaŵa tekhatekha, kweni kasi aŵa ŵali kufuma nkhu?’ ”

²²FUMU Chiuta wakuti, “Ine nditi ndicheuzge ku ŵamitundu, nditi ndiwuskire muchanya ndembera yane. Iwo ŵamkwiza na ŵana ŵinu ŵanarume mu chipakato chawo, ŵana ŵinu ŵanakazi mu viŵegha vyawo.

²³Ŵakaronga ndiwo ŵamkuŵa nga ndi ŵawiskemwe, mafumukazi ndigho ghamkuŵa nga ndi ŵanyinamwe. Iwo ŵamkusindamira pasi panthazi pinu na kumulambirani, ndipo ŵamkumyanga fuvu la ku malundi ghinu. Penepapo mwamkumanya kuti ine ndine FUMU. Awo ŵakugomezga mwa ine, kuti ŵakhozgekenge soni chara.”

²⁴Kasi vyakuskogha vingapokeka ku vinkhara, panji, kasi ŵamikori ŵangathaskika ku munthu mukari na wa mazaza?

²⁵Kweni sono FUMU yikuti: “Ŵamikori wose ŵati ŵapokekenge kufuma ku vinkhara, ndipo vyakuskogha vipokekenge kwa uyo ngwa nkhaza na mukari. Ine nditi ndilimbane nawo awo ŵakulimbana namwe, ndipo ŵana ŵinu ndizamkuŵathaska.

²⁶Ndizamkuchitiska kuti awo ŵakumutindiŵizgani, ŵarye nyama yawo na yawo. Ŵizamkuloŵera na ndopa za iwoŵene, nga ndi para ŵaloŵera na vinyo. Penepapo ŵanthu wose ŵizamkumanya, kuti ine ndine FUMU, Muponoski winu na Muwomboli winu, Chikurukuru Yura wa Yakhobe.”