Read new_tumbuka_bible Yesaya 5 Bible Online

Yesaya 5 - new_tumbuka_bible bible

Yesaya 5

¹Sono nditi ndimwimbire uyo nkhumutemwa, sumu ya munda wakhe wa mpheska. Wakutemweka wane wakaŵa na munda wa mpheska, pa phiri la nyata yiweme.

²Wakatipura na kuwuskamo mawe, ndipo wakapandamo mpheska ziweme chomene. Wakazenga chigongwe cha ŵalinda mukati mwakhe, ndipo wakajimamo chakukamiramo vinyo mu munda ura. Mwenecho wakagomezganga kuti mufumenge mpheska yiweme, kweni mukafuma mpheska zakuŵaŵa.

³Sono imwe mukukhara mu Yerusalemu, na imwe ŵaYuda, ndaŵeya kuti mweruzge ndimwe pakati pa ine na munda wane.

⁴Kasi mphanyi nkhawuchitira vichi munda uwu, kuruska icho ndili kuwuchitira kale? Ine nkhagomezganga kuti upambikenge mpheska ziweme, kasi nchifukwa uli ukapambika mpheska zakuŵaŵa?

⁵“Sono nditi ndimuphalirani, icho ndichitenge ku munda wane wa mpheska. Nditi ndiwuskengepo luŵigho lwakhe, mwakuti vipambi vyakhe viryeke. Nditi ndiwiskirenge pasi chiliŵa chakhe, mwakuti ŵanthu ŵawukandirizgire pasi.

⁶Nditi ndiwuzgore kuŵa thengere. Ine kuti ndiwuphatilirenge chara nesi kulimamo, ndipo nthura na minga viti vimerengemo. Nditi ndilangule maŵingu, kuti ghareke kurokweskamo vura.”

⁷Charu cha Israele ndicho munda wa mpheska wa FUMU Mwenenkhongono zose. ŴaYuda ndiwo mpheska izo FUMU yikucha nazo. FUMU yikagomezganga kuti paŵenge weruzgi wakunyoroka, kweni pakaŵa kuthiska ndopa pera. Yikagomezganga kuti paŵenge urunji kweni yikapulikanga kulira kwa ŵanthu ŵakusuzgika.

⁸Soka kwa imwe mukubamphika nyumba na nyumba, mwaŵeneimwe mukusazgirako minda ku minda, mpaka paŵavye malo gha munthu munyakhe, kweni imwe pera mu charu.

⁹Ndapulika FUMU Mwenenkhongono zose, yikurapa, yikuti, “Nadi nyumba zinandi zizamkuzgoka mahami, nyumba zikuruzikuru na zakutowa, zizamkuŵa zambula ŵanthu ŵakukharamo.

¹⁰Munda wa mpheska wa mahekitala khumi, vinyo lakhe lizamkuzura chiŵiya chimoza pera. Ndipo homeri limoza la mbewu, lizamkupambika debe limoza pera.”

¹¹Soka ku awo ŵakuwuka na macherochero chomene, kuchimbilira kuya kamwa moŵa. Iwo ŵakutandara kwenekura kumwa vinyo usiku wose, ŵasuke ŵaroŵere betubetu.

¹²Kwenekura ŵakulizga bango, chiding'indi, chimbitiku na fyoliro, uku ŵakumwa vinyo pa viphikiro vyawo. Kweni kuti ŵakupwererako za milimo ya FUMU chara, nesi kuwona nchito za mawoko ghakhe.

¹³Pa chifukwa ichi ŵanthu ŵane ŵati ŵayorekerenge ku umikori, chifukwa cha kureka kupulikiska. Ŵarongozgi ŵawo ŵakuzirwa ŵati ŵafwenge na njara, ndipo ŵanthu ŵanyakhe wose ŵati ŵafwenge na nyota.

¹⁴Pa chifukwa ichi malo gha ŵakufwa ghajula mlomo wakhe, nadi mlomo wakhe ngwa kujurika. Ŵakuzirwa ŵa mu Yerusalemu, pamoza na ŵanthu waka ŵanyakhe, ndiposo na awo ŵakupoma na uloŵevu wawo ŵati ŵawiremo mu malo gha ŵakufwa.

¹⁵Munthu yose wati wakhizgikire pasi. Nadi, munthu yose wati wayuyurike, ndipo awo ŵakujikuzga ŵati ŵakhozgeke soni.

¹⁶Kweni FUMU Mwenenkhongono zose yiti yichindikike chifukwa cha weruzgi wakhe, ndipo Chiuta Mutuŵa wati warongore utuŵa wakhe pakuchita urunji.

¹⁷Ŵana-mberere ŵamkuryanga mu luhari palipose, mbuzi zamkuryanga mu mahami.

¹⁸Soka kwa awo ŵakujiguzira ubendezi pakuyowoya utesi, ndipo ŵakuguza kwananga nga ndi vingwe vya gareta.

¹⁹Iwo ŵakuhoyera kuti, “Rekani Chiuta wendeske, wachite luŵiro mlimo wakhe, mwakuti tiwuwone. Rekani lisenderere pafupi, dazgo la Mutuŵa Yura wa Israele, lize luŵiro mwakuti tilimanye.”

²⁰Soka ku awo ŵakuti uheni ndiwo uweme, ndipo uweme ndiwo uheni, ŵeneawo ŵakuzgora mdima kuŵa ungweru, ndipo ungweru kuŵa mdima, ŵeneawo ŵakuzgora vyakuŵaŵa kuŵa vyakunowa, ndipo vyakunowa kuŵa vyakuŵaŵa.

²¹Soka ku awo ŵakujipima ŵekha kuti mbamahara, awo ŵakujipima ŵekha kuti mbakuchenjera.

²²Soka ku awo ndi nkhwantha pakumwa vinyo, awo ndi vinkhara pakusazga moŵa.

²³Ŵeneawo ŵakumweruzgira makora munthu wakwananga, chifukwa cha chimbundi, kweni ŵakureka kumweruzgira mwakunyoroka munthu wambula kafukwa.

²⁴Ntheura sono, umo dimi la moto likochera visinkho vya maphekese, umo utheka wakomira ukunyekera na moto, ntheura ndimo misisi yawo yiti yivundirenge, maluŵa ghawo ghati ghawuruke nga ndi fuvu. Ivi vizamkuchitika chifukwa muli kukana, marango gha FUMU Mwenenkhongono zose, na kupepura mazgu gha Mutuŵa Yura wa Israele.

²⁵Pa chifukwa ichi, FUMU yikaŵakwiyira ŵanthu ŵakhe, yikawuskira woko lakhe pa iwo kuti yiŵalange. Mapiri ghakasunkhunyika, ndipo vitanda vya mathupi ghawo, vyati waka mbwee nga ndi viswaswa, mu misewu ya misumba. Nangauli vikaŵa ntheura, ukari wa FUMU kuti ukagowoka chara, woko lakhe likaŵa lakunyoroka ndipera kuŵalanga iwo.

²⁶FUMU yipereke chimanyikwiro cha ndembera ya nkhondo, kuchema mafuko ghatali. Yiti yilizge kaluvi kughachema, kufuma ku mphererekezgo za charu kwiza kamumarani. Wonani ghakwiza luŵiro ghakuchimbilira.

²⁷Palije na yumoza wakuvuka, panji wakukhuŵara, mukati mwawo. Palije na yumoza wakusiwa panji kugona tulo. Palije nanga ndi nkhwamba mu chiuno iyo yapweremuka, panji lusinga lwa skapato ulo lwadumuka.

²⁸Mivwi yawo njakuthwa, ndipo mauta ghawo ngakupinda makora, vikandiro vya mahachi ghawo vili nga ndi libwe la sangalawe, ndipo mikombero ya magareta ghawo, yikuchimbira nga ndi kavuruvuru.

²⁹Kubangura kwawo kuli nga ndi nkharamu, nadi, ŵakubangura nga ndi twana twa nkharamu. Ŵakuwuruma na kukora nyama, ŵakuyiyegha ndipo palije na uyo wangayithaska.

³⁰Pa zuŵa leneilo ŵati ŵabangure pa imwe ŵaIsraele, nga ndi kupoma kwa nyanja. Ndipo usange yumoza wizamkulaŵiska mu charu, wizamkuwona mdima na visuzgo, ungweru nawo wizamkufipiskika na maŵingu.