Read new_tumbuka_bible Yesaya 50 Bible Online

Yesaya 50 - new_tumbuka_bible bible

Yesaya 50

¹FUMU yikuti, “Kasi wali nkhu karata wa chipati cha nyoko, karata mweneuyo nkhamusuzulira? Panji kasi nkhakuguliska kwa njani kuti ndiripe ngongole? Iwe ukaguliskika chifukwa cha kwananga kwako. Nyoko nayo wakachimbizgika chifukwa cha majuvyo ghako.

²Kasi nchifukwa uli para ine nkhizanga pakaŵavye munthu? Para nkhachemerezga, kasi nchifukwa uli pakaŵavye wakuzgora? Kasi woko lane likaŵa lifupi kumuwombolani imwe? Kasi nkhongono ndilije kuti ndimuthaskani? Nkhuchenya nyanja ndipo yikukamuka, nkhuyizgora mironga kuŵa chiparamba. Somba zakhe zikufwa na kuvunda, chifukwa maji mulije.

³Nkhuvwarika mtambo kubiriŵira kwakhe, ndipo nkhuzgora chigudulu kuŵa chidiko chakhe.”

⁴FUMU Chiuta wandipa lulimi lwa kumanya kusambizga, lwa kumanya kusanguruska awo ŵazotofyeka. Mulenje uliwose wakandiwuska, wakuwuska makutu ghane kuti ndipulike nga ndi munthu uyo wakusambizgika.

⁵FUMU Chiuta wajula makutu ghane kuti ndipulikiske, ndipo ine kuti ndayigarukirapo chara, panji nesi kuwerera nyuma.

⁶Nkhapereka muwongo wane kwa awo ŵakanditimbanga, na matama ghane kwa awo ŵakakwenyuranga mwembe wane. Ine kuti nkhaŵabisira chisko chane chara, para ŵakandigoskanga na kundifunyira mata.

⁷Pakuti FUMU Chiuta wakundovwira, pa chifukwa ichi kuti ndilengeskekenge chara. Ntheura ndakhozga mtima wane nga ndi libwe la sangalawe, ndipo nkhumanya kuti ndikhozgeke soni chara.

⁸Uyo wakundirunjiska ine wali pafupi. Kasi ndi njani uyo wati walimbane nane? Wize kuti teruzgane. Kasi ndi njani uyo ndi murwani wane? Wize pano kuti tiwonane.

⁹FUMU Chiuta ndiyo wakundovwira, kasi ndi njani uyo wati wandipe mrandu? Wose ŵati ŵamare nga ndi malaya, fufuzi ndizo ziti ziŵaryenge.

¹⁰Kasi ndi njani mukati mwinu uyo wakopa FUMU, na kupulikira mazgu gha muteŵeti wakhe? Munthu uyo wakwenda mu nthowa za mdima, munthu uyo walije ungweru, wagomezge mu zina la FUMU, na kweghamira mwa Chiuta wakhe.

¹¹Sono wonani, mose imwe mukupemba moto, mwaŵeneimwe mukubuska nkhuni. Yendani na ungweru wa moto winu, na wa nkhuni izo mwagorezga. Icho chimuwiraninge kufuma mu woko lane ndi ichi: muti mugonenge pasi na kutombozgeka chomene.