Read new_tumbuka_bible Yesaya 51 Bible Online

Yesaya 51 - new_tumbuka_bible bible

Yesaya 51

¹FUMU yikuti, “Pulikani kwa ine imwe mukukhumba kuthaskika, mwaŵeneimwe mukupenja FUMU. Ghanaghanani za jarawe leneilo mukaŵajikako, na za khururu umo mukajimikamo.

²Ghanaghanani za Abrahamu wiskemwekuru, za Sara mweneuyo wakamubabani. Para nkhamuchema, wakaŵa yekha wambula mwana, kweni nkhamutumbika pakwandaniska ŵazukuru ŵakhe.

³“Nadi FUMU yizamkusanguruska ŵanthu ŵa mu Ziyoni, yizamkuŵasanguruska ŵa mu malo ghakhe ghose ghakupasuka, yizamkughazgora mapopa kuŵa nga ndi munda wa Edeni, malo gha chiparamba kuŵa nga ndi munda wa FUMU. Chimwemwe na kukondwa vizamkusangika mwenemumo, ŵanthu ŵizamkwimba za kurumba na kuwonga FUMU.

⁴“Pulikani kwa ine, imwe mwa ŵanthu ŵane, tegherezga kwa ine iwe fuko lane. Marango ghakufumira kwa ine, ndipo weruzgi wane wakunyoroka ndiwo uti uŵenge ungweru ku ŵamitundu.

⁵Kuthaskika kwane kukusenderera kufupi luŵiro, chiponoska chane chafika, ndipo nkhongono zane zizamkweruzga ŵamitundu. Awo ŵakukhara mu vyaru vya mu mphepete mwa nyanja ŵakundilindirira, ŵakulindirira nkhongono yane mu chigomezgo.

⁶Laŵiskani ku mlengalenga, laŵiskani pa charu cha pasi. Mlengalenga uti uzgeŵerekerenge nga ndi josi, ndipo charu cha pasi chiti chimare nga ndi malaya. Awo ŵakukhara mwenemumo ŵizamkufwa nga ndi nthata. Kweni chiponosko chane chizamkuŵa cha muyirayira, ndipo kuthaska kwane kuti kutondekenge chara.

⁷“Pulikani kwa ine, imwe mukumanya icho nchiweme, imwe mu mitima yinu muli na marango ghane. Mureke kopa kuhoyeka na ŵanthu, panji kutenthema para ŵakumutukani.

⁸Pakuti fufuzi zizamkuŵarya nga ndi salu, suchi zizamkuŵarya nga ndi malaya gha thonje. Kweni kuthaska kwane kwamkuŵa kwa muyirayira, kuponoska kwane kwamkuŵa kwa muwiro ghose.”

⁹Mwe FUMU, pamphukani! Pamphukani! Mujivwarike nkhongono. Pamphukani nga ndi umo mukachitira mu mazuŵa gha mwaka, nga ndi mu miwiro ya ŵanthu ŵa kale. Asi ndimwe mukadumula Rahabu kuŵa tuchokotuchoko, na kugwaza chinjoka chakofya chira cha mu nyanja?

¹⁰Asi ndimwe FUMU mwa imwe mukakamuska nyanja, maji ghara gha ndimba yikuru. Ndimwe mukajula nthowa mu ndimba ya nyanja, mwakuti ŵakuwombokwa ŵambukepo.

¹¹Ŵakuwombokwa ŵa FUMU ŵizamkuwera, ŵizamkunjira mu Ziyoni uku ŵakwimba. Chimwemwe cha muyirayira chizamkuŵa pa visko vyawo. Iwo ŵizamkukondwa na kusekerera chomene, ndipo vitima na kuchinchima vizamkuchimbira.

¹²FUMU yikuti, “Ine ndine nkhukusanguruskani iwe. Kasi iwe ndiwe njani kuti umope munthu uyo wakufwa, kuti umope mwana wa munthu uyo ŵali nga ndi utheka uwo ukufota.

¹³Iwe ukuruwa FUMU mlengi wako, uyo wakatandaula mtambo, na kuŵika lufura lwa charu. Kasi chifukwa uli nyengo zose ukopa, kasi ukopa ukari wa uyo wakukutindiŵizgirani pasi, mweneuyo wanozgekera kuparanyika. Kasi sono ukari wa munthu wa ntheura uli nkhu?

¹⁴Ŵanthu awo ŵali kukakika ŵati ŵasutulike mwa sonosono. Iwo kuti ŵati ŵafwenge na kusungika mu dindi chara, ndipo chakurya kuti chizamkuŵasoŵa chara.

¹⁵Ine ndine FUMU, Chiuta winu, ndine nkhuvundura nyanja kuti majigha ghakhe ghapome. Iyo zina lakhe ndi FUMU Mwenenkhongono zose.

¹⁶Ine ndamuphalirani icho mukwenera kuyowoya, ndipo nditi ndimuvikirirani na nkhongono ya woko lane. Ine ndine nkhaŵika vyose vya mu mlengalenga, ndine nkhaŵika lufura lwa charu cha pasi, ndipo ndine nkhuyowoya ku ŵanthu ŵa mu Ziyoni kuti, ‘Ndimwe ŵanthu ŵane.’ ”

¹⁷Imwe ŵanthu ŵa mu Yerusalemu, pamphukani! Pamphukani! Wukirani muchanya. Imwe mwavimyantha ivyo FUMU ya muchitirani mu ukari wakhe, mwaŵeneimwe mwamwa visika vya ukari wakhe mwakufikapo, mpaka mwenda penthyapenthya.

¹⁸Palije na yumoza wa ŵana awo muli kubaba, uyo wati wamurongozgani. Palije na yumoza wa ŵana awo muli kulera uyo wati ŵamukorani pa woko.

¹⁹Visuzgo vyamuwirani paŵiri, charu chinu chanangika na kusakazika. Ŵazukuru ŵinu ŵayuzgika na njara na kukomeka na nkhondo. Kasi ndi njani uyo wangamusanguruskani?

²⁰Ŵana ŵinu ŵafwa lunkhuŵa, ŵali gadagada mu msewu yose ya mu misumba, nga ndi mphoyo iyo yakoreka mu ukonde. Ŵawumyantha ukari wa FUMU, na kuchenyeka kwa Chiuta winu.

²¹Ntheura imwe ŵanthu ŵakusuzgika mu Yerusalemu pulikani ichi, mwaŵeneimwe mwaloŵera, kweni kuti vinyo chara.

²²FUMU Chiuta, uyo ndi Chiuta mweneuyo wakumuvikirirani wakuti, “Ine ndawuskako nkhombo ya ukari iyo yikamuloŵezganinge. Imwe muti mumwengemoso chara mu nkhombo ya ukari wane.

²³Nkhombo iyi nditi ndiyipereke ku awo ŵakamusuzganinge, ŵeneawo ŵakatenge kwa imwe, ‘Sindamani kuti ise tende pachanya pa imwe.’ Miwongo yinu ndiyo ŵayizgora kuti ŵendengepo, kuŵa nga ndi misewu yakwendamo.”