Read new_tumbuka_bible Yesaya 52 Bible Online

Yesaya 52 - new_tumbuka_bible bible

Yesaya 52

¹“Pamphukani, pamphukani, imwe ŵanthu ŵa mu Ziyoni, muvware zikhore na kwima nganganga. Vwarani malaya ghinu gha uchindami, imwe ŵa mu Yerusalemu, msumba wakupatulika. Ŵanthu ŵambula kukotoreka na ŵakazuzi, kuti mwizamkunjiramoso mu msumba chara.

²Jikung'unthani fuvu, wukirani muchanya, imwe ŵamikori ŵa msumba wa Yerusalemu, jisutulani magoli gha mu singo zinu, imwe ŵa mu msumba wa Ziyoni.”

³Pakuti FUMU yikuti, “Mukaguliskika kwambula kupokerapo na kanthu, mukawomboleka kwambula ndarama.

⁴Pakuti FUMU Chiuta wakuyowoya kuti, ‘Pakudanga ŵanthu ŵane ŵakakhilira ku Eguputo kuya kakhara, pamanyuma ŵaAsiriya ŵakaŵayuzga kwambula chifukwa.’

⁵Kweni sono FUMU yikuti, ‘Kasi sono ndatorapo kanthu uli? Ŵanthu ŵane ŵatoreka kwambula kupokerapo na kanthu. Awo ŵakumuwusani ŵakumutombozgani, ndipo rutaruta zuŵa lose, zina lane likuyuyurika.

⁶Ntheura ŵanthu ŵane ŵizamkumanya zina lane. Ntheura mu zuŵa leneilo ŵizamkumanya, kuti ine ndine ndayowoya. Inya ndine nadi.’ ”

⁷Nako nkhutowa pakuwoneka pa mapiri, thenga ilo likwiza na uthenga uweme, ilo likupharazga vya mutende, ilo likwiza na uthenga uweme, wa vinthu viweme, ilo likupharazga vya chiponosko. Ilo likuti ku ŵanthu ŵa mu Ziyoni, “Chiuta winu wakuwusa.”

⁸Pulikani! Ŵalinda ŵinu ŵakuchemerezga chomene, wose pamoza ŵakwimba mwakukondwa. Pakuti na maso ghawo ŵizamkuwona, FUMU yikuwerera mu Ziyoni.

⁹Chemerezgani pamoza mukwimba sumu zakukondwa, imwe mukukhara mu malo mahami gha Yerusalemu, pakuti FUMU ya ŵasanguruska ŵanthu ŵakhe, ndipo yawombola Yerusalemu.

¹⁰FUMU yarongora pakweru nkhongono zakhe zakupatulika, panthazi pa mafuko ghose, ndipo ŵanthu wose ŵa mu charu cha pasi, ŵizamkuwona chiponosko cha Chiuta withu.

¹¹Wukanimo, wukanimo, fumanimo mu Babuloni mureke kukhwaska chilichose cha ukazuzi! Muwukemo mukati mwakhe ndipo mujitozge, imwe mukuyegha viteŵetero vya FUMU.

¹²Kweni kuti mufumengemo mwa luŵiro chara, nanga nkhufumamo na kuchimbira, pakuti FUMU ndiyo yizamkwenda panthazi pinu, Chiuta wa Israele ndiyo wizamkuŵa mulinda kunyuma zinu.

¹³FUMU yikuti, “Muteŵeti wane wizamkuchita makora, wizamkukwezgeka na kuchindikika chomene, ndipo wizamkurumbika chomene nkhanira.

¹⁴Nga ndi umo ŵanandi ŵakazizikika na iyo, kawonekero kakhe kakahenipiskika chomene, kaŵiro kakhe kuti kakaŵa nga ndi munthu chara.

¹⁵Ntheura ndimo iyo wizamkuzizikira mafuko ghanandi, ŵakaronga ŵizamkuŵavye chakuyowoya chifukwa cha iyo. Pakuti icho ŵandaphalirikepo, ŵizamkuchiwona, ndipo icho ŵandachipulikepo, ŵizamkuchipulikiska.”