Read new_tumbuka_bible Yesaya 53 Bible Online

Yesaya 53 - new_tumbuka_bible bible

Yesaya 53

¹Ndi njani wagomezga ivyo tapulika? Nkhwa njani uko nkhongono ya FUMU yawonekera?

²Pakuti wakakura panthazi pa FUMU nga ndi chiphukira, wakaŵa nga ndi musisi mu dongo lakomira. Iyo wakaŵavye kaŵiro nesi utozi kuti timulaŵiske chara, wakaŵavye kawonekero kaweme kuti timukhumbirenge.

³Iyo wakayuyurika na kukanika na ŵanthu, munthu wa vitima na wakuzgoŵera vyakuŵinya. Wakaŵa nga ndi uyo ŵanthu ŵakumunyanyara, wakuyuyurika ndipo tikamupima kuŵa chawakawaka.

⁴Nadi wakayegha vyakuŵinya vyithu, wakathwika vitima vyithu. Ndipouli tikamupima kuti Chiuta ndiyo wakumulanga, wakumutimba na kumusuzga.

⁵Kweni wakalasika chifukwa cha zakwananga zithu, wakapwetekeka chifukwa cha maubendezi ghithu. Iyo wakalangika kuti ise tiŵe ŵa msuma, ndipo na vilonda vyakhe ise tachizgika.

⁶Tose tapuruka nga ndi mberere, waliyose wa ise wakwenda mu nthowa yakhe na yakhe. Kweni FUMU yaŵika pa iyo, maubendezi ghithu ghose.

⁷Iyo wakanyekezgeka na kusuzgika, ndipouli kuti wakajula mlomo wakhe chara. Nga ndi mwana-mberere uyo wakurongozgeka kuya kakomeka, nga ndi mberere iyo yakhara waka chete para ŵakuyisenga, ntheura iyo kuti wakajula mlomo wakhe chara.

⁸Wakanyekezgeka na kweruzgika ndipo ŵakaruta nayo. Ndi njani mu ŵabali wakhe uyo wakapwererako? Pakuti wakawuskikako mu charu cha ŵanthu ŵamoyo, kuti walangike chifukwa cha zakwananga za ŵanthu.

⁹Ŵakamunozgera dindi pamoza na ŵaheni, ndipo wakasungika pamoza na ŵasambazi, nangauli wakachitapo chivulupi chara, nesi kuyowoyapo utesi uliwose.

¹⁰Ndipouli likaŵa khumbo la FUMU kumupweteka. Yamuŵika mu vyakuŵinya, para wakupereka umoyo wakhe kuŵa sembe yakuphepiskira majuvyo. Iyo wizamkuwona ŵa mu mphapu yakhe na kukhara umoyo utali, ndipo khumbo la FUMU lizamkufiskika mwa iyo.

¹¹Wizamkuwona chandulo cha visuzgo vya umoyo wakhe, ndipo wizamkukhorwa nacho. Muteŵeti wane, kwizira mu mahara ghakhe, wizamkuyegha wizamkugowokera ŵanthu ŵanandi, na kuyegha zakwananga zawo.

¹²Ntheura ndizamkumupa malo pamoza na ŵakuzirwa, malo pamoza na ŵararaŵarara na ŵankhongono. Pakuti wakataya umoyo wakhe ku nyifwa, na kupendekera pamoza na ŵakwananga. Wakayegha zakwananga za ŵanthu ŵanandi, ndipo wakaŵaŵeyerera ŵakwananga.