Read new_tumbuka_bible Yesaya 54 Bible Online

Yesaya 54 - new_tumbuka_bible bible

Yesaya 54

¹FUMU yikuti, “Iwe msumba wa Yerusalemu, yimba na chimwemwe, iwe waŵa nga ndi mwanakazi uyo ndi chumba. Chemerezga chomene kurongora kuti uli wakukondwa, wa mweneiwe ulije kunjiramo mu vyakuŵinya vya pa kubaba. Pakuti sono uti uŵenge na ŵana ŵanandi, kuruska mwanakazi uyo wandarekekepo na mufumu wakhe.

²Ukuzgireko malo gha hema lako. Utandaure salu za hema lako kuti ziŵe zisani. Ungarekanga chara, utalikiske vingwe vyakhe, ndipo ukhozge vikhomo vyakhe.

³Pakuti wizamkusanuzga mphaka zako uku na uku. Ŵa mphapu yako ŵizamkupoka charu cha ŵamitundu ndipo ŵizamkukhara mu misumba iyo yarekeka.

⁴“Ungopanga, chifukwa kuti wizamkukhozgeka soni chara. Ureke kuwa nkhumbi chifukwa kuti wamkuyuyurika chara. Pakuti wizamkuruwa kukhozgeka soni kwa uwukirano wako, ndipo wizamkukumbukaso kusunjizgika kwa uchokoro wako chara.

⁵Mlengi wako ndiyo mufumu wako, zina lakhe ndi FUMU Mwenenkhongono zose. Mutuŵa Yura wa Israele ndiyo Muwomboli wako, wakuchemeka Chiuta wa charu chose cha pasi.

⁶“FUMU yamuchemani, imwe ŵaIsraele, nga ndi muwoli uyo wali kusidika, ndipo wakusuzgika mu mtima, nga ndi muwoli wa mu uwukirano para wajowoleka.” Ntheura ndimo yikuyowoyera FUMU.

⁷“Mu kanyengo kachoko waka nkhamurekani, kweni na chiwuravi chikuru ndizamkukuwezgaso.

⁸Mu kanyengo kachoko waka nkhamurekani uku ndili mu ukari wakufuruka, kweni na chisungusungu cha muyirayira nditi ndiŵe na chiwuravi na imwe.” Ntheura ndimo yikuyowoyera FUMU, Muwomboli winu.

⁹“Kwa ine ichi chili nga ndi mu nyengo ya Nowa, para nkharapa kuti ndinangengeso charu na maji gha chigumura chara. Ntheura sono napo nkhurapa kuti nditi ndimukwiyiraniso chara, nesi kumuchenyaniso.

¹⁰Nangauli mapiri ghangasunkhunyika ndipo tumapiri nato tungasezgeka, ndipouli chisungusungu chane kwa imwe kuti chimarenge chara, nanga ndi phangano lane la mutende kuti nalo limarenge chara. Ntheura ndimo yikuyowoyera FUMU iyo yili namwe na chisungusungu.”

¹¹FUMU yikuti, “Iwe Yerusalemu, ndiwe msumba wakusuzgika msumba wakusoŵa wovwiri, wambula na yumoza wakukusanguruska. Ine nditi ndikutoweske na mawe gha mtengo wapatali, nditi ndizengeso malufura ghako na mawe gha safire gha mtengo wapatali.

¹²Ndizamkuzenga vigongwe vyako vya nkhondo na mawe ghaswesi, vipata vya msumba winu na mawe ghachesamu ghakuŵa nga ndi moto, viliŵa vyinu vyose na mawe gha mtengo wapatali.

¹³“Ŵana ŵako wose ŵizamkusambizgika na FUMU, ndipo ŵizamkuŵa pa mutende na kusakata kukuru.

¹⁴Mwizamkukhozgeka mu urunji. Awo ŵakamutindiŵizganinge ŵamkuŵa kutali na imwe. Mwamkuŵa kutali na ivyo vikofya, kuti vyamkwiza kufupi na imwe chara.

¹⁵Usange munthu yunji wamba nkhondo na imwe, nkhondo iyo kuti yafumira kwa ine chara. Yose uyo wamba nkhondo na imwe wati wathereskekenge.

¹⁶“Ine ndine ndili kulenga mufuzi, uyo wakuvukuta moto wa makara na kufura mahomwa kwakuyana na mlimo wakhe. Ine ndine nkhalengaso munthu uyo wakukoma kuti waŵamare.

¹⁷Palije homwa lakupangikira imwe leneilo lizamkumupwetekani, ndipo ŵanthu wose awo ŵakumuyowoyerani uheni mwizamkuŵasuska. Ichi ndicho chiharo cha ŵateŵeti wa FUMU ndipo kurunjiskika kwawo kukufumira kwa ine.” Ntheura ndimo yikuyowoyera FUMU.