Read new_tumbuka_bible Yesaya 55 Bible Online

Yesaya 55 - new_tumbuka_bible bible

Yesaya 55

¹FUMU yikuyowoya yikuti, Zaninge mose imwe muli na nyota, maji ya kumwa ghali kuno. Ndipo imwe mulije ndarama, zaninge kuti mwizakagule chakurya, murye. Zaninge mwizakagule vinyo na mkaka, kwambula kupereka ndarama panji chilichose.

²Kasi nchifukwa uli mukunanga ndarama zinu pa icho kuti nchakurya chara, ndiposo na nkhongono zinu pa icho nchambula kukhutiska? Mundipulikiske chomene, ryaninge icho nchiweme, ndipo mujikondwereskenge na vyakurya viweme vyakununa.

³Tegherezgani makutu ghinu, ndipo mwize kwa ine. Pulikani mwakuti muŵe ŵamoyo. Ine nditi ndichite phangano la muyirayira na imwe, ndilo chisungusungu chane, kutemwa kwenecho uko nkhachita kwa Davide.

⁴Ine nkhamuŵika Davide kuŵa kaboni ku ŵamitundu wose, kuŵa murongozgi ndiposo wakuwusa ŵanthu ŵanandi.

⁵Nadi mwizamkuchema mafuko agho kuti mukughamanya chara, ndipo mafuko agho kuti ghakamumanyani chara ghizamkuchimbilira kwa imwe, chifukwa cha FUMU, Chiuta winu, Mutuŵa Yura wa Israele, pakuti wamuchindikani.

⁶Penjaninge FUMU pa nyengo iyo yingasangika. Chemaninge kwa iyo apo yichali pafupi.

⁷Munthu muheni wareke kwenda mu nthowa zakhe ziheni, wakwananga wareke kuŵa na maghanoghano ghaheni. Wawerere kwa FUMU, Chiuta withu, mwakuti waŵe na lusungu na iwo, na kuti wamugowokere za kwananga zakhe zose.

⁸Chifukwa FUMU yikuti, “Maghanoghano ghane kuti ghakuyana na gha imwe chara, nthowa zane nazo kuti zikuyana na zinu chara.”

⁹Pakuti umo mtambo uliri pachanya pa charu, ndimo nthowa zane nazo ziliri pachanya kuruska zinu, maghanoghano ghane nagho ghaliri pachanya kuruska ghinu.

¹⁰Ndipo nga ndi umo vuna na chiwuvi, vikukhilira pasi kufuma kuchanya, ndipo kuti vikuwerera kuchanya chara, kwambula kuti vinyevye charu cha pasi, na kuchizgora kuŵa cha nyata na kukuzga vya kumera, mwakuti chikupambika mbuto kwa uyo wakupanda, ndiposo na chakurya kwa uyo wakurya,

¹¹ntheura ndimo ghaliri mazgu ghane, agho ghakufuma mu mlomo wane. Igho kuti ghati ghawelerenge waka kwa ine chara. Kweni ghati ghachite icho ndanozgera, na kufiska makora icho nkhaghatumira.

¹²Pakuti imwe mwizamkufuma muli na chimwemwe, na kurongozgeka mu mutende. Mapiri na tumapiri, vizamkuchemerezga chomene kumwimbirani zisumu, ndipo makuni gha mu thengere, ghizamkumukuŵirani mawoko.

¹³Mu malo umo mukameranga minga, mwizamkumera gha mulombwa. Mu malo umo mukameranga mikolankhanga, mwizamkumera makuni gha kachere. Ichi chizamkuŵa chimanyikwiro, icho chizamkukhalirira kwa muyirayira, na kuŵa chikumbusko icho ine FUMU ndili kuchita.