Read new_tumbuka_bible Yesaya 56 Bible Online

Yesaya 56 - new_tumbuka_bible bible

Yesaya 56

¹FUMU yikuti ku ŵanthu ŵakhe, “Sungilirani weruzgi wakunyoroka, ndipo muchitenge icho nchiweme. Pakuti nditi ndimuponoskani sonosono apa, ndipo urunji wane, sono uti uvumbukwenge.

²Ngwakutumbikika munthu uyo wakuchita ichi, mweneuyo wakuchisungilira chomene. Ngwakutumbikika uyo wakusunga zuŵa la Sabata, pakureka kulikazuzga, uyo wakujisunga pakureka kuchita uheni.”

³Mulendo uyo wajibatika kwa FUMU, wareke kuyowoya kuti, “Nadi, FUMU yiti yindipatuleko ku ŵanthu ŵakhe.” Ndipo nthunguli nayo, yireke kuyowoya kuti, “Ine ndili nga ndi khuni lakomira.”

⁴Pakuti FUMU yikuti, “Nthunguli izo zikusunga mazuŵa ghane gha sabata, izo zikuchita ivyo vikundikondweska ine, na kusunga phangano lane mwakugomezgeka,

⁵ndizamkuzilemba mu viliŵa vya nyumba yane, mazina ghawo ghizamkuŵa chikumbusko, kuruska kubaba ŵana ŵanarume na ŵanakazi. Ndizamkuŵapa zina la muyirayira, ilo kuti lizamkuruwika chara.”

⁶Ŵalendo awo ŵajibatika kwa FUMU kuti ŵayiteŵetere, na kutemwa zina la FUMU, ndipo ŵakujizgora kuŵa ŵateŵeti ŵakhe, na wose awo ŵakusunga zuŵa la Sabata, pakureka kulikazuzga, ndipo ŵakusunga phangano lane mwakugomezgeka,

⁷aŵa ndizamkuŵatorera ku phiri lane lakupatulika, na kuŵakondweska mu nyumba yane yakusoperamo. Sembe zawo zakocha na zakukoma, vizamkupokerereka pa jochero lane. Pakuti nyumba yane yizamkuchemeka, “nyumba ya kusoperamo ŵamitundu yose.”

⁸FUMU Chiuta, uyo wakuwunganya ŵaIsraele wose, awo ŵakaŵa ku umikori wakuti, “Ndizamkuŵawunganyaso ŵanyakhe, pa dera pa awo ndili kuŵawunganya kale.”

⁹FUMU yikutiso, “Imwe mwa ŵanthu ŵa mitundu yinyakhe, zaninge nga ndi vikoko vya mu thengere, kuti muŵarye ŵanthu aŵa, inya, zaninge nga ndi vikoko vya mu nkhorongo.”

¹⁰Ŵarongozgi ŵa ŵaIsraele mba chiburumutira, wose mahara ŵalije. Wose ŵali nga ndi ncheŵe za mbuwu, izo kuti zingabwentha chara. Iwo ŵakugona waka na kulota, ndipo ŵakutemwa kugonerezga.

¹¹Iwo ŵali nga ndi ncheŵe za njara yikuru, kuti ŵakukhuta chara. Ŵaliska nawo mbambula mahara. Wose ŵazgokera ku nthowa zawo na zawo, ndipo waliyose wakuchita icho chingamupa chandulo.

¹²Iwo ŵakuyowoyeskana ŵakuti, “Zaninge, tiyeni tijimweske vinyo, tiyeni tijimweske moŵa mpaka tiroŵere. Ndipo zuŵa la machero liti liŵenge nga nda muhanya uno, zuŵa liwemiso chomene.”