Read new_tumbuka_bible Yesaya 57 Bible Online

Yesaya 57 - new_tumbuka_bible bible

Yesaya 57

¹Ŵanthu ŵarunji ŵakufwa, ndipo palije na yumoza wakulorako. Ŵanthu ŵakugomezgeka ŵakukomeka, ndipo palije na yumoza wakupulikiska. Pakuti ŵarunji ŵakuwuskikako, kuti ŵathaskike ku visuzgo.

²Awo ŵakwenda mu nthowa zakunyoroka, ŵakunjira mu mutende, ndipo ŵakupumula apo ŵakugona mukufwa kwawo.

³Kweni imwe ŵana ŵa muwukwi, ŵana ŵa muleŵe na muzaghali, sendererani kuno kuti mweruzgike.

⁴Kasi mukugoska njani? Kasi ndi njani uyo mukumuyasamulira mlomo? Kasi mukuhoya njani? Asi imwe ndimwe ŵana ŵachigaruka ŵara, ŵazukuru ŵa ŵanthu ŵakuyowoya utesi?

⁵Imwe mukurakaraka kuchita uheni, mukati mwa makuni gha musoro na musi mwa khuni lose liŵisi. Mukupereka ŵana ŵinu kuŵa sembe mu madambo, ndiposo na kusi ku zimphanji za majarawe.

⁶Mukusankha mawe ghaweme mu madambo kuti mughasopenge, gheneagha ndigho imwe mukughagomezga. Nadi, ku agha ndiko mukupereka vyakumwa, na chakurya kwa ivyo kuŵa sembe. Kasi vyeneivi ine vingandikondweska?

⁷Imwe muli kuŵika vitara vyinu pachanya pa mapiri ghatalighatali kuya kachitirapo uzaghali. Kwenekura ndiko mukaruta kuya kapereka sembe.

⁸Kunyuma kwa vijaro na mafuremu gha vijaro vyinu, ndiko mwaŵikako vimanyikwiro vya ŵachiuta ngoza winu. Pakuti, pakundisida ine, mwatandaula chitara chinu, mwakwerapo ndipo mwachisanuzga. Mwajichitira phangano na awo mukutemwa vitara vyawo, ndipo makachita uzaghali.

⁹Imwe mukuruta kuya kasopa chiuta ngoza Moleki, ndipo mukujitozga na vyakununkhira vinandi. Mukutuma nthumi ku malo gha kutali, ndipo na ku malo gha wakufwa.

¹⁰Mukavuka chifukwa cha utali wa mitunda iyo mukayenda, kweni mukayowoyapo chara kuti, “Ichi nchawaka.” Imwe mukasanga umoyo uphya wa nkhongono zinu, ntheura kuti mukaropwa chara.

¹¹Kasi ndi chiuta ngoza nju, uyo mukamopanga na kutenthema nayo, mwakuti mundipusike na kureka kughanaghanako za ine? Kasi mwareka kundiwopa ine, chifukwa ndakhara chete kwa nyengo yitali?

¹²Mukughanaghana kuti icho mukuchita nchiweme, kweni ine nditi ndirongore pakweru milimo yinu, ndipo ŵachiuta ngoza ŵinu kuti ŵati ŵamovwirani chara.

¹³Para mukuchemerezga kukhumba wovwiri, rekani ŵachiuta ngoza ŵinu ŵanandinandi ŵamuthaskani. Mphepo yizamkuŵakukura wose ŵachiuta ngoza ŵinu, muvuchi wizamkuŵaputira kutali. Kweni munthu uyo wakubisama mwa ine, wizamkupoka charu, na kuhara mapiri ghane ghakupatulika.

¹⁴Mazgu ghizamkupulikikwa kuti, “Nozgani! Nozgani! Nozgani nthowa. Wuskanimo vikhuŵazgo vyose mukati mu nthowa ya ŵanthu ŵane.”

¹⁵Uyo ngwa pachanya na wakutumphuskika nkhanira, mweneuyo ngwa muyirayira, uyo ndi Mutuŵa, wakuti, “Ine nkhukhara mu malo ghapachanya na ghakupatulika, ndipo nkhukharaso na uyo ngwa mzimu wakuphyoka na wakujiyuyura, mwakuti ndiwuskeso mzimu wa uyo ngwa kujiyuyura, na kuwuskaso mtima wa uyo wakurapa nadi.

¹⁶Ndine nkhalenga ŵanthu, ndine nkhaŵapa muvuchi wa umoyo. Ntheura nditi ndisuskanenge na munthu kwa muyirayira chara, nanga nkhukwiya mazuŵa ghose. Pakuti mwa ine ndimo mukufumira mzimu, ndiposo ndine ndili kuwulenga muvuchi wa umoyo.

¹⁷Nkhaŵakaripira chifukwa cha ubendezi wakudokera kwawo, nkhaŵalanga ndipo nkhaŵareka. Ndipouli ŵakanonofya mitima yawo, na kurutilira kwenda mu nthowa zawo.

¹⁸Ine naziwona nthowa za ŵanthu aŵa, kweni nditi ndiŵachizge. Nditi ndiŵarongozge na kuŵapa chisangurusko, ndipo awo ŵakulira ŵizamkundirumba na mazgu ghawo.”

¹⁹FUMU yikuti, “Ndizamkuŵapa mutende, ŵa kutali na ŵapafupi. Nadi ndizamkuŵachizga wose.”

²⁰Kweni ŵaheni ŵali nga ndi nyanja yakuvunduka, iyo yikukhara bata chara, yeneiyo majigha ghakhe ghakuvundura mathipa na marikho.

²¹“Mutende kulije kwa munthu muheni.” Ntheura ndimo wakuyowoyera Chiuta wane.