Read new_tumbuka_bible Yesaya 58 Bible Online

Yesaya 58 - new_tumbuka_bible bible

Yesaya 58

¹FUMU yikuti, “Chemerezga chomene, ungarekanga chara. Mazgu ghako ghapulikikwe nga ndi gha mbata. Uŵaphalire ŵanthu ŵane majuvyo ghawo, uŵaphalire ŵa fuko la Yakhobe na kwananga kwawo.

²Zuŵa lose ŵakuwoneka nga ndi para ŵakuchita ivyo nkhukhumba, ŵakunweka kuti ŵamanye nthowa zane. Ŵakuwoneka nga ndi fuko ilo kuchita nchakunyoroka, ndipo ŵandarekepo kusunga marango gha Chiuta wawo. Wakundiromba kuti ndiŵape weruzgi wakunyoroka, ndipo ŵakunweka kuti ŵakukhumba Chiuta wize pafupi nawo.

³Ŵanthu ŵakufumba ŵakuti, ‘Kasi tikuziŵizgirachi vyakurya, apo imwe FUMU mukupwererako chara? Kasi tikujiyuyurirachi chomene, apo imwe FUMU mukulorako chara.’ ” FUMU yikuzgora yikuti, “Mu zuŵa ilo mukuziŵizgira mukujikondweska mwekha pera, ndipo mukuŵatindiŵizga ŵanchito ŵinu wose.

⁴Imwe mukuziŵizga kurya kuti mwambanenge waka na kutimbana, ndipo mukutimbana nadi na nkhonyo ziheni. Kuziŵizga kwinu kwa mazuŵa ghano, kuti kungazgora mazgu ghinu kuŵa ghakupulikikwa kuchanya chara.

⁵Kasi kuziŵizga uko nkhukhumba nkhwa mtundu uwu, kwakuti munthu wajiyuyure kwa zuŵa limoza pera? Kasi nkhusindamira pasi nga ndi thete, kuvwara vigudulu na kukhara mu vyoto pera? Kasi uku ndiko mukuti kuziŵizga, ndiposo na zuŵa lakukondweska FUMU?”

⁶Kuziŵizga kwenecho uko ine nkhukhumba ndi uku: Kusutula vikondo vya uheni, kufwatula vingwe vya goliwoli, kuŵaŵika mu wanangwa awo ŵakunyekezgeka, ndiposo na kuphyora magoliwoli ghose.

⁷Kuziŵizga kwenecho ndikuŵapa chakurya ŵanthu ŵa njara, kuŵatorera ku nyumba ŵakavu ŵambula vikaya, kuvwarika awo mukuwona ŵali nkhule, kovwira awo mbabali ŵinu na ŵinu.

⁸Penepapo kuŵala kwinu kwizamkufuma nga ndi matandakucha, ndipo maluŵiro mwizamkuchizgika. Urunji winu wizamkumudangirirani ndipo uchindami wa FUMU wizamkuŵa mulinda kunyuma zinu.

⁹Penepapo mwizamkuchema kwa FUMU yeneiyo yizamkumuzgorani. Mwizamkulirira wovwiri, ndipo iyo yizamkuti, “Ndili pano.” Usange mukureka kutindiŵizga ŵanyinu, na kureka kurongorana njoŵe na kuyowoya viheni,

¹⁰usange mukupereka vyakurya ku ŵanjara, na kukhutiska ya awo ŵakusuzgika, penepapo ungweru winu wizamkuŵara mu mdima, ndipo mdima winu wa bii wizamkuŵa nga ndi muhanya pakati.

¹¹FUMU ndiyo yiti yimurongozgani nyengo zose, na kumukhutiskani na vinthu viweme ivyo mukukhumba mu charu cha chinkhamwa, ndiposo na kukhomeska mathupi ghinu. Mwizamkuŵa nga ndi munda uwo ukuthilirika makora, ndiposo nga ndi mbwiwi za maji izo kuti zikukamuka chara.

¹²Ivyo vikabwanganduka kale vizamkuzengekaso. Mwizamkuvizenga pa malufura gheneghara gha miwiro na miwiro. Imwe mwizamkuchemeka kuti, “Ŵanozgi ŵa malo ghakubwanganduka, ŵanthu ŵakuwezgeraso nyumba zakukharamo mu msewu ya misumba.”

¹³FUMU yikuti, “Mujikanizgenge kuchita nchito zinu pa zuŵa la Sabata, pakureka kuchita ivyo mukukhumba pa zuŵa lane lakupatulika. Zuŵa la Sabata mulichemenge zuŵa lakukondweska, zuŵa lakupatulika la FUMU ilo ndakuchindikika. Mulipatulenge zuŵa ili pakureka kwenda mu nthowa zinu na zinu, panji pakureka kuchita ivyo vikumukondweskani nanga nkhuyowoya vyawakawaka.

¹⁴Penepapo mwizamkusanga chimwemwe mwa FUMU, ndipo ine ndizamkumukwezgani pachanya pa charu. Imwe mwizamkufwasa na charu icho nkhapereka kwa wiskemwekuru Yakhobe. FUMU ndiyo yayowoya ichi na mlomo wakhe.”